Read Hmar JOHAN 4 Bible Online

JOHAN 4 - Hmar bible

JOHAN 4

¹Chun, Isûn Johan nêkin inchûktir tam lem a siem le a baptis ti Pharisaihaiin an hriet ti Lalpa chun a hriet phingleh,

²(nisienlakhawm, Isu meu chun a baptis naw a, a închûktirhaiin an baptis lem hlak),

³Judai ram chu a fe san a, Galili ramah a fe ta a.

⁴Chuongchun, Samari ram a fe thleng ding a na.

⁵Chuongchun, Samari ram khaw pakhat, Sukar an ti chu a hung tlung a, Jakobin a nau Josef kuoma hmun a ipêk kâwl kha.

⁶Jakob tuisunsuo khawm kha chutaka chun a um. Chuongchun, Isu chu a fe sâwl leiin tuisunsuo sîra chun a ṭhung chawt a; sûn bufâk pha a nih.

⁷Samari nuhmei pakhat tui chawi dingin a hung a, Isûn a kuomah, “Dâwn ding mi pe rawh,” a ta.

⁸(A închûktirhai hlak chu fâk ding inchaw dingin khuoah an fe ta si a.)

⁹Chuongchun, Samari nuhmei chun a kuomah, “Nang Juda mi i na, kei Samari nuhmei ka ni si a, iengtizie am a na, ka kuoma dâwn ding i hnih?” a ta. (Judahaiin Samari mihai ieng khawm an inṭâwmpui ngai si nawh.)

¹⁰Chun, Isûn a dawn a, a kuomah, “Pathien thilpêk le, ‘Dâwn ding mi pe rawh,’ i kuoma titu hi hre la chu nangin a kuomah i hni lem ding a nih; chun, ama chun tui hring a pêk ding che a nih,” a ta.

¹¹Chun, nuhmei chun a kuomah, “Pu, khaina iengkhawm i nei si naw a, tuisunsuo ân thûk vei leh, khâwlaia inthawkin am tui hring chu i hmu a?

¹²Kan pu Jakob nêkin i ropui lem am a nih? Ama chun hi tuisunsuo hi a mi pêk a, ama khawmin a dâwn a, a nauhai le a ranhai leh,” a ta.

¹³Chun, Isûn a dawn a, a kuomah, “Tûkhawm hi tui dâwn taphawt chu an dang châr nâwk a tih;

¹⁴tûkhawm an kuoma ka pêk ding tui dâwn taphawt ruok chu, kumkhuoin dangchâr naw ni hai, keiin an kuoma tui ka pêk ding chu, an sûngah tuihnâr hung um a ta, chatuona hringna chenin inchik dawk a tih,” a ta.

¹⁵Chun, nuhmei chun a kuomah, “Pu, chu tui chu mi pe rawh, ka dangchâr nawna ding le hi chen chena tui chawi dinga ka hung nawna dingin,” a ta.

¹⁶Chun, Isûn a kuomah, “I pasal va ko la, hitakah hung nâwk rawh,” a ta.

¹⁷Chun, nuhmei chun a kuomah, “Pasal ka nei le,” a ta, a dawn a. Isûn a kuomah, “Pasal ka nei le, i ti hi i ti dik ie;

¹⁸pasal panga i nei tah, tuta mi i nei hi i pasal a ni naw hrim a nih, hi thu hi i ti dik ie,” a ta.

¹⁹Nuhmei chun a kuomah, “Pu, zâwlnei i nih ti ka hriet tah.

²⁰Keini thlatuhai chun hi tlânga hin Pathien chibai an bûk hlak; nisienlakhawm, nangni chun, ‘Mihriemin Pathien chibai an bûkna hmun ding chu Jerusalemah a um,’ in ti hlak,” a ta.

²¹Chun, Isûn a kuomah, “Nuhmei, ka thu awi rawh, hi tlânga kher naw khawm, Jerusalema kher naw khawm, Pathien chibai in bûk hun a tlung ding a ni tah.

²²Nangnîn in hriet naw chibai in bûk hlak, keini chun chu kan ihriet chu chibai kan bûk hlak. Sandamna Judahaia inthawkin a hung suok ding a ni si a.

²³Chuongchun, a hun a tlung ding a ni tah, tu khawm hin a tlung zing tah, chu pha chun Pathien chibai bûktu taktakhaiin thlarau le titaktakin Pa chibai bûk an tih, Pa chun chuong ang mi chu ama chibai bûktu dingin a zawng a nih.

²⁴Pathien chu Thlarau a nih; ama chibai bûktuhaiin thlarau le titaktakin chibai an bûk ding a nih,” a ta.

²⁵Chun, nuhmei chun a kuomah, “Messie, Krista an ti chu a hung ding a nih ti ka hriet a, ama chu a hung phaleh iengkim mi la hril a tih,” a ta.

²⁶Chun, Isûn a kuomah, “Kei a betu che hi ama chu ka ni annâwm,” a ta.

²⁷Chuong lai chun a închûktirhai chu an hung a, nuhmei a biek chu mak an ti hle a; nisienlakhawm, tukhawmin, “Ieng am i zawng? Iengdinga nuhmei i biek am?” khawm an ti nawh.

²⁸Chun, nuhmei chun a tuibêl a mâksan a, khuoah a fe a, mihai kuomah,

²⁹“Ka thilthaw taphawt mi hril peitu mi pakhat a um a, hung unla, en ta u, Krista a ni thei âwm am?” a ta.

³⁰Chun, anni chu khuoa inthawk chun an hung suok a, a kuom tieng an pan ta a.

³¹Chu kâr chun inchûktirhai chun a kuomah, “Inchûktirtu, fa rawh,” an lo ti an lo ti a.

³²Nisienlakhawm, ama chun an kuomah, “Bu in hriet naw fâk ding ka nei,” a ta.

³³Chun, inchûktirhai chu an inbiek a, “A fâk ding miin an hung chawipêk am a ni aw,” an in ti a.

³⁴Chun, Isûn an kuomah a hril a, “A mi tirtu dit zâwng thaw le, a sin thaw zo ding hi ka bu a nih.

³⁵Nangnîn, ‘Bu sîkna ding thla li a la um,’ in ti a ni naw am a ni? Ngai ro, ka hril cheu hi, dâk unla, lohai en ro, tuta inthawkin sîk dingin a hmin a nih.

³⁶A sîktu chun hlaw a hmu hlak a, chatuona hringna chena um dingin ra a sîk hlak, a tutu le a sîktu an lâwm rêl theina dingin.

³⁷‘Pakhatin a tu a, mi dangin a sîk hlak,’ ti thu hi, chutaka chun ân dik hle a nih.

³⁸In inrimpui naw sîk dingin ka tir cheu hi; mi dangin a thaw a, nangnîn a thawsa chu in sunzawm a nih,” a ta.

³⁹Chun, nuhmei chun, “Ka thil- thaw po a mi hril pei,” tia ân hriettirna thu lei khan, chu khuoa um Samari mi tamtakin Isu an ring ta a.

⁴⁰Chuongchun, Samari mihai chu Isu kuomah an hung a, an kuoma um dingin an ngên an ngên a; chuongchun, chutaka chun ni hni a châm a.

⁴¹Chun, mi dang tamtakin ama thu leiin an ring ve ta a.

⁴²Chun, anni chun, nuhmei kuoma chun, “Tu zet hin chu i thu hril leia ring kan ni ta nawh; keini ngeiin a thu hril kan hriet ta a, hi mipa hi khawvêl Sandamtu a ni ngei ti kan hriet tah,” an ta.

⁴³Chun, chu ni hni hnunga chun chutaka inthawkin a suok a, Galili ramah a fe ta a.

⁴⁴Isu ngeiin, zâwlnei chu ama khuo tieng chun chawimawiin a um ngai nawh ti ân hriettir hlak si a.

⁴⁵Chuongchun, Galili ram a hung tlungin Galili rama mihaiin an lo lâwm a, Jerusalema ruoiṭhe laia a thilthaw po po an hmu lei khan; anni khawm chu ruoiṭhenaa chun an fe ve si a.

⁴⁶Chun, Galili rama Kana khuo, tui uoina ân changtirna kha a hung tlung nâwk a. Chun, upa tû amanih a um a, a naupa Kapernaumah a damnaw a.

⁴⁷Chun, Isu Judai rama inthawkin Galili ramah a hung ti a hriet phingleh a hang fe a, a naupa zu sukdam dingin a ngên a, a thi vâng vâng si a.

⁴⁸Isûn a kuomah, “Inchiknahai le thilmakhai in hmu naw chun ring tawp naw ti niu,” a ta.

⁴⁹Chun, upa chun a kuomah, “Pu, ka nau thi hmain hung thla ta la,” a ta.

⁵⁰Isûn a kuomah, “Fe nâwk el ta rawh, i naupa chu a dam ta ie,” a ta. Ama chun Isûn a kuoma thu a hril chu a ring a, a fe ta a.

⁵¹Chun, a fe thlâk lai zingin a suokhaiin ama an lo tuok a, “I naupa chu a dam tah,” an lo ti a.

⁵²Ama chun an kuomah a dam phut hun lai ân dawn a. Anni chun a kuomah, “Zâni nisa inhêm chau khan a khawsik a bo tah a nih,” an ta.

⁵³Chuongchun, a pain Isûn a kuoma, “I naupa chu a dam tah ie,” a ti lai tak chu a nih, ti a hriet ta a; chun, ama le a sûnghaiin an rêngin an ring ta a.

⁵⁴Chu chu Isu Judai rama inthawka Galili rama a hung hnunga a thilmak thaw vawi hnina a nih.