Read Hmar DÂN PAHNINA 29 Bible Online

DÂN PAHNINA 29 - Hmar bible

DÂN PAHNINA 29

¹Horeb tlânga an kuoma thu a thlung bâkah LALPAIN Moab rama Israel mihai kuoma Mosie thu ân thlungtir, a thuthlung thuhai chu hieng hi a nih.

²Chuongchun, Mosie chun Israel mi po po chu a ko a, an kuomah a hril a, “Aigupta rama Pharao chunga dâm, a mihai po po chunga dâm, a ram po po chunga dâm, in mithmu ngeia LALPAIN thil a thawhai po po kha in hmu a,

³a fiena nasatak dâm, inchikna dâm, thilmak dâm in mit ngeia in hmu kha.

⁴Nisienlakhawm, LALPAIN vawisûn chen hin hriet thiemna lungril dâm, hmu theina mit dâm, hriet theina nakâwr dâm a la pêk naw cheu a nih.

⁵Thlalêrah kum sâwmli ka ṭhuoi ta cheu a, in silfênhai chu in sil chul naw a, in kekawkhai khawm in bun chul bawk naw a.

⁶Kei hi LALPA in Pathien ka nih ti in hriet theina dingin bei in fâk naw a, uoin khawm, zupui khawm in dâwn nawh.

⁷Chun, hi hmun in hung tlung hin Hesbon lal Sihon le Basan lal Og chu a mi do dingin an hung inthawk a, anni chu ei lo hne ta a.

⁸An ram chu ei lâk a, Reuben mihai, Gad mihai, Manasse hnam zâtve hai hluo dingin ei pêk a.

⁹Chuongchun, in thil thaw po poa in tluongtlung pei theina dingin hi thuthlung thuhai hi pawm unla, zâwm ro.

¹⁰“Tuhin in rêngin in hnam ṭhuoituhai, in upahai, in hotuhai, Israel mi po po,

¹¹in nauhai leh, in nuhmeihai leh, in umnaa ram dang mi in umpuihai dâm, in thing phûrtu le in tuichâwitu chenin,

¹²LALPA in Pathien ṭawng inkhâm le a thuthlung LALPA in Pathienin tuta nangni laia a thlunga hin in lût theina ding le,

¹³in pu Abraham, Isak, le Jakob hai kuoma ṭawng a lo inkhâm ta ang le, in kuoma a lo hril ta anga a mihai a ta dinga a sukdet theina ding cheu le, in Pathien a ni theina dingin LALPA in Pathien hmaa chun in um a nih.

¹⁴Hi ṭawng inkhâmna thu le thuthlung thu hi in kuoma chau thlung ka ni naw a,

¹⁵vawisûna LALPA ei Pathien hmaa ngîrtuhai le tuta ei kuoma um ve nawhai kuoma khawm a nih;

¹⁶(Aigupta rama ei um dân dâm, hnam danghai nêrthlenga ei fe dân dâm, in hriet a;

¹⁷anni laia an thil tirdakumhai le an milim, thing le lung dâm, tangkaruo le rângkachak dâm khawm kha in hmu bawk a).

¹⁸Chuong naw chun, nangni laia pasal amanih, nuhmei amanih, sûngkuo amanih, hnam amanih, chuong hnam pathienhai be ding chun an lungrilin tuhin LALPA ei Pathien chu nghatsanin, nangni lai thil kha le sairam zung ṭo suokna bul dâm lo um khiet rawi in tih.

¹⁹Hi inkhâmna thu ngaithlatu po poin, ‘Lulultakin ei lampui hraw chu hraw zing inla khawm him tho ei tih,'tia lungrila ngaidân siem a, inthlamuontu um hlau rawi an tih. (Chu chun ram hnâwng le ram ṭâwt chungah sietna intlun a tih).

²⁰LALPA chun ngaidam dêr naw ni a, LALPA lunginsenna le a thîkna chun, chu mi chu ur a ta, hi lekhabua ṭawngsie um po po hi a chungah um a tih; LALPAIN vân hnuoia inthawkin a hming chu thaihmang lem a tih.

²¹Hi dân bua chuong ṭawngsie thuthlung ang po po hin Israel hnam po po laia inthawkin suktuma umin thil ṭha naw tiengah LALPAIN inthangtir a tih.

²²“Chun, ruolthar la hung um dinghai, in hnunga in nauhai la hung um dinghai le, ram dang mi hlataka inthawka hung dinghai chun, chu rama hri le LALPAIN natna ân vawitirhai;

²³a ram pumpui chu kât le chia kângzêu, iengkhawm chîng nawna, iengkhawm inder nawna, hlobet takngiel khawm inder nawna ramah inchang a tih. Sodom le Gomorra, Adma le Zeboiim hai LALPAin a lunginsenna ṭiumtaka a suksiet ang hung nîng a tih.

²⁴Hnam tinin, ‘Ieng leia hi ram hi hieng anga LALPAIN a thaw am a na? Hi lunginsen inling nasatak hi iengtizie am a na?’ la tîng an tih.

²⁵Chuongchun, mîn, ‘Aigupta rama inthawk a ṭhuoi suok laia a thuthlung, LALPA an pi le pu Pathien chu an nghatsan a,

²⁶pathien dang, an hriet naw pathienhai, amân a ruotpêk nilohai rawng chu an bâwl a, an biek lei a nih.

²⁷Chuleiin, hi lekhabua chuong ṭawngsie po po intlungtirin hi ram chunga hin LALPA lungsenna chu a chawk a nih.

²⁸Lalpa lunginsenna nasatak le ṭiumtak lei chun anni chu an rama inthawkin a phâwi dawk a, ram dangah a thelût tâwl a nih, tuta an um dân ang hin,’ la tîng an tih.

²⁹Thil inthuphai chu LALPA ei Pathien ta a na, thil suklanga umhai ruok chu hi dân thuhai po po hi ei zâwm theina dingin eini le ei thlahai ta ding a nih.