Read Hmar JOHAN 6 Bible Online

JOHAN 6 - Hmar bible

JOHAN 6

¹Chuong thil hnunga chun Isu chu Galili dîl, Tiberi dîl an ti râlkhing tieng chun a fe ta a.

²Chun, damnaw chunga thilmak a thawhai chu an hmu leiin mipui tamtakin ama an zui a.

³Chun, Isu chu tlânga chun a hang fe a, chutaka chun a închûktirhai lai a ṭhung a.

⁴Fekân Ruoiṭhe (Judahai Ruoiṭhe chu) a hnai ta a.

⁵Chun, Isu a dâk a, mipui tamtakin a kuom tieng hung panin a hmu a, Philip kuomah, “Hienghai fâk ding bei khâwlai am inchâwng ei ta?” a ta.

⁶Chuong thu chu ama infiena dingin a hril a nih; a thaw ding chu amân a hriet zing si a.

⁷Philip chun a kuomah, “Mi tinin tlâwmtêa an chang seng ding khawm bei duli[7] za hni manin dai naw ni,” a ta, a dawn a.

⁸Chun, a închûktirhai laia mi pakhat Simon Peter unau Andri chun a kuomah,

⁹“Buṭei[8] beiphêk panga le nga pahni nei pasaltê pakhat hitaka hin a um; nisienlakhawm, mi hieng zozai lai hin chu chu ieng khawp am nîng a ta?” a ta.

¹⁰Chun, Isûn “Mihai chu inṭhungtir ro,” a ta. Chu hmuna chun hlobet tamtak a um a. Chuongchun, patlinghai chu an ṭhung a; an tamzie chu sâng nga lai an nih.

¹¹Chun, Isûn beiphêkhai chu a lâk a, lâwmthu a hril zoin a ṭhunghai lai chun a sem a, chuong ang bawkin ngahai khawm chu an dit tâwkin a sem bawk a.

¹²Chun, an khawp hnungin, a inchûktirhai kuoma chun, “Ieng khawm inhmang lo dingin a mahla nawihai kha rût ro,” a ta.

¹³Chuongchun, an rût a, buṭei beiphêk panga fatuhai fâk mahla chun bâwm sâwm le pahni an suksip a.

¹⁴Chun, mihai chun thilmak a thaw chu an hmu phingleh, “Hi mipa hi zâwlnei, khawvêla hung ding kha a ni ngei hi,” an ta.

¹⁵Chuongchun, ama chu lala siem dinga man el tumin an hung ding a nih ti Isûn a hriet a, tlângah ama khât chauin a tumin a fe nâwk ta a.

¹⁶Chun, khuo a hung inhnu chun, a închûktirhai chu dîla chun an zu fe a.

¹⁷Lawngah an chuong a, dîla chun Kapernaum an pan a. Khuo a hung inthim ta a, Isu hlak chu an kuom a la tlung si nawh.

¹⁸Thlipui nasatak a hrâng leiin tui chu a fâwn insâng deu deu a.

¹⁹Chun, fîng sâwmhni panga amanih, fîng sâwmthum amanih an kar chun, Isu chu dîl chunga chun kea lâwna, lawng hung hnaiin an hmu a, an ṭi a.

²⁰Nisienlakhawm, ama chun an kuomah, “Kei ka nih annâwm, ṭi naw ro,” a ta.

²¹Chuongchun, lawnga chun inchuongtir an nuom ta a; chun, kârlovin lawng chun an pan khawmuol chu a tlung nghâl ta a.

²²A zînga chun dîl râl khing tienga mipui ngîrhai chun, lawng pakhat naw chu lawng dang a um naw a, Isu chu a închûktirhai lai lawnga chun a chuong ve naw a, a închûktirhai anni khât chauin an fe ti an hriet a.

²³(Nisienlakhawm, Lalpain lâwm- thu a hril hnunga, bei an fâkna hmun kâwla khan Tiberi khuoa inthawkin lawng chînhai a hung tlung si a).

²⁴Chuongchun, mipui chun Isu le a închûktirhai chu an um ta nawh ti an hrietin, anni khawm lawng chînhaia chun an chuong a, Isu zawngin Kapernaum an hung tlung a.

