Read Hmar JOHAN 7 Bible Online

JOHAN 7 - Hmar bible

JOHAN 7

¹Chu zoa chun Isûn Galili ram a fang a, Judahaiin ama sukhlum an tum leiin Judai ram chu a fang nuom naw a.

²Chun, Judahai Bâwktê Ruoiṭhe chu a hnai ta a.

³Chuongchun, a unauhaiin a kuomah, “Hitaka inthawkin Judai ramah va fe rawh, i închûktirhai khawmin i thilthaw hi an hmu theina dingin.

⁴Tûkhawmin mâni hming inthang nuom siin arûkin thil iengkhawm an thaw nawh. Hieng thilhai hi i thaw tak zet chun, khawvêl kâwlah inentir rawh,” an ta.

⁵(A unauhai khawm chun ama an ring si naw a).

⁶Chun, Isûn an kuomah, “Ka hun a la tlung nawh; nangni hun ruok chu a tlung zing a nih.

⁷Khawvêlin nangni an theida thei naw cheu, kei ruok chu an mi theida hlak, an thilthawhai a suol ti ka hrilfie hlak leiin.

⁸Nangni ruoiṭhenaah hang fe ro, kei chu hi ruoiṭhea hin la fe hri naw ning, ka hun a la tlung naw leiin,” a ta.

⁹Chun, chuong thu chu an kuomah a hril a, Galili ramah a la um zing a.

¹⁰Nisienlakhawm, a unauhai chu ruoiṭhenaa an hang fe hnung chun, ama khawm vântlâng ihriet lovin, arûkin a hang fe ve a.

¹¹Chun, Judahaiin ruoiṭhenaa chun ama chu an zawng a, “Khâwlai am a um a?” an ti a.

¹²A chungah mipuihai laia mi an chier sup sup a, a ṭhenin, “Mi ṭha a ni ie,” an ti a; ṭhenkhatin, “Teu lo e, mipui a hlêm lem hlak a nih,” an ta.

¹³Nisienlakhawm, Judahai an ṭi leiin tûkhawmin a chungchâng thu an hril lang nawh.

¹⁴Chun, ruoiṭhe ṭhat lai takin, Isu Pathien biekinah a hang fe a, ân chûktir a.

¹⁵Chun, Judahaiin, “Hi mipa hin inchûk ngai lovin iengtin am lekha a hriet a?” an ta, mak an ti hle a.

¹⁶Chun, Isûn anni chu a dawn a, “Ka thu inchûktir hi ka ta a ni naw a, a mi tirtu ta a ni lem.

¹⁷Tûkhawm ama dit zâwng thaw nuom chun, thu inchûktir hi Pathien suksuok am a ni, keia phuokfâwma ka hril, hrieng a tih.

¹⁸Tûkhawm mâni phuokfâwm thu hril chu mâni mawina zawng a nih; a tirtu mawina zawng ruok chu, ama chu mi tak zet a nih, amaa chun indik nawna hrim a um nawh.

¹⁹Mosiein Dân chu a pêk naw cheu am a nih? Nisienlakhawm, nangni lai tukhawmin Dân chu in hraw si nawh. Nangnîn iengdinga mi sukhlum in tum am?” a ta.

²⁰Chun, mipui chun, “Khawhri zâwl i ni hi, tuin am sukhlum a tum che leh?” an ta, an dawn a.

²¹Isu chun a dawn a, an kuomah, “Thil pakhat ka thaw kha nangni po poin mak in ti kha.

²²Mosiein sertan thu kha a pêk cheu a, chu chu Mosie suksuok ni lovin, thlâtuhai suksuok a ni lem. Chu lei chun a nih Châwlni khawma mi ser in tan hlak chu.

²³Mosie Dân bawsiet nawna dingin Châwlnia khawm pasalin ser ân tantir si chun, keiin Châwlnia mi ka sukdam leiin ka chungah in lunginsen bîk maw?

²⁴ân lang angin ngaituo naw unla, feltakin ngaituo lem ro,” a ta.

²⁵Chun, Jerusalema mi ṭhenkhatin, “Hi mipa hi sukhlum an itum chu a ni naw am a nih?

²⁶En ta u, ân langin thu a hril a, a kuomah iengkhawm an hril si nawh. Ama hi Krista a ni ti hotuhaiin an hriet tak tak am a ni tah aw?

²⁷Hi mipa hi a piengna chenin ei hriet si a, Krista ruok chu a tlung pha chun a piengna chin tukhawmin hre naw ni hai,” an ta.

²⁸Chuong lei chun Isûn Pathien biekina ân chûktir malamin a khêk a, “Nangnîn in mi hriet, ka piengna chin khawm in hriet deh. Nisienlakhawm mâni thua hung ka ni nawh, a mi tirtu hi mi tak zet a nih, ama chu in hriet si nawh.

²⁹Kei ruok chun ama chu ka hriet; a kuoma inthawka hung suok ka na, ama chun a mi tir a ni si a,” a ta.

³⁰Chuongchun, ama chu man an tum a, nisienlakhawm, a hun a la tlung naw leiin tukhawmin a chungah kut an thlâk si nawh.

³¹Mipui laia tamtak ruok chun ama chu an ring a, “Krista chu a hung tlung pha khawm, hi mipