Read Hmar DÂN PAHNINA 6 Bible Online

DÂN PAHNINA 6 - Hmar bible

DÂN PAHNINA 6

¹“Chun, hluo dinga in va kaina rama in zâwm dinga LALPA in Pathienin nangni inchûktir dinga thu a mi pêk, thupêk dâm, thuruot dâm, rorêl dâm chu hieng hi an nih;

²nangni le in naupasalhai, in tupahaiin LALPA in Pathien chu an ṭi a, an dam sûng po poa a thuruothai po po le a thupêk cheu hi in zâwmna ding le in chêng sâwt theina dingin.

³Chuleiin, aw Israel mihai, in tluongtlunga, LALPA, in pi le puhai Pathienin a tiemkam ta cheu angin nênetui le khuoizu luongna rama nasataka in hung pung theina dingin ngai unla, zâwm dingin fîmkhur ro.

⁴“Aw Israel mihai, lo ngai ta u, LALPA ei Pathien chau chu LALPA a nih;

⁵LALPA in Pathien chu in lungril po poin, in lungvar po poin, in hrâtna po poin in hmangai ding a nih.

⁶Chun, hieng thu, vawisûna ka pêk cheu hi in lungrilah châm zing a ta,

⁷in nauhai ṭhahnemngaitakin inchûktir in ta, in ina in ṭhung lai dâm, lampuia in fe lai dâm, in zâl lai dâm, in tho huna khawm in hril hlak ding a nih.

⁸Inchikna dingin in bânah zem in ta, in mit le mit inkâra chalhrênna dingin a um bawk ding a nih.

⁹In in kawtkhâr biengahai, in kawtkhârahai in ziek ding a nih.

¹⁰“Chun, LALPA in Pathienin in pu Abraham hai, Isak hai, Jakob hai kuoma inkhâma a pêk cheu ram, in indin ni dêr lo, khaw ropui le mawitak tak dâm,

¹¹in suksip ni dêr lo, thil ṭha tinrênga sip in dâm, in cho ni dêr lo, tuikhur chosa dâm, in chîng ni dêr lo, grêp huon le Oliv thinghai dâm umnaah a ṭhuoi lût cheu a, in fâk a in tlai hle pha chun,

¹²fîmkhur hle el ro; chuong naw chun, Aigupta rama inthawka suoka inthawka ṭhuoi suoktu cheu LALPA chu theinghil el rawi in tih.

¹³ LALPA in Pathien chu in ṭi ding a na, ama rawng chu bâwl in ta, a hming chau sâlin ṭawng in inkhâm ding a nih.

¹⁴Pathien dang in vêla mihai pathien chu in biek ding a ni nawh.

¹⁵Nangni laia um LALPA in Pathien chu Pathien thîkthusie a nih; LALPA in Pathien lung chu in chungah inthawk a ta, leihnuoia inthawk hin sukbohmang el rawi a ti cheu.

¹⁶“Massaa in fie ang khan LALPA in Pathien chu in fie ding a ni nawh.

¹⁷LALPA in Pathienin a pêk cheu, thupêk dâm, a thuinhriettir dâm, a thuruot dâm, fîmkhurtakin in zâwm ding a nih.

¹⁸LALPA mithmua indik le ṭha chu in thaw ding a nih; in tluongtlung theina ding le LALPAIN in pi le puhai kuoma inkhâma a lo tiem tah ram ṭhatak chu in va hluo theina dinga,

¹⁹in hmêlmahai po po in hmaa hnawt suok dinga LALPAIN a lo hril ta ang khan.

²⁰“Chun, in unauhaiin ‘LALPA ei Pathienin thu a pêk cheu thuinhriettir dâm, thuruot dâm, rorêl dam chu iengtizie am a ni a?’ ti a nakie hun tienga an la hung indawn cheu chun, nangnîn in nauhai kuomah,

²¹‘Aigupta rama Pharao suok ei na, LALPAIN Aiguptaa inthawk chun kut hrâttakin a mi ṭhuoi suok a;

²²chun, LALPAIN ei mithmuah Aigupta ram chunga dâm, Pharao chunga dâm, a sûnghai po po chunga dâm, inchikna le thilmak nasatak le lunginzîng umtakhai ân entir a;

²³eini ruok chu mi pêk dinga ei pi le puhai kuoma ṭawng a lo inkhâmna, chu ram chu a mi pêk theina dingin chutaka inthawk chu a mi ṭhuoi suok a.

²⁴Chuongchun, hieng dânhai po po hi zâwm ding le ei ṭhat zingna dinga LALPA ei Pathien chu ṭi dingin LALPA chun thu a mi pêk a, vawisûn nia anga mi dama a mi hla theina dingin.

²⁵A thu mi pêk anga LALPA hmaa a thupêk po po zâwm dinga ei fîmkhur chun ei ta dingin felna a ni ding a nih,’ in ti ding a nih.