²⁵Chun, dîl râla an hung hmu chun a kuomah, “Rabbi, iengtik am hi tieng i lo tlung a?” an ti a.

²⁶Isûn an kuomah, “Titakzetin, titakzetin ka hril cheu hi, thilmakhai in hmu leia mi zawng in ni naw a, bei in fâk khawp leia mi zawng in ni lem hi.

²⁷Bu bohmang nâwk el hlak zawng hin inlap rak rak naw ro, chatuona hringna chena um zing ding bu, Mihriem Naupain a pêk ding cheu chu zawng lem ro; Pa Pathien chun ama chu ân chik ta si a,” a ta, a dawn a

²⁸Chun, anni chun a kuomah, “Pathien sin kan thaw theina dingin ieng am thâwng kan ta?” an ta.

²⁹Isu chun an kuomah, “Pathien sin thaw chu hi hi a nih, a mi tir hi ring unla,” a ta, a dawn a.

³⁰Anni chun a kuomah, “Inchikna ieng am thâwng i ta, kan hmua kan ring theina ding chein? Thil ieng am thâwng i ta?

³¹Kan thlatuhaiin thlalêrah manna kha an fâk hlak, ‘Vâna inthawk chun an kuomah bei fâk ding a pêk,’ ti ziek ang khan,” an ta.

³²Chun, Isûn an kuomah, “titakzetin ka hril cheu hi, vâna inthawka bei in hmu kha Mosie pêk cheu a ni nawh, ka Pa ruok chun vâna inthawkin bei tak tak a pêk cheu a ni hi.

³³Pathien bei chu vâna inthawka hung ṭuma, khawvêl kuoma hringna petu hi a nih,” a ta.

³⁴Chun, anni chun a kuomah, “Lalpa, chu bei chu kumkhuoin mi pe rawh,” an ta.

³⁵Chun, Isûn an kuomah, “Kei hi hringna bei chu ka nih, tûkhawm ka kuoma hung chu phîngṭâm naw ni, tûkhawm a mi ring chu iengtika khawm dangchâr naw ni.

³⁶Nisienlakhawm, nangnîn in mi hmu khawma in mi ring si nawh ti ka hril cheu kha.

³⁷Pain a mi pêkhai po po ka kuomah hung vawng an tih; tûkhawm ka kuoma hung chu hnawt suok naw tawp ka tih.

³⁸Mâni nuom zâwng thaw dinga vâna inthawka hung ka ni naw a, a mi tirtu dit zâwng thaw dinga hung ṭum ka ni lem.

³⁹Hi hi a mi tirtu dit zâwng chu a nih, amân a mi pêk po po iengkhawm inhmang naw lang, ni kin nia chun keitho lem lang.

⁴⁰Chun, hi hi ka Pa dit zâwng a nih, tûkhawm Nau hmua ring taphawt chun chatuona hringna nei sienla; chun, keiin ni kin nia chun ama chu kei tho lang,” a ta.

⁴¹Chun, “Vâna inthawka bei hung ṭum chu ka nih,” a ti leiin, Judahai chu a chungah an chier a.

⁴²“Hi mipa hi Josef nau Isu a ni naw am a nih? A nu le Pa khawm ei hriet hi. ‘Vâna inthawka hung ṭum ka nih,’ iengti tia ti am a ni leh?” an ta.

⁴³Chun, Isûn an kuomah, “Chier chier naw ro.

⁴⁴Pa a mi tirtuin a hîp naw chun tukhawm ka kuomah hung thei naw ni hai; chun, keiin ni kin nia chun a hung chu keitho ka tih.

⁴⁵Zâwlneihai Lekhabuah, ‘Pathien inchûktirin um vawng an tih,’ ti ziek a nih. Mi tin Pa thu hrea inchûk taphawt chu ka kuomah an hung hlak.

⁴⁶Tukhawmin Pa an hmu hlak ka ti nawh, Pathien kuoma inthawka hung suok chau naw hin chu; ama chun Pa chu a hmu.

⁴⁷Titakzetin, titakzetin ka hril cheu hi, tûkhawm a ring chun chatuona hringna a nei tah a nih.

