Read Hmar JOHAN 17 Bible Online

JOHAN 17 - Hmar bible

JOHAN 17

¹Chuong thu chu Isûn a hril a; chun vântieng nghain, “Pa, a hun a tlung tah; i Naupa chawimawi rawh, Naupa hin a chawimawina ding chein;

²khânga mi po po chunga thuneia i siem khan, a kuoma i pêkhai po chu chatuona hringna a pêk theina dingin.

³Hi hi chatuona hringna a nih: nang Pathien tak chau le i tir Isu Krista hriet hi.

⁴Nangin thil thaw ding i mi pêk kha ka thaw zo ta a, khawvêla hin ka chawimawi ta che.

⁵Aw Pa, khawvêl um hmaa i kuoma mawina ka inei khan, tuhin nangma kuoma ngei mi chawimawi rawh.

⁶“Nangin khawvêla inthawka mî i mi pêkhai kuoma khan i hming ka suklang tah. Anni chu i ta an ni tah, nangin anni chu kei i mi pêk ta a, anni chun i thu an zâwm tah:

⁷Nangin thil i mi pêk po po, i kuoma inthawka suok an nih ti tuhin an hriet tah.

⁸Nangin thu i mi pêkhai kha an kuoma ka pêk ta si a; chuong chu an vawn a, i kuoma inthawka suok ka nih ti indiktakin an hriet tah, nangin i mi tir ti khawm an awi tah.

⁹“An ta dinga ka ngênpêk hi, khawvêl ta dinga ngênpêk ka ni nawh; nangin i mi pêkhai ta ding lemin a nih; i ta an ni si.

¹⁰Thil po po ka ta taphawt chu i ta a nih, i ta chu ka ta a nih; anni leiin chawimawiin ka um hlak.

¹¹Chun, kei chu khawvêlah um ta naw ning, hienghai hi chu khawvêlah um an tih, kei chu i kuomah ka hung ding a ni tah. Pa Inthieng, anni chu I hmingin hum rawh, I hming mi pêk khan, eini ang bawka pumkhat an ni theina dingin.

¹²“An kuomah ka um sûng khan, anni chu i hmingin ka hum hlak, i hming mi pêk khan,[13] anni chu ka vêng a, anni lai pakhat khawm an bohmang nawh, bohmang naupa naw kha chu; Lekha thu kha a hung tlungna dingin.

¹³Nisienlakhawm, tuhin i kuomah ka hung ding a ni tah; khawvêlah hieng thu hi ka hril a nih, ka lâwm annia an nei kimna dingin.

¹⁴I thu an kuomah ka pêk tah; chun, khawvêlin anni chu an theida a, khawvêla mi an ni naw leiin, kei khawvêla mi ka ni naw ang bawkin.

¹⁵“Anni chu khawvêla inthawka la suok dinga ngen che ka ni naw a, mi suol laka hum dingin ka ngên lem che a nih.

¹⁶Anni chu khawvêla mi an ni nawh, kei khawvêla mi ka ni naw ang bawk hin.

¹⁷Anni chu thutakin sukthieng rawh, i thu chu thutak a nih.

¹⁸Nangin khawvêla kei i mi tir ang khan, kei khawmin anni chu khawvêlah ka tir hi.

¹⁹Anni leiin kân sukthieng a nih, anni khawm thutaka an inthieng theina dingin.

²⁰“Hienghai ta ding chau hin ngên pêk ka ni nawh, an thu leia kei mi la hung ring dinghai ta ding khawma ngênpêk ka ni bawk ie, an rênga pumkhat an nina dingin;

²¹Pa, nang keimaa i um le, kei nangmaa ka um ang bawk hin, anni khawm einia an umna dingin: nangin i mi tir ti khawvêlin an awi theina dingin.

²²Chun, nangin ropuina i mi pêk kha keiin an kuomah ka pêk tah; anni chu pumkhat an nina dingin, eini pumkhat ei ni ang bawk hin;

²³kei anniah, nang keimaah, anni pumkhata an um a, an famkim theina dingin, nangin kei i mi tir ti le, i mi hmangai angin anni hi i hmangai ti, khawvêlin an hriet theina dingin.

²⁴Pa, nangin kei i mi pêkhai hi ka umnaah ka kuoma um dingin ka dit; nangin i mi pêk ka ropuina kha an hmuna dingin; leihnuoi insieng hma khawmin nangin i mi hmangai ta si a.

²⁵Aw Pa feltak, khawvêl chun an hriet naw che a, kei ruok chun ka hriet che kha, hienghai khawm hin nangin kei i mi tir ti an hriet kha.

²⁶Chun, an kuomah i hming kân hriettir a, inhriettir nâwk rawp ka tih; nangin kei i mi hmangaina kha anniah a um a, kei khawm annia ka um theina dingin,” a ta.