Read Hmar JOHAN 16 Bible Online

JOHAN 16 - Hmar bible

JOHAN 16

¹“Sukthlûka in um nawna dingin hieng thu hi in kuomah ka hril ta hi.

²Inkhâwmna inahai inhnawngtir an ti cheu a, anih, tûkhawm a sukhlumtuhai cheu chun Pathien chungah thilṭha thawin inhrieng an tih, chuong ang hun chu a tlung ding a nih.

³Chuong thil chu thâwng an tih, Pa le kei an mi hriet naw leiin.

⁴Hieng thu hi in kuomah ka hril ta hi, a hun chu a hung tlung pha, ka hril ta cheu ti in hriet nâwkna dingin. Hieng thil hi a tîra inthawk ka la hril naw hrim cheu a nih, in kuoma ka la um leiin.

⁵Tu ruok hin chu a mi tirtu kuomah ka fe ding a nih, nangni rawi tukhawmin, ‘Khâwlai am i fe ding?’ tiin in mîn dawn si nawh.

⁶Nisienlakhawm, hieng thu hi in kuomah ka hril leiin in lungril chu lungngaiin a sip ṭeu lem ta a.

⁷“Nisienlakhawm, thu indiktak ka hril cheu hi, ka fe in ta dingin a ṭha; ka fe naw chun Thlamuongtu chu in kuomah a hung naw ding a ni si a; kei ka fe ruok chun in kuomah hung tir ka tih.

⁸Ama chu a hung tlung chun suol thua dâm, fel thua dâm, rorêl thua dâm khawvêl an thiemnaw inhriettir a tih;

⁹suol thua dâm thiemnaw chang an tih, kei an mi ring naw leiin,

¹⁰fel thua dâm thiemnaw chang an tih, Pa kuomah ka fe ding a na, nangnîn in mi hmu nâwk ta naw ding lei hin;

¹¹rorêl thua dâm thiemnaw chang an tih, hi khawvêl lal hi inthiemlova a tlûk ta leiin.

¹²“In kuomah thu hril ding tamtak ka la nei ta rawp a; nisienlakhawm, tuhin chu tlin hri naw ti niu.

¹³Nisienlakhawm, ama Thlarau indiktak chu a hung tlung pha chun, thutak po poa chun ṭhuoi lût a ti cheu a, ama phuok fâwmin thu a hril âwm si naw a, thu a idawng taphawt chu hril lem a tih; thil hung tlung dinghai khawm inhriettir a ti cheu.

¹⁴Ama chun kei mi chawimawi a tih, ka taa mi lâng a ta, in kuomah ân hriettir ding cheu a ni si a.

¹⁵Pain thil a nei po po ka ta a nih; chuleiin, ‘ka taa mi lâng a ta, in kuomah inhriettir a ti cheu,’ ka ti hi.

¹⁶“Sâwt nawtêah nangnîn kei mi hmu naw ti niu a, sâwt nawtêa bawk nangnîn kei mi hmu nâwk in tih,” a ta.

¹⁷Chun, a închûktirhai ṭhenkhatin, “Ei kuoma a thu hril hi ieng am a na? ‘Sâwt nawtêah nangnîn kei mi hmu naw ti niu a, sâwt nawtêa bawk nangnîn kei mi hmu nâwk in tih,’ a ti le, ‘Pa kuoma ka fe ding leiin,’ a ti hi,” an in ti a.

¹⁸Chun, anni ma chun, “Hi hi ieng am a na? ‘Sâwt nawtê,’ a ti hi. A thu hril hi a ngaina ei hriet nawh,” an ta.

¹⁹Chun, ama indawn an nuom ti Isûn a hriet a, an kuomah, “ ‘Sâwt nawtêah nangnîn kei mi hmu naw ti niu, sâwt nawtêa bawk nangnîn kei mi hmu nâwk in tih,’ tia hi ka thu hril hi in indawn maw?

²⁰Titakzetin, ka hril cheu hi, nangni in mitthli tlâng a ta, ṭap rak bawk in ta, khawvêl ruok chu lâwm an tih, nangni lungngai in ta, nisienlakhawm, in lungngai chu lâwmin inchang a tih.

²¹Nuhmeiin nauha ân vawiin a lungngai hlak, a hun a tlung ta leiin, nisienlakhawm, nau a hung nei phing chun a thlaphâng chu a hriet nâwk ta ngai nawh, khawvêla mihriem hung pieng chu a lâwm leiin.

²²Chun, tuhin nangni in lungngai, nisienlakhawm, hmu nâwk ka ti cheu a, in lungril lâwm a tih, in lâwm chu tukhawmin lâkpêk naw ni hai cheu.

²³Chu ni chun nangnîn kei iengkhawm mîn dawn naw ti niu. Titakzetin, titakzetin ka hril cheu hi, Pa kuomah in hni taphawt chu ka hmingin pêng a ti cheu.[12]

²⁴Tu chen hin keia hmingin iengkhawm in la hni nawh; hni ro, chuongchun hmûng in tih, in lâwm a kimna dingin.

²⁵“Chuong thu chu a thawiin in kuomah ka hril tah; a hun a tlung ding a nih, chu pha chun a thawiin in kuomah thu hril nâwk ta naw ning a, fietakin Pa chanchin hril lem ka ti cheu.

²⁶Chu ni chun keia hmingin thil hnîng in ta, chun, ‘Pa kuomah keiin ngên pêk ka ti cheu,’ ka ti naw cheu a,

²⁷Pa ngeiin a hmangai si cheu a, nangnîn kei in mi hmangai a, Pathiena suok ka nih ti in ring leiin.

²⁸Kei Pa kuoma inthawka hung suok a, khawvêla hung ka nih; khawvêl fe san a, Pa kuoma fe nâwk ding ka nih,” a ta.

²⁹A închûktirhaiin, “Ngai ta, tuhin chu fietakin thu i hril a, a thawi hrim hrimin i hril ta naw hi.

³⁰Nangin iengkim i hriet a, tukhawm indawn che i ngai nawh ti tuhin kan hriet tah; hi hi lei hin Pathien kuoma hung suok i ni ti kan awi ie,” an ta.

³¹Chun, Isûn a dawn a, an kuomah, “Tuhin chu in awi ta maw?

³²Ngai ro, a hun a tlung ding a ni tah, anih, a tlung zing tah, chu pha chun, mâni in sengah indar vawng in tih, keia khât chauin mi thlâthlam in tih; nisienlakhawm, Pa ka kuoma a um leiin makhât chauin ka um si nawh.

³³Hieng thu hi in kuomah ka hril ta hi, keimaa in thlamuongna dingin. Khawvêla hin rinumin in um hlak; nisienlakhawm, thlamuongtakin um ro, keiin khawvêl ka hne tah,” a ta.