Read Hmar JOHAN 19 Bible Online

JOHAN 19 - Hmar bible

JOHAN 19

¹Chun, chuong lai chun Pilatin Isu a ṭhuoi a, a vuok a.

²Chun, sipaihai chun hling lukhum an phier a, an inkhumtir a, puon sen duk an insiltir bawk a,

³chun, a kuomah an hung a, “Chibai, Judahai Lal,” an ta, an ben a.

⁴Pilat chu a suok nâwk a, an kuomah, “En ta u, iengkhawm a suol ka hmu nawh ti in hrietna dingin in kuomah ka hung ṭhuoi suok hi,” a ta.

⁵Chun, Isu chu hling lukhum le puon sen duk chu sil pumin a hung suok a. Chun, Pilatin an kuomah, “En ta u, mihriempa hi,” a ta.

⁶Chun, thiempu lalhai le manmihai chun ama an hmu phingleh an khêk a, “Krawsah hemde rawh, krawsah hemde rawh,” an ta. Pilatin an kuomah, “Nangnîn fepui unla, krawsah hemde ro; kei chu ieng khawm a suolna ka hmu si nawh,” a ta.

⁷Judahai chun a kuomah, “Kan dân kawng khat a um, chu dân ang peiin Pathien Naua ân siem leiin, a thi ding a nih,” an ta, an dawn a.

⁸Pilatin chu thu chu a hrietin a ṭi nâwk zuol a;

⁹a inah a lût nâwk a, Isu kuomah, “Khâwtienga mi am I ni a?” a ta. Nisienlakhawm, Isûn a dawn nawh.

¹⁰Chun, Pilatin a kuomah, “Nangin kei i mi biek naw vei maw? Inthla thei che ka nih, krawsa hemde thei che ka nih ti i hriet naw am a nih?” a ta.

¹¹Isûn, “Chungtienga inthawka pêk i ni naw chun, ka chunga hin thaw thei hrim hrim nei naw ti ni; chuleiin, i kuoma mi petu khan suol a phur zuol a nih,” a ta.

¹²Chun, chu chena inthawk chu Pilatin inthla a tum a, nisienlakhawm, Judahai an khêk a, “Hi mipa hi în thla chun Kaisar ruolpa ni naw ti ni, tûkhawm lala insiem taphawt chu Kaisar do an nih,” an ta.

¹³Chun, Pilatin chuong thu chu a hriet phingleh Isu a ṭhuoi suok a, a hming Lungrem, Hebrai ṭawng chun Gabbatha an ta, chu hmuna chun rorêlna ṭhungphaah a ṭhung a.

¹⁴(Chun, chu ni chu Fekân Ruoiṭhe Inringlâwk ni a nih, nisa inding vêl a nih.) Chun, ama chun Judahai kuomah, “En ta u, in Lal hi,” a ta.

¹⁵Chun, anni chu an khêk a, “Sukbohmang rawh, sukbohmang rawh, krawsah hemde rawh,” an ta. Pilatin an kuomah, “In lal hi krawsah hemdêng ka ti maw?” a ta. Thiempu Lalhaiin, “Kaisar naw chu lal dang kan nei nawh,” an ta, an dawn a.

¹⁶Chuongchun, Pilatin krawsa hemde dingin ama chu an kuomah a pêk ta a.

¹⁷Chuongchun, Isu chu an ṭhuoi ta a. Ama chun mâni ta dinga kraws putin, “Lu ru hmun,” an ti, Hebrai ṭawng chun Golgotha an ti, chu hmun chen chun a va suok a.

¹⁸Chutaka chun ama chu krawsah an hemde a, mi dang pahni khawm krawsah an hemde bawk a, a sîr tuokah pakhat ve vein, a laiah Isu.

¹⁹Chun, Pilatin lekha a ziek a, kraws lêr tieng a bel a, “NAZARETH ISU JUDAHAI LAL,” tiin ziek a nih.

²⁰Chu lekha chu Judahai tamtakin an tiem a; Isu krawsa an hemdena hmun chu khawpui kâwl a na, Hebrai ṭawng dâm, Latin ṭawng[14] dâm, Grik ṭawng dâmin ziek a nih.

²¹Chuongchun, Judahai thiempu lalhai chun, Pilat kuomah “ ‘Judahai Lal,’ tiin ziek naw la, ‘Judahai Lal ka nih a tih,’ tiin ziek lem rawh,” an ta.

