Read Hmar DÂN PAHNINA 31 Bible Online

DÂN PAHNINA 31 - Hmar bible

DÂN PAHNINA 31

¹Chun, Mosiein Israel mi po pohai kuomah hieng thu hi a va hril a.

²An kuomah a hril a, “Tuhin chu kum za le sâwmhni ka lo ni ta a; ka suok invâk thei ta naw a; chun, LALPAIN, ‘Hi Jordan vadung hi kân naw ti nih’ a mi ti a.

³LALPA in Pathien chun in hma ṭhuoi a ta, hieng hnamhai hi sukbopêk a ti cheu a, an ram chu hluong in tih; chun, LALPAIN a lo hril ta angin Josua chun in hma ṭhuoi a tih.

⁴LALPAIN Amor mihai lal hai, Sihon le Og le an ram a sukbohmang laia an chunga a thaw ang khan an chungah thâwng a tih.

⁵LALPAIN anni chu inhlân a ti cheu a, thupêk ka pêk cheu po po ang khan an chungah in thaw ding a nih.

⁶Hrâttak le huoitakin um unla, ṭi naw ro, anni chu ṭi bawk naw ro; in kuoma fe ve chu LALPA in Pathien a ni si a; inhlâwsamtir naw ni cheu, mâk khawm mâksan naw tawp a ti cheu,” tiin.

⁷Chun, Mosie chun Josua chu a ko a, Israel mi po pohai mithmuah a kuomah, “Hrâttak le huoitakin um rawh, hieng mihai kuoma hin an pi le puhai LALPAIN inkhâma pêk a lo tiem ta rama chun i fe ve ding a nih, anni hi în hluotir ding a nih.

⁸I hmaṭhuoitu chu LALPA nîng a ta, i kuomah um pei a tih, inhlâwsamtir naw ni che a, mâk khawm mâksan naw tawp a ti che; ṭi naw la, zâm bawk naw rawh,” a ti a.

⁹Chun, Mosie chun chu dân chu a ziek a, LALPA thuthlung bâwm zâwntu Levi naupa, thiempuhai le Israel upahai po po chu a pêk a.

¹⁰Chuongchun, Mosie chun, “Kum sari kum, ngaidam kum taphawta bâwkte ruoiṭhea,

¹¹hmun a la ruot dinga Israel mi po po LALPA in Pathien hmaa an hung inlang pha hi dân hi Israel mi po po hrietah in tiem ding a nih.

¹²Mipuihai, nuhmei, pasal, in nau le tehai, in umpui ram dang mihai, anni chun an ngai a, an inchûk a, LALPA an Pathien chu an ṭi a, hi dân thu po po hi fîmkhurtaka an zâwm theina dingin;

¹³le an nauhai la hrelohai khawma an hriet a, Jordan vadung kaia in va hluo ding rama in um sûng po poa LALPA in Pathien ṭi an inchûk theina dingin ko khâwm hlak ro,” tiin thu a pêk a.

¹⁴LALPA chun Mosie kuomah, “Ngai ta, i thi hun a hung hnai ta a; Josua chu ko la, inbiekna puon ina chun vân lang ro, thu ka pêk ding a nih,” a ta. Mosie le Josua chu an fe a; inbiekna puon ina chun an vân lang a.

¹⁵LALPA chu puon ina chun sûmngîrin a hung inlâr a; chun, sûmngîr chu puon in kawtkhâr lu chunga chun a ngîr a.

¹⁶Chun, LALPAIN Mosie kuomah, “Ngai ta, i pi le puhai kuomah i ininnghil ding a ni ta a, hieng mihai hi tho an ta, an va umna dinghai laia chu rama pathienhai kuoma chun uirêng an ta, mi nghatsan an ta, ka thuthlung an kuoma ka thlung chu bâwsieng an tih.

¹⁷Chu pha chun an chungah ka lung chawk a ta, nghatsan ka ta, inbîksan ka tih, bohmang an ta, thil ṭha naw le lunginzîngna tamtak an chungah tlung a tih; chuongchun, chu ni chun, ‘Ei Pathien eini lai a um naw leiin hieng thil ṭha naw ei chungah a hung tlung a ni naw am a nih?’ tîng an tih,

¹⁸pathien dang tieng nghaa thil ṭha naw an thawhai po po lei chun an kuoma inthawkin kân thup ngei ngei ding a nih.

¹⁹Chuleiin, hla hi in ta dingin ziek la, Israel mihai chu inchûktir rawh; Israel mihai chungchâng thuah hi hla hi a mi hrepuitu a ni theina dingin invawntir rawh.

²⁰An pi le puhai kuoma inkhâma ka tiem, nênetui le khuoizua luong rama chun ka ṭhuoi a, fa le dâwna an um a, an tlaia an hung thâu pha meu chun pathien danghai kuom tieng nghâng an ta, an rawnghai bâwl an ta, mi hmusit an ta, ka thuthlunghai bâwsieng an tih.

²¹Thil ṭha naw le lunginzîngna tamtak an chunga a hung tlung pha chun, hi hla hi ân hrietsuoktirtu nîng a tih; (an thlahai baua inthawkin theinghil thei a ni âwm si naw a); tuta kân khâmna rama ka ṭhuoi hma hrim khawmin an insuongtuo vêl dan chu ka hrietsa zing a nih,” a ti a.

²²Chuongchun, Mosie chun chu hla chu, chu ni la la chun a ziek a, Israel mihai chu ân chûktir a,

²³LALPA chun, Nun naupa, Josua chu ân fui a, “Seltak le huoitakin um rawh khai, Israel mihai chu an kuomah inkhâma ka tiem rama chun i ṭhuoi lût ding a nih; chun, i kuomah um pei ka tih,” a ti a.

²⁴Mosiein hieng dân thuhai hi lekhabua a ziek zo a, zo hieu a hung ni chun,

²⁵thuthlung bâwm zâwntu Levi mihai chu Mosie chun thu a pêk a,

²⁶“Hi dân bu hi la unla, in chungchâng thua hretu dingin LALPA in Pathien thuthlung bâwm sîrah sie ro.

²⁷Hel in chîngzie dâm, in kâwmawzie dâm ka hriet a nih; ngai ta u, tuta ka la dampui lai cheu hmana LALPA chungah in hel hlak a; ka thi hnunga lem chu iengtin takin am a nasa ding chu aw!

²⁸An na hrietah hieng thu hi ka hril a, an chungchâng thua hretu dingin vân le hnuoi ka sâl theina dingin in hnam ṭhuoituhai po po, in hotuhai mi ko khâwmpêk ro.

²⁹Ka thi hnung chun nasatakin insuksieng in ta, ka thupêk cheu lampuia inthawk hin pêthmang in tih ti ka hriet zing a nih; chun, a tâwpa lem chu thil ṭha nawin tlâkbuok a ti cheu a; in kut thilthawa suklungsen dinga LALPA mithmua thil ṭha naw in thaw ding leiin,” tiin.

³⁰Chuongchun, Mosie chun Israel mi pungkhâwmhai po po hrieta chun hi hla hi a tâwp chenin a hril vawng a: