Read Hmar JOHAN 18 Bible Online

JOHAN 18 - Hmar bible

JOHAN 18

¹Isûn chuong thu chu a hril zoin, a închûktirhai leh an suok a, Kidron vadung an kai a. Chutaka chun huon a um a, chutaka chun an lût a, ama le a închûktirhai leh.

²Chun, ân mantirtu ding Juda khawm chun chu hmun chu a hriet; Isu a închûktirhai leh chutaka chun a lêng rawp leiin.

³Chuongchun, Juda chun sipai pâwl leh, thiempu lalhai le Pharisaihai kuoma um manmihai leh a ṭhuoi a, khâwnvarhai, meiserhai, hriemhai chawiin chutaka chun an hung a.

⁴Isûn a chunga thil tlung ding po po chu a hriet zing a, a va suok a, an kuomah, “Tu am in zawng a?” a ta.

⁵Anni chun a kuomah, “Nazareth Isu,” an ta, an dawn a. Isûn an kuomah, “Kei hi ka nih,” a ta. Chun, ân mantirtu Juda khawm chu anni lai a ngîr a.

⁶Isûn, “Kei hi ka nih,” a ti phingleh, hnungtieng an intâwl a, hnuoiah an tlu tâwl a.

⁷Isu chun an kuomah, “Tu am in zawng a?” a ti nâwk a. Anni chun, “Nazareth Isu,” an ta.

⁸Chun, Isûn, “Kei hi ka nih ti ka hril cheu annâwm, nangnîn kei in mi zawng chun, hienghai hi inthla ṭha ro,” a ta, a dawn a.

⁹(A thu hril, “Nangin kei i mi pêkhai pakhat khawm kân hmang nawh,” a ti kha a tlungna dingin.)

¹⁰Chun, Simon Peterin kâwlhnâm a kawl a, a phawi a, Thiempu Laltak suok a sât a, a nakâwr changtieng a sât thlâkpêk a. Suokpa hming chu Malka a nih.

¹¹Chuongchun, Isûn Peter kuomah, “Kâwlhnâm kha a bâwmah thun rawh; Pain no, kei a mi pêk hi ka dâwn naw ding am a nih?” a ta.

¹²Chuongchun, sipai pâwl leh, an hotu laltak leh, Judahai manmihai le chun Isu an man a, an khuop a,

¹³Ana kuomah an ṭhuoi hmasa a, Kaiapha tarpupa a ni leiin, Kaiapha chu, chu kum chun Thiempu Laltak a nih.

¹⁴Kaiapha chu, “Mi po po aia mi pakhat thi a ṭha,” tia Judahai rawtpuitu kha a nih.

¹⁵Chun, Simon Peterin Isu a zui a, a închûktir dang pakhat leh. Chu inchûktir chu Thiempu Laltak hmêlhriet a na, Thiempu Laltak in inhuon sûng tuolah Isu kuomah a lût ve a,

¹⁶nisienlakhawm, Peter chu tuolah kawtkhâr bulah a ngir zing a. Chuongchun, inchûktir dang, Thiempu Laltak hmêlhriet chu, a va suok a, kawtkhâr vêngtu a biek a, Peter a ṭhuoi lût a.

¹⁷Chun, kawtkhâr vêngtu nunghâk chun Peter kuomah, “Nang khawm hi mipa inchûktir laia ṭhang ve i ni maw?” a ta. Ama chun, “Ka ni nawh,” a ta.

¹⁸Chun, suokhai le manmihai chu chutaka chun an ngîr tâwl a, a dei leiin meihawlin mei an sêm a, a lum an awi a, Peter khawm anni lai a ṭhang a, ngîr pumin mei lum a awi ve a.

¹⁹Chun, Thiempu Laltak chun Isu chu a inchûktirhai chanchin le a închûktirzie chanchin ân dawn a.

²⁰Isûn a dawn a, a kuomah, “Khawvêl kuomah, tlâng hrietah thu ka hril hlak kha; inkhâwmna in le, Pathien biekin, Juda po po um khâwmnaahai chun, kân chûktir rawp hlak kha, iengkhawm arûkin ka hril nawh.

