Read Hmar JOHAN 5 Bible Online

JOHAN 5 - Hmar bible

JOHAN 5

¹Chuong thil hnunga chun Judahai ruoiṭhe pakhat a um a; Isu Jerusalemah a hang fe a.

²Chun, Jerusalema chun berâm kawtkhâr kâwlah dîl a um a, chu chu Hebrai ṭawngin Bethesda[5] an ti a, tuolpûk panga a nei a.

³Chuonga chun damnawhai, mitdelhai, ke inbaihai, zenghai tamtak an zâl tâwl a, [tui infâwn hun an nghâk a.

⁴Akâr po leh dîla chun vântirko a zu fe a, tui chu a sukfâwn hlak a; mi tukhawm ieng ang natna nei khawm ni hai sien, tuifâwn zu pal hmasatak taphawt chu an dam pei hlak si a.][6]

⁵Chutaka chun, kum sâwm thum pariet natna nei mi tu amanih a um a.

⁶Isûn a zâl chu a hmu a, chuong ang chun sâwttak a um tah ti a hriet a, a kuomah, “Sukdam i nuom am?” a ta.

⁷Chun, damnaw chun, “Pu, tui a hung fâwn pha dîla mi sietu ding ka nei naw a, ka fe sûngin mi dangin an mi fe khêl nâwk hlak,” a ta, a dawn a.

⁸Chun, Isûn a kuomah, “Tho la, i puonpha la la, kein lâwn ta rawh,” a ta.

⁹Chun, kârlovin ama chu a dam nghâl ta a, a puonpha a lâk a, a fe ta a. Chu ni chu Châwlni a nih.

¹⁰Chuongchun, Judahaiin sukdama um kuoma chun, “Châwlni a ni hi, i puonpha i lâk a thieng nawh,” an ta.

¹¹Ama chun an kuomah, “A mi sukdamtu ngeiin ka kuomah, ‘I puonpha la la, kein lâwn ta rawh,’ a mi ti a nih,” a ta, a dawn a.

¹²Anni chun a kuomah, “ ‘I puon- pha la la, kein lâwn ta rawh,’ titu che chu tu am a na?” an ta, an indawn a.

¹³Nisienlakhawm, sukdama um chun tû a ni a hriet naw a, chutaka chun mipui an um leiin Isu a fe hmang ta si a.

¹⁴A nakie chun ama chu Isûn Pathien biekinah a hmu a, a kuomah, “Ngai rawh, i dam ta hi, thil suksuol nâwk ta naw rawh, chuongnaw chun, thil ṭha naw nâwk zuol i chungah hung um rawi a tih,” a ta.

¹⁵Chun, ama chu a va fe a, Judahai kuoma chun, ama sukdamtu chu Isu a nih ti a hril a.

¹⁶Chuongchun, Châwlnia chuong thilhai chu a thaw leiin Judahaiin Isu an suknawmna ta a.

¹⁷Nisienlakhawm, Isûn anni chu a biek a, an kuomah, “Ka Pain tu chen khawmin sin a thaw hlak, kei khawmin ka thaw hlak,” a ta.

¹⁸Chun, Judahaiin sukhlum an tum nâwk zuol a, Châwlni a bawsiet lei chau khawm a ni naw a, Pathien ama paah ân bûk a, Pathien tluka ân siem lei khawmin a nih.

¹⁹Chun, Isûn an kuomah, “Titakzetin, titakzetin ka hril cheu hi, Naupa hin a khâtin iengkhawm a thaw thei nawh, Pa thilthaw a hmu chau naw chu; thil a thaw ang taphawt chu Naupa khawmin a thaw ve hlak.

²⁰Pain Naupa a hmangai a, a thilthaw taphawt a kuomah ân entir hlak; hieng nêka thil ropui lem hi a kuomah lân entir a tih, mak in ti dingin.

²¹Pain mithihai a keithoa a sukhring hlak angin, Naupa khawm- in a nuom nuom a sukhring hlak.

