Read Hmar DÂN PAHNINA 8 Bible Online

DÂN PAHNINA 8 - Hmar bible

DÂN PAHNINA 8

¹“Dama in um a, in hung pung pei a, pêk ding cheua in pi le puhai kuoma LALPAIN ṭawng ân khâmna ram chu in va hluo theina dingin thupêk vawisûna ka pêk cheu hi zâwm dingin in fîmkhur ding a nih.

²Chun, a thupêkhai chu in zâwm ding le ding naw, in lungril hrietna dinga fiena ding le inngaitlâwmtir ding cheua thlalêra kum sâwmli a ṭhuoina cheu lampuihai po po kha hre zing ro.

³Mihriem hi bei chauin an hring naw a, LALPA bâua thu tin suokin a nih ti ân hriettir theina ding cheuin a sukhnuoi cheu a, in ṭâm dâm a phal a, in hriet ngai lo, in pi le puhai khawma an hriet ngai lo manna chun a châwm cheu a.

⁴Hieng kum sâwmli sûng hin in silfên chu in sil chulin in hâk chul naw a, in kehai khawm ân vûng naw a.

⁵Miin a nau a thunun hlak angin LALPA in Pathien chun a thunun hlak cheu a nih ti hi in lungrilin hre rân ro.

⁶Chuleiin, a lampui hraw ding le ama chu ṭi dingin LALPA in Pathien thupêkhai chu in zâwm ding a nih.

⁷LALPA in Pathien chun ruom le tlânga inthawka hung suok vadung tui dâm, tuikhur le tui inthûktak umna ram,

⁸bu dâm, buṭei dâm, grêp dâm, theichang dâm, theibufai dâm, umna ram, hriek nei oliv le khuoizu umna ram,

⁹iengkhawm in tlâksam nawna ding, tlasam lova bei in fâkna ding ram, a lunghai chu thîr, a tlânghai chu dârsen cho suok theina ram, ram ṭhataka chun a ṭhuoi lût ding cheu a ni si a.

¹⁰In fâka in tlai hle pha chun, ram ṭhatak a pêk cheu lei chun LALPA in Pathien chu inpâk in tih.

¹¹“A thupêkhai, a thuruothai, a rorêlhai, vawisûna ka pêk cheu hi zâwm lovin LALPA in Pathien chu theinghil khat rawi in tih, fîmkhur ro;

¹²chuong naw chun, in fâk a, in tlai a, in ṭhatak dâm in bâwl a, in hluo pha le,

¹³in ran ruolhai, in berâm ruolhai a hung pung a, in tangka dâm, in rângkachak dâm a hung pung a, in thil neihai po po chu a hung pung pha chun,

¹⁴in lungril hung chapo a ta, suok in nina Aigupta rama inthawka ṭhuoi suoktu cheu LALPA in Pathien chu theinghil hlau rawi in tih.

¹⁵Ama chun thlalêr lientak le rapthlâktak, rûl chukna chi le ainuvêt umna, tui um nawna, ram ṭâwlah a ṭhuoi thleng cheu a; meitâwklung lungpuia inthawk chun tui a suksuokpêk cheu a,

¹⁶in pi le puhai hriet ngailo manna chun a châwm cheu a, tuta hnunga in hung ṭhat theina dingin a sukhnuoi cheu a, a fie theina ding cheuin.

¹⁷Chun, ‘hieng ei sum le paihai hi eini hrâtna le ei kutsuok a nih,’ ti lungril rawi in tih, fîmkhur bawk ro.

¹⁸Tuta a nghet anga in pi le puhai kuoma inkhâmna thu a thlung chu a suknghetna dingin LALPA in Pathien chu hre zing ro, sum le pai themsuok theina petu cheu chu ama chu a ni lem a nih.

¹⁹LALPA in Pathien chu in theinghil a, Pathien danghai in zui a, a rawng dâm in bâwl a, in biek hlau chun, bohmang ngei ngei in tih ti vawisûn hin kân hriettir cheu.

²⁰In hmaa hnam danghai a sukbohmang angin nangni khawm bohmang in tih, LALPA in Pathien râwl chu ngai nuom lo in ni ding a ni leiin.