⁴⁸Kei hi hringna bei chu ka nih.

⁴⁹“In thlatuhaiin thlalêrah manna kha an fâk a, an thi tho a.

⁵⁰Hi hi vâna inthawka bei hung ṭum chu a nih, mîn a fâka a thi nawna dingin.

⁵¹Kei hi vâna inthawka bei hring hung ṭum chu ka nih, tûkhawmin hi bei hi a fâk chun chatuonin hring zing a tih, anih, khawvêl hringna dinga ka ipêk ding bei chu, ka taksa hi a nih,” a ta.

⁵²Chuongchun, Judahai an insêl a, “Hi mipa hin iengtin am a taksa fâk dingin mi pe thei a ta?” an ta.

⁵³Chun, Isûn an kuomah, “Titakzetin, titakzetin ka hril cheu hi, Mihriem Naupa taksa in fâka, a thisen in dâwn bawk naw chun, nangni khâtin hringna nei nghâl lo cheu.

⁵⁴Tûkhawm, ka taksa faa, ka thisen dâwn chun, chatuona hringna a nei tah, chun, ni kin nia chun ama chu keitho ka tih.

⁵⁵Ka taksa hi bu tak a na, ka thisen hi dâwn ding tak a ni si a.

⁵⁶Tûkhawm ka taksa faa, ka thisen dâwn chu, keimaah a um zing hlak, kei khawm amaah ka um zing hlak.

⁵⁷Pa hring zing chun a mi tir a, Pa zâra hring ka ni ang bawkin, tûkhawm a mi fa chu keia zârin hring vêng a tih.

⁵⁸Hi hi vâna inthawka bei hung ṭum chu a nih, chi thlatuhaiin bei an fâk ang kha a ni nawh, anni chun an fâka, an thi ta a; tûkhawm hi bei hi fa chu chatuonin hring zing a tih,” a ta.

⁵⁹Chuong thu chu inkhâwmna inah a hril a, Kapernauma ân chûktir lai khan.

⁶⁰Chuongchun, a închûktirhai tamtakin chuongchu an hrietin, “Hi hi thu khir tak a nih, tuin am ngai phâk an ta?” an ta.

⁶¹Chuongchun, chu thua chun a închûktirhai an chier ti Isûn a lungrilin a hriet a, an kuomah, “Hi thu hin a suklungninaw cheu am a nih?

⁶²Mihriem Naupa hi inhmaa a umna ngaia hang lâwna in hmu chun ieng am lâwng in ta?

⁶³Sukhringtu chu thlarau a nih, tisa chu ienga ṭhangkai a ni nawh; in kuoma thu ka hrilhai hi thlarau a nih, hringna khawm a nih.

⁶⁴Nisienlakhawm, nangni laia a ṭhen ring naw in um,” a ta. Isûn a ring nawtu le ama inmantirtu ding chu a tîra inthawkin a hriet zing si a.

⁶⁵Chun, ama bawkin, “Hi lei hin a nih in kuomah, 'Pain a ṭhangpui naw chun, tukhawm ka kuomah hung thei naw ni hai,' ka ti kha,” a ta.

⁶⁶Chu phingle chun a închûktirhai tamtak an fe hmang a, ama an pâwl nâwk ta naw a.

⁶⁷Chuongchun, Isûn sâwm le pahnihai kuoma chun, “Nangni khawm fe hmang in nuom ve am?” a ta.

⁶⁸Simon Peterin a kuomah, “Lalpa, tu kuom am fêng kan ta? Nangin chatuona hringna thu i nei annâwm;

⁶⁹Nang Pathien mi inthieng chu i nih ti kan awi ta a, hriet khawm kan hriet ie,” a ta, a dawn a.

⁷⁰Chun, Isûn an kuomah, “Nangni sâwm le pahnihai hi keia thlang in ni naw am a nih? Nangni laia pakhat diebol a ni nâwk nghâl si,” a ta.

⁷¹(Simon Iskariot naupa Juda, sâwm le pahnihai laia ṭhang ve thu kha a hril a nih, ama chu ân mantirtu ding chu a ni si a.)