Read Hmar JOHAN 15 Bible Online

JOHAN 15 - Hmar bible

JOHAN 15

¹“Kei grêp hrui tak tak ka nih, Ka Pa a huon enkawltu a nih.

²Ka zawmpui kâu ra naw taphawt chu a peihâwn hlak; a ra taphawt chu a sukthieng hlak, a ra tam nâwk zuolna dingin.

³In kuoma ka thu hril lei chun tu khawm hin in inthieng ta pang a nih.

⁴Keimaah um zing ro, kei khawm nangniah um zing ka tih. Kâu chu grêp hruiah a um zing naw chun a khâtin a ra thei naw ang bawkin, nangni khawm keimaah in um zing naw chun ra thei naw ti niu.

⁵Kei grêp hrui chu ka nih, nangni a kâuhai chu in nih, tûkhawm keimaa a um zing a, kei khawm amaa ka um zingna chu, ama chu tamtakin a ra hlak; ka ṭhang naw chun iengkhawm in thaw thei si nawh.

⁶Mi keimaah a um zing naw chun kâu anga peihâwnin a um a, a vuoi hlak; chun, an inkhâwm a, meiah an pei a, a kâng hlak.

⁷Nangni keimaa in um zing a, ka thu nangnia a um zing chun, in dit dit hni ro, in ta dingin thawin um pei a tih.

⁸Hi hi leiin ka Pa chu chawimawiin a um hlak, tamtaka in ra hin; chuongchun, ka închûktirhai nîng in tih.

⁹“Pain a mi hmangai ang bawkin kei khawmin ka hmangai cheu hi; ka ihmangaiin um zing ro.

¹⁰Nangnîn ka thupêkhai in zâwm chun ka ihmangaiin um zing in tih; keiin ka Pa thupêkhai ka zâwm a, a ihmangaia ka um zing ang bawk hin.

¹¹Ka lâwm nangnia a um zingna ding le, in lâwm a kimna dingin hieng thu hi in kuomah ka hril hi.

¹²Hi hi ka thupêk a nih, keiin ka hmangai cheu ang bawkin, nangni inhmangai unla.

¹³Mihriemin a ruol ta dinga a hringna a pêk nêka hmangaina nasa lem tukhawmin an nei nawh.

¹⁴Thu ka pêk taphawt cheu in thaw chun, ka ruolhai nîng in tih.

¹⁵Suok ti nâwk ta naw ning cheu; a pu thilthaw suok chun a hriet si nawh; ruolhai ka ti ta lem cheu a nih. Pa kuoma inthawka thil ka hriet po po in kuomah ka puong ta si a.

¹⁶Nangnîn in mi thlang naw a, keiin ka thlang lem cheu a nih. Fea, ra insuo ding le in ra chu um zing dingin ka ruot cheu a nih, ka hminga Pa kuoma in hni taphawt a pêk theina ding cheuin.

¹⁷In inhmangai theina dingin hieng thu hi ka pêk cheu a nih.

¹⁸“Khawvêlin a theida cheu chun, a theida hma cheu khawmin kei a mi theida tah ti hre ro.

¹⁹Nangni khawvêla mi ni unla, khawvêlin amaa mi a hmangai ding bah; khawvêla mi in ni si naw a, khawvêla inthawka ka thlang suok lem cheu leiin, khawvêlin a theida cheu a nih.

²⁰‘Suok a pu nêkin a ropui nawh,’ ti thu ka hril ta cheu kha hre zing ro. Annîn kei an mi suknawmna ta chun, nangni khawm suknawmnâng an ti cheu; ka thu an zâwm ta chun nangni thu khawm zâwm an tih.

²¹Nisienlakhawm, hieng thil po po hi ka hming leiin in chungah thâwng an tih, keia mi tirtu an hriet naw leiin.

²²Kei hungin an kuomah thu hril naw lang chu suol an nei naw ding bah; tu ruok hin chu an suolnaah suonlam ding an nei ta naw a nih.

²³Tûkhawm kei mi theida chun ka Pa khawm a theida a nih.

²⁴Mi dang tukhawm la thaw ngailo thilhai anni lai thaw ni naw lang chu, suol an nei naw ding bah. Nisienlakhawm, tuhin chu an hmu ta a, chuongsa khawm chun kei le ka Pa an mi theida ve ve tah a nih.

²⁵Ieng khawm ni sien, an Dân Lekhabuah, ‘Annîn a san bovin an mi theida,’ ti thu ziek kha, a hung tlungna dingin an thaw a ni hi.

²⁶“Chun, ka Pa kuoma inthawka Thlamuongtu in kuoma ka hung tir ding, Paa suok Thlarau indiktak chu, a hung tlung pha, ama chun ka thu inhriettir a tih;

²⁷nangni khawmin inhriettir bawk in tih, a tîra inthawk ka kuoma in um leiin.