Read Hmar JOHAN 11 Bible Online

JOHAN 11 - Hmar bible

JOHAN 11

¹Chun, mi pakhat, Mari le a zuorpuinu Martha umna khuo Bethania mi, Lazar damnaw a um a.

²(Mari, hriek rim inhnik Lal chu nâla, a sama a ke hrutu kha, kha minu ṭapa Lazar a nih dam naw chu.)

³Chun, a farnuhaiin Isu kuomah, “Lalpa, ngai ta, i hmangai kha a damnaw ie,” tiin mi an tir a.

⁴Isûn chu chu a hriet a, “Hi natna hi thina ding a ni nawh, Pathien ropuina ding a ni lem, Pathien Naupa chu hi lei hin a la mawina dingin,” a ta.

⁵Chun, Isûn Martha hai, a zuorpuinu hai, Lazar hai a hmangai a.

⁶Chuleiin, a damnaw ti a hrietin a umna ngaiah ni hni a la um ta rawp a.

⁷Chun, chu hnunga chun a închûktirhai kuomah, “Judai ramah fe nâwk ei tiu,” a ta.

⁸Chun, inchûktirhai chun a kuomah, “Rabbi, kha hma el khan Judahaiin lunga dêng an tum che kha; chuong sa sa chun chutaka chun i la fe rawp ding am a nih?” an ta.

⁹Isûn, “Sûnah dârkâr sâwm le pahni a um naw am a nih? Mi sûnah a lêng chun a pêm ngai nawh, hi khawvêl var hi a hmu leiin.

¹⁰Amiruokchu, mi zânah a lêng chun a pêm hlak, amaa chun var a um naw leiin,” a ta, a dawn a.

¹¹Chuong thu chu a hril a; chun, chu hnunga chun an kuomah, “Ei ruolpa Lazar chu a ininnghil ta a; a ininnghil keihar dingin ka fe ding a nih,” a ta.

¹²Chuongchun, inchûktirhai chun a kuomah, “Lalpa a ininnghil a ni chun dam nâwk el a tih,” an ta.

¹³(Isûn a thi thu a hril a nih; nisienlakhawm, anni chun a châwl sûnga a ininnghil thu a hril amanih an ta.)

¹⁴Chuongchun, Isûn fietakin an kuomah a hril a, “Lazar a thi a nih.

¹⁵Chutaka ka um naw chu ka lâwm pêk cheu, in ring theina dingin; nisienlakhawm, a kuomah fêng ei tiu,” a ta.

¹⁶Chun, Thoma[10] (Didum an ti bawk) chun, ân chûktir chanpuihai kuomah, “A thinaa thi ve dingin fe vêng ei tiu,” a ta.

¹⁷Chuongchun, Isûn a tlung chun, ni li thlânah a lo um tah ti a hriet a,

¹⁸Bethani chu Jerusalem kâwl a na, fing sâwmpanga laia hla a nih;

¹⁹chuongchun, an ṭapa thi chunga sukthlamuong dingin Judahai rawi tamtak Martha le Mari kuomah an hung a.

²⁰Martha chun Isu a hung ding a nih ti a hriet phingleh a va tuok a; Mari ruok chu inah a la ṭhung zing a.

²¹Chun, Martha chun Isu kuomah, “Lalpa hitaka um ni la chu, ka ṭapa a thi naw ding bah.

²²Tukhawm hin Pathien kuoma i ngên taphawt chu Pathienin pêng a ti che ti ka hriet,” a ta.

²³Isûn a kuomah, “I ṭapa tho nâwk a tih,” a ta.

²⁴Martha chun a kuomah, “Ni kin nia, thonâwknaa chun thonâwk a tih ti ka hriet,” a ta.

²⁵Chun, Isûn a kuomah, “Kei hi thonâwkna le hringna chu ka nih; tûkhawm a mi ring chu thi sienla khawm hring zing a tih;

²⁶tukhawm a hring taphawt a mi ring chu kumkhuoin thi naw nih; chu thu chu i ring am?” a ta.

²⁷Ama chun a kuomah, “Ring e Lalpa, Krista, Pathien Naupa, khawvêla hung ding chu i ni ti ka ring ie,” a ta.

²⁸Chun, chu thu chu a hril zo phingleh a fe a, a zuorpuinu Mari chu arûkin a va ko a, “Inchûktirtu hitakah a um a, a ko che,” a ta.

²⁹Ama chun chu chu a hriet phingleh a tho vak a, a kuomah a va fe a.

³⁰(Isu chu khuo a la lût naw a, Marthain a va tuok laia, a umna ngaiah a la um a.)

³¹In sûnga a thlamuongtu a umpui Judahai chun, Mari a tho vaka, a suok an hmu phingleh, thlâna ṭap dingin a fe amanih an ta, an zui a.

