Read Hmar JOHAN 13 Bible Online

JOHAN 13 - Hmar bible

JOHAN 13

¹Chun, Fekân Ruoiṭhe hmain Isûn hi khawvêl hi suok sana, Pa kuoma a fe hun a tlung tah ti a hriet a. Amaa mi khawvêla um a hmangai hlakhai chu, a tâwp chen khawmin a hmangai zing a.

²Chun, zânbu fâk laiin, (chu hma khawm chun diebolin Simon naupa Iskariot Juda chu Isu inmantir dingin ân lungriltir a,)

³Isûn Pain a kuta thil iengkim ân kawltir dâm, Pathien kuoma inthawka hung suok a ni dâm, Pathien kuoma a fe ding dâm hre zingin,

⁴a zânbu awt chu a tho a, a puonhai a sie a, inhrûkna puon a lâk a, a dierkei a.

⁵Chun, maihûnah tui a sung a, inchûktirhai ke a sâwp a, inhrûkna puon a dierkei chun a hrûk pei a.

⁶Chuongchun, Simon Peter kuomah a hung a. Peter chun, “Lalpa, nang êmin ka ke i sâwp ding am a nih?” a ta.

⁷Isûn a kuomah, “Ka thilthaw hi tuhin i hriet nawh; nisienlakhawm, nakie tieng la hrieng i tih,” a ta, a dawn a.

⁸Peterin a kuomah, “Ka ke sâwp naw tawp i tih!” a ta; Isûn a kuomah, “Ka sâwp naw che chun ka kuomah iengkhawm chan nei naw ti nih,” a ta.

⁹Simon Peter chun a kuomah, “Lalpa, chuong a ni chun, ka ke chau ni lovin, ka kut le ka lu khawm tie,” a ta.

¹⁰Isûn a kuomah, “Insil ta chu a ke naw chu sâwp a ngai nawh, a fai deh annâwm; nangni in fai, in rêng ruok chun ni lovin,” a ta.

¹¹(Ân mantirtu ding chu a hriet si a; chuleiin, “In rêngin in fai nawh,” a ti a nih.)

¹²Chuongchun, an ke a sâwp a, a puonhai a lâk a, a ṭhung nâwk chun an kuomah, “In chunga ka thilthaw hi ieng thawna am a na, in hriet am?

¹³Nangnîn Inchûktirtu le Lalpa in mi ti hlak; in ti indik hle, ka ni ngei hrim a.

¹⁴Kei Lalpa le Inchûktirtu hmanin in ke ka sâwp chun, nangni khawmin in ke in insâwppêk ding a nih.

¹⁵In chunga ka thaw ang hin nangni khawmin in thaw vena dingin ka sukhmu cheu a ni si a.

¹⁶Titakzetin, titakzetin ka hril cheu hi, suok a pu nêkin a ropui nawh; tirko khawm a tirtu nêkin a ropui bawk nawh.

¹⁷Chuong thil chu in hriet chun, thaw unla, hamṭhâng in tih.

¹⁸In rênga thu ka hril nawh; ka ithlang hai chu ka hriet, nisienlakhawm, chu chu, ‘Ka bei fatu chun, A kekhawng chu ka chungah ân let tah,’ ti Pathien Lekha Thu kha a hung tlung theina dingin a nih.

¹⁹Hi hi a hung tlung hmain tuhin ka hril cheu hi, a hung tlung phaleh, kei kha ka nih ti in ring theina dingin.

²⁰Titakzetin, titakzetin ka hril cheu hi, tûkhawm ka itir taphawt lâwm chu, keima mi lâwm a nih; tûkhawm kei mi lâwm chu a mi tirtu lâwm a nih,” a ta.

²¹Isûn chuong anga a hril zo chun, a lungrilin a lunginzîng a, “Titakzetin, titakzetin ka hril cheu hi, nangni laia mi pakhatin mîn mantir a tih,” a ta, ân hriettir ta a.

²²Chun, inchûktirhai chun a ti bîk an hriet naw a, an inen tâwl a.

²³Chun, a închûktirhai laia pakhat, Isûn a ihmangai chu, Isu hnai takah ama innghâiin a ṭhung a.

²⁴Chun, Simon Peterin ama kuoma chun, “Tu thu tak am a na a hril, indawn ta,” tiin zaizirin a biek a.

²⁵Ama chu a umna ngaiah a um a, Isu âwm hnengin a hung thle a, a kuomah, “Lalpa, tu tak am a na?” a ta.

²⁶Chun, Isûn “Bei hlek inchiepêk ka ta, ka ipêk chu nîng a tih,” a ta, a dawn a. Chuongchun, bei hlek chu ân chie hnungin a lâk a, Iskariot Simon naupa Juda kuoma chun a pêk a.

²⁷Chun, bei hlek chu a pêk hnungin a sûngah Setan chu a lût nghâl ta a. Chuongchun, Isûn a kuomah, “I thaw ding chu thaw vak rawh,” a ta.

²⁸(Chun, dawkân kiltuhai tukhawmin iengtiziea ti am a ni an hriet naw a.

²⁹Ṭhenkhatin “Juda chun tangka ip a kawl leiin, Isûn ‘Ruoiṭhenaa ding thil ei mamawhai inchaw rawh,’ a ti amanih, ‘Pasiehai kuoma iengkhat pêk ding,’ a ti amanih,” an ti a nih.)

³⁰Chun, ama chun bei hlek chu a lâk a, a suok nghâl ta a; chu lai hun chu zân a nih.

³¹Chuongchun, a suok hnung chun Isûn a hril a, “Tuhin chu Mihriem Naupa chawimawiin a um tah, ama leiin Pathien khawm chawimawiin a um a nih.

³²Pathien chu amaah chawimawiin a um chun, Pathien khawmin amaa chun ama chu chawimawi a tih, chawimawi nghâl a tih.

³³Nauhai, sâwt nawtê in kuomah ka la um hri hi, nangnîn mi zawng in ta; chun, Judahai kuoma, ‘Ka fena dingah hung thei naw ti niu,’ ti ka hril ang khan, tuhin chuong ang bawk chun in kuomah ka hril hi.

³⁴“Thupêk thar ka pêk cheu hi, inhmangai tuo unla; keiin ka hmangai ang cheu hin, nangni khawm inhmangai tuo ro.

³⁵In inhmangai tuo chun mi po poin ka închûktirhai in ni ti chutaka chun hrieng an tih,” a ta.

³⁶Simon Peterin a kuomah, “Lalpa, khâwlai am i fe ding a na?” a ta. Isûn, “Ka fena dingah nangnîn tuhin mi zui thei naw ti niu; nakie pha ruok chu mi zui in tih,” a ta, a dawn a.

³⁷Peterin a kuomah, “Lalpa, iengdingin am tu khawm hin zui thei nâwng ka ti che a? Nangma leiin ka hringna pêng ka tih,” a ta.

³⁸Isûn, “Keima leiin i hringna i pêk ding maw? Titakzetin, ka hril che hi, nangin vawi thum i mîn phat hmakhat chu âr khuong naw ni.