²²Pilat chun, “Ka ziek kha ka ziek zo tah,” a ta, a dawn a.

²³Chun, sipaihaiin Isu chu krawsa an hemde zo chun, a silfênhai an lâk a, phêk liin an siem a, sipaihaiin phêk khatin an chang seng a; a zakuo an lâk bawk a. Zakuo chu ṭhuilo zakuo a na, a rînga inthawka a puma khâwng vawng a nih.

²⁴Chuleiin, anni chun, “Kei thlêr nâwng ei tiu, tu ta tak ding am a na, ṭhum vâwr lem ei tiu,” an in ti a, Pathien Lekha Thu, “Ka silfênhai an insem a, Ka zakuo dingin ṭhum an vâwr a,” ti a tlungna dingin. Chuong thil chu sipaihaiin an thaw a nih.

²⁵Chun, Isu kraws kâwlah a nu le a nu zuorpuinu Mari, Kleopa nuhmei, le Mari Magdalin an ngîr a.

²⁶Chun, Isûn a nu le a inchûktir a ihmangai kha a kâwla ngir a hmu a, a nu kuomah, “Nuhmei, en ta, i naupa kha!” a ta.

²⁷Chun, inchûktir kuoma khawm chun, “En ta, i nu kha!” a ta. Chun, chu chena inthawk chu, chu inchûktir chun amanu chu a inah a ṭhuoi ta a.

²⁸Chu hnunga chun Isûn thil iengkim tuhin a kim tah ti a hriet a, Pathien Lekha Thu kha a tlungna dingin, “Ka dang a châr ie,” a ta.

²⁹Chutaka chun bêl pakhat uoin thûra sip an intung a, chuongchun sponj pakhat chu uoin thûra inchie sipin husop hmawlah an târ a, a hmûr an hang intlun a.

³⁰Chun, Isûn uoin thûr chu a lo dâwn zo chun, “A kin tah,” a ta. A lu a kûn a, a thlarau ân thla ta a.

³¹Chun, Inringlâwk ni a ni leiin, ruonghai chu Châwlnia krawsa a um zing nawna dingin, (chu Châwlni chu ni ropui a ni si a,) Judahaiin Pilat kuomah an kehai suktlieka, an ruong fepui dingin an ngên a.

³²Chun, sipaihai chu an hung a, a kuoma krawsa an hemde a tawntira mi le mi dang chu an kehai an suktliek a.

³³Nisienlakhawm, Isu kuomah an hung a, a thi ta zing ti an hriet a, a kehai an suktliek ve naw a.

³⁴Nisienlakhawm, sipaihai laia mi pakhatin a nâkah feiin a sun a, chuongchun, thisen le tui a suok nghâl ta a.

³⁵A hmutu chun ân hriettir tah (a thu inhriettir chu ân dik a nih, a hril indik ti khawm a hriet,) nangni khawmin in ringna dingin.

³⁶Pathien Lekha Thu, “A ru pakhat khawm suktliek ni naw ni,” ti a tlungna dingin chuong thil chu a hung um tah a nih.

³⁷Chun, Pathien Lekha Thu dangin “An isun ngei chu la en an tih,” a ti bawk a.

³⁸Chun, chuong thil thaw zo chun, Josef Arimathai khuoa mi, Isu inchûktir a nih, nisienlakhawm, Judahai a ṭi leiin a rûka um a na, ama chun Isu ruong chu fepui dingin Pilat kuomah a hni a, chun Pilatin a phal a. Chuongchun, a hung a, a ruong chu a fepui ta a.

³⁹Chun, Nikodem, (a tîra zâna a kuoma hung khan,) murra le aloe inpawlsa bûk sâwmnga lai chawiin a hung ve a.

⁴⁰Chun, Isu ruong chu an lâk a, Judahai inphûm dân angin thil rim inhnikhai le chun puon zai inhmiin an tuom a.

⁴¹Chun, krawsa an hemdena hmuna chun huon pakhat a um a, huona chun tukhawm lân zâlna ngainaw thlân thar pakhat a um.

⁴²Chun, Judahai Inringlâwk ni a ni leiin, thlân chu an kâwl el a ni si a, chutaka chun Isu chu an inzâl ta a.