³²Chun, Mari chun Isu umna chu a va tlung a, a hmu phingleh a ke bulah a bawkkhup a, a kuomah, “Lalpa, hitaka um ni la chu ka ṭapa a thi naw ding bah,” a ta.

³³Isu chun Mari ṭap le a hung zuitu Judahai ṭap chu a hmuin, a lungrilin ân rûm a, a lungngai a.

³⁴“Ama chu khâwlai am in inzâl a?” a ta. Anni chun a kuomah, “Lalpa, hung la, en ta,” an ta.

³⁵Isu a ṭap ta a.

³⁶Chun, Judahai chun, “En ta u, Lazar hi a lo va hmangai de e!” an ta.

³⁷Nisienlakhawm, ṭhenkhat chun, “Hi mitdel mit sukvartu hin, hi mipa khawm hi ân thi naw tir thei naw am a nih?” an ta.

³⁸Chun, Isu chu a lungrilin ân rûm nâwk a, thlân chu a tlung ta a. Chu thlân chu pûk a na, a kawtkhâra chun lung pakhat a um a.

³⁹Isûn, “Lung hi dawm tâwl ro,” a ta. A thipa farnu Martha chun a kuomah, “Lalpa, tuhin chu thu tâng a tih, a thina ni li a ni ta si a,” a ta.

⁴⁰Isûn a kuomah, “I ring chun Pathien ropuizie hmûng i tih, ka ti naw che am a nih?” a ta.

⁴¹Chuongchun, lung chu an dawm tâwl a. Chun, Isu a dâk a, “Pa, ka thu i ngai leiin i chungah ka lâwm ie.

⁴²Kumkhuoin ka thu i ngai hlak ti ka hriet zing a nih; nisienlakhawm, mipui ngîr khup lei hin chu chu ka ti a nih, nangin i mi tir ti an ring theina dingin,” a ta.

⁴³Chun, chuonga a ṭawng zo phingleh râwl inringtakin, “Lazar, hung suok rawh,” a ta, a khêk a.

⁴⁴Mithi chu a kut le a kehai thlân puona tuom pumin a hung suok ta a, a hmai khawm puona tuom a nih. Isûn an kuomah, “Sût unla, infetir ro,” a ta.

⁴⁵Chuleichun, Mari lêngpuitu Isu thilthaw hmu Juda mi tamtakin Isu an ring ta a.

⁴⁶Nisienlakhawm, a ṭhen Pharisaihai kuomah an va fe a, an kuomah Isu thilthawhai chu an hril a.

⁴⁷Chuongchun, thiempu lalhai le Pharisaihai chun rorêltuhai an ko khâwm a, “Iengtin am thâwng ei ta? Hi mipa hin thilmak tamtak a thaw si a.

⁴⁸Hieng anga ei thlathlam el chun mi po poin ama ring an ta; chun, Roma mihai hung an ta, ei hmun le ei chihai hi mi lâkpêk an tih,” an ta.

⁴⁹Chun, anni laia mi pakhat, Kaiapha, chu kuma Thiempu Laltak chun an kuomah, “Nangnîn iengkhawm in hriet dêr nawh.

⁵⁰Ei hnam pumpui bohmang nawna dingin, mipui aia mi pakhat thi ei ta dingin a ṭhalem ti in hriet phak naw a nih,” a ta.

⁵¹(Chu thu chu ama phuokfâwmin a hril nawh, chu kum chun Thiempu Laltak a na, an chihai nêka Isu a thi ding thu a hril lâwk a ni lem.

⁵²Chuhai chihai ai chau chun a ni nawh, Pathien nau khawvêla indarhai po po pâwl khata a ṭhuoi khâwmna dingin a ni bawk.)

⁵³Chuongchun, chu ni chena inthawk chu ama sukhlum dingin an inrâwn rawp a.

⁵⁴Chuleiin, Isu chu Judahai lai ân langin a lêng nâwk ta naw a, chutaka inthawkin thlalêr dep tienga khaw pakhat Ephraim an tia chun a va fe ta lem a; chutaka chun inchûktirhai leh an um ta zing a.

⁵⁵Chun, Judahai Fekân Ruoiṭhe chu a hnai ta a, mi tamtak inthien dingin rama inthawk, Fekân Ruoiṭhe hma chun, Jerusalemah an hang fe a.

⁵⁶Chuongchun, Isu an zawng a, Pathien biekinah ngir pumin an inbiek a, “Ieng am in ring a? Ruoiṭhenaah hung naw ni maw?” an in ti a.

⁵⁷Thiempu Lalhai le Pharisaihaiin ama chu an man theina dingin tûkhawmin a umna an hriet chun phuong ding a nih ti thu an pêk ta si a.