²¹Iengdinga kei i mîn dawn am? An kuomah ka thu hrilzie chu ka thu hretuhai indawn rawh; ngai rawh, chuonghai chun ka thu hril chu an hriet annâwm,” a ta.

²²Chu chu a hril phingleh, a kâwla ngîr manmi pakhatin Isu a ben a, “Thiempu Laltak hieng ang hin i dawn maw?” a ta.

²³Isûn a kuomah, “Thu suol ka hril leh, ka suolna mîn hriettir rawh, nisienlakhawm, thu ṭha ka hril khawmin iengdinga i mi ben am?” a ta, a dawn a.

²⁴Chun, Ana chun khuop pumin Thiempu Laltak Kaiapha kuomah a tir a.

²⁵Chun, Simon Peterin ngîrin mei lum a awi a. Chun, “Nang khawm a inchûktir laia ṭhang ve i ni maw?” an ta. Ama chun, “Ka ni nawh,” tiin ân pha a.

²⁶Chun, Thiempu Laltak suok pakhat, Peterin a nakâwr a sât thlâk pêkpa laibungpa chun, “A kuomah huona khan ka hmu naw che am a nih?” a ta.

²⁷Chuongchun, Peter ân pha nâwk a, âr a khuong ta a.

²⁸Chun, Isu chu Kaiapha ina inthawk chun lal inah an ṭhuoi nâwk a. Zingkâr a na; chun anni chu lal inah an lût nawh, chuong naw chun, inthieng naw nîng an ta, Fekân Ruoiṭhe fa thei naw ni hai.

²⁹Chun, Pilat an kuomah a va suok a, an kuomah, “Hi mipa chunga hin thupawi ieng am in nei a?” a ta.

³⁰Anni chun a kuomah, “Hi mipa hi mi suol ni naw sien chu i kuomah hung ṭhuoi naw ning ungah,” an ta, an dawn a.

³¹Pilat chun an kuomah, “Nangnîn ṭhuoi unla, in dân angin a thu rêl ro,” a ta. Judahai chun a kuomah, “Keini thu chun tukhawm sukhlum dân a ni nawh,” an ta.

³²(A thizie ding thu, Isûn a hril anga, a tlungna dingin).

³³Chuongchun, Pilat chu a inah a lût nâwk a. Isu a ko a, a kuomah, “Judahai lal i ni maw?” a ta.

³⁴Isûn “Hihi nanga lungril puoksuoka i hril am a ni, mi dangin an hril che, ka chunga thu hi?” a ta, a dawn a.

³⁵Pilatin, “Kei Juda am ka nih? nangma chihai le thiempu lalhaiin ka kuomah an hung ṭhuoi che a ni hi, thil ieng am i thaw hrim leh?” a ta, a dawn a.

³⁶Isûn, “Ka ram chu hi khawvêla mi hi a ni nawh; ka ram chu hi khawvêla mi hi ni sienla, ka rawihaiin thâwng an tih, Judahai laia pêka ka um nawna dingin; nisienlakhawm, ka ram chu hitaka mi hi a ni nawh,” a ta, a dawn a.

³⁷Chun, Pilatin a kuomah, “Chu lal i ni am a nih?” a ta. Isûn, “Lal ka nizie i hril zing chu. Thutak inhriettir hi ka pieng san le khawvêla ka hung san a nih. Tukhawm thutaka mi taphawt chun ka thu an pawm hlak,” a ta.

³⁸Pilatin a kuomah, “Thutak chu ieng am a na?” a ta. Chun, chu thu chu a hril phingleh, Judahai kuomah a va suok nâwk a, an kuomah, “Iengkhawm a suol ka hmu nawh.

³⁹Nisienlakhawm, Fekân Ruoiṭheah mi pakhat kân suopêk ding cheuin dân in nei; chuongchun, Judahai lal hi insuopêk lang cheu in nuom am?” a ta.

⁴⁰Chun, anni chu an khêk nâwk a, “Hi mipa hi chu ni naw raw se, Barabba kha ni lem raw se,” an ta. Barabba chu suomhmang a nih.