Read Hmar JOHAN 14 Bible Online

JOHAN 14 - Hmar bible

JOHAN 14

¹“In lungril lunginzîng naw raw se; Pathien in ring, kei khawm mi ring ve ro.

²Ka Pa inah umna tamtak a um a, a um naw chun ka hril ta ding cheu a nih; in ta dingin hmun siemin ka fe ding a nih.

³Chun, in ta dinga hmun ka hang siem chun hung kîr nâwk ka ta, ka kuomah lâng ka ti cheu; ka umnaah nangni khawm in um theina dingin.

⁴Ka fena ding a lampui chin in hriet ie,” a ta.

⁵Thoma’n a kuomah, “Lalpa, i fena ding chin kan hriet naw annaw, a lampui iengtin am hrieng kan ta?” a ta.

⁶Isûn a kuomah, “Kei hi lampui le thutak le hringna ka nih; keimaa fe naw chu tukhawm Pa kuom an tlung ngai nawh.

⁷Kei mi hrie ni unla chu, ka Pa khawm in hriet ta ding bah; tuta inthawk chu ama in hriet tah, ama in hmu ta bawk,” a ta.

⁸Philipin a kuomah, “Lalpa, Pa chu keini mîn hmutir ta la, chuongchun, kan ta dingin hun a tih,” a ta.

⁹Isûn a kuomah, “Philip, hi chen rau hi in kuomah ka um a, chuong khawm chun in mi la hriet naw ta rawp maw? Tûkhawm a mi hmu chu Pa hmu a nih. ‘Pa chu mîn hmutir rawh,’ ieng ti tia ti am i na?

¹⁰Kei Paa ka um le, Pa keimaah a um ti in awi naw a ni? In kuoma thu ka hril hi keia phuokfâwmin ka hril nawh; Pa keimaah a um zing a, a thil a thaw lem hlak a nih.

¹¹Kei Paa ka um le keimaa Pa a um ti hi mi ring ro; annawleh, thilthaw lei bêk hin mi ring ro.

¹²Titakzetin, ka hril cheu hi, tûkhawmin a mi ring chun thil ka thawhai hi ama khawmin thaw vêng a tih; hienghai nêka thil ropui lemhai khawm la thawng a tih, Pa kuoma ka fe ding leiin.

¹³Chun, keia hminga iengkhawm in hni taphawt chu, thaw pei ka tih, Pa, Naupa leia chawimawia a um theina dingin.

¹⁴Nangnîn keia hmingin iengkhawm in mi hni chun, chu chu thaw pei ka tih.

¹⁵“Nangnîn in mi hmangai chun, ka thupêkhai chu zâwm in tih.

¹⁶Chun, Pa hnîng ka ta, ama chun Thlamuongtu dang pêng a ti cheu, chatuona in kuoma um dingin;

¹⁷chu chu Thlarau indiktak a nih; khawvêlin chu chu an nei thei nawh, ama an hmu naw a, an hriet bawk naw leiin. Nangnîn ama chu in hriet, in kuomah a um zing lei le, nangniah a um ding leiin.

¹⁸Fahrain mâksan naw ning cheu; in kuomah hung nâwk ka tih.

¹⁹Sâwt nawtê hnungah khawvêlin mi hmu nâwk ta naw ni, nisienlakhawm, nangni chun mi hmûng in tih; kei ka hring leiin nangni khawm hring in tih.

²⁰Chu nia chun kei ka Paa ka um dâm, nangni keimaa in um dâm, kei nangnia ka um dâm hre tâng in tih.

²¹Tukhawm ka thupêkhai nei a, zâwm chu a mi hmangaitu a nih; tûkhawm a mi hmangai chu, ka Pain hmangai a tih, kei khawmin ama chu hmangai ka tih, a kuomah inlâr rawp ka tih,” a ta.

²²Chun, Juda (Iskariot naw lem) chun a kuomah, “Lalpa, keini kuomah inlâr i ta, khawvêl kuoma în lâr naw ding chu iengdinga?” a ta.

²³Isûn a dawn a, a kuomah, “Mîn a mi hmangai chun ka thu zâwm a ta; ka Pain ama chu hmangai a ta, a kuomah hung kan ta, a kuomah um zing kan tih.

²⁴Tûkhawm a mi hmangai naw chun ka thu a zâwm nawh, thu in hriethai hi ka ta a ni nawh, Pa a mi tirtu ta a ni lem.

²⁵In kuoma ka la um sûng hin hieng thu hi ka hril cheu hi.

²⁶Chun, Thlamuongtu, Thlarau Inthieng, Pain ka hminga a hung tir ding khan, ama chun iengkim inchûktir a ti cheu a, in kuoma ka hril po po kha inhriet suoktir nâwk a ti cheu.

²⁷“Thlamuongna ka mâk pêk cheu hi; keima thlamuongna ka pêk cheu a; khawvêlin a pêk ang cheuin ka pêk naw cheu hi. In lungril lunginzîng naw raw se, ṭi khawm ṭi naw raw se.

²⁸‘Ka fe hmang ding a na, in kuomah hung nâwk ka tih’, ka tizie cheu kha in hriet tah. Nangnîn mi hmangai ni unla Pa kuoma ka fe ding a ni leiin in lâwm ding a nih; Pa chu keia nêkin a ropui lem si a.

²⁹Tuhin a hung tlung hma hin ka hril ta cheu hi, a hung tlung phaa in ringna dingin.

³⁰In kuomah thu hril nâwk mang ta naw ning, khawvêl lal a hung ding a ni si a, ama chun keimaah iengkhawm a nei nawh,

³¹nisienlakhawm, keiin Pa ka hmangai le, Pain thu a mi pêk ang peiin thil ka thaw ti khawvêlin an hrietna ding a ni hi. Tho ro, hitaka hi suok ei tiu.