²²Pain tû thu khawm a rêlpêk ngai nawh, thu po po Naupa ân rêltir lem a;

²³mi po poin Pa an inza angin Naupa khawm an inzana dingin. Tûkhawm Naupa inza naw chu Pa, ama tirtu inza naw a nih.

²⁴“Titakzetin, titakzetin ka hril cheu hi, tûkhawm ka thu hrea a mi tirtu ring chun chatuona hringna a nei tah, inthiemlovin a um naw a, thinaa inthawkin a suok a, hringnaah a lût lem ta a nih.

²⁵Titakzetin, titakzetin ka hril cheu hi, a hun a tlung ding a ni tah, tu khawm hin a tlung zing tah, chu pha chun mithihaiin Pathien Naupa râwl hrieng an ta, a hre taphawt hring an tih.

²⁶Pa chun mânia hringna a nei ang bawkin, Naupa mânia hringna neiin a siem;

²⁷chun, Mihriem Naupa a ni leiin a kuomah rorêl ding thu a pêk.

²⁸Hieng hi mak ti naw ro, a hun a tlung ding a ni tah, chu pha chun thlâna um po poin a râwl hrieng an ta,

²⁹suok vawng an tih; thil ṭha thawtuhai chu hringna changin tho nâwk an ta, thil suol thawtuhai chu inthiemnawna changin tho nâwk an tih.

³⁰“Keia khâtin iengkhawm ka thaw thei nawh; naa ka hriet ang peiin ro ka rêl hlak; ka rorêl chu indiktak a nih, keia thu thuin um ka tum naw a, a mi tirtu thu thua um ka tum lem hlak leiin.

³¹Mâni chanchin inhriettir lang, ka thu inhriettir indik naw ni.

³²Ka chanchin inhriettirtu chu mi dang a nih; ama chun ka chanchin ân hriettir chu ân dik ti ka hriet.

³³“Nangnîn Johan kuomah mi in tir a, ama chun, thutak chanchin a lo inhriettir kha;

³⁴Thu inhriettir ka ipawm ruok chu mihriem thu a ni nawh, nisienlakhawm, in damna dingin hieng thu hi ka hril a ni hi.

³⁵Chu Johan chu khâwnvar chawktak le var tak a nih, a varah lân sukhlim in nuom kha.

³⁶“Nisienlakhawm, inhriettirna ka nei hi Johan inhriettirna nêk khan a ropui lem a nih; Pain thil thaw zo dinga a mi pêk, ka thilthaw ngei hin Pain a mi tir a ni ti ka chanchin ân hriettir a nih.

³⁷Pa a mi tirtu khawm chun ka chanchin ân hriettir tah. Nangnîn iengtik khawm a râwl in hriet ngai nawh, a hmêl khawm in hmu ngai nawh.

³⁸A thu khawm in lungrilah in pai zing ngai nawh; a itir hi in ring naw leiin.

³⁹Pathien Lekha in tiem ngun hlak a, a sûnga chatuona hringna um dinga in ring leiin; chuong Lekha chu ka chanchin inhriettirna chu a ni si a.

⁴⁰Nisienlakhawm, hringna nei dingin ka kuomah in hung nuom si nawh.

⁴¹“Mihriem ichawimawina ka pawm nawh.

⁴²Nangni ka hriet cheu, Pathien hmangaina in lungrilah in nei nawh ie.

⁴³Ka Pa hmingin ka hung a, nangnîn in mi lâwm si nawh; mi dang mâni hmingin hung sienla, ama chu lâwm in tih.

⁴⁴“Nangni inchawimawituo lâwmhai, iengtin am ring thei in ta? Pathien tak chaua suok chawimawina chu in zawng si nawh.

⁴⁵Keiin Pa kuoma ka hêk cheu ring naw ro, nangni hêktu cheu chu pakhat a um, in iring Mosie hi.

⁴⁶Mosie in ring chun, kei khawm mi ring ve ding in nih; ama chun keia chanchin in sawnnaw a ziek.

⁴⁷Nisienlakhawm, a thu ziek chu in ring si naw chun, iengtin am ka thu ring in ta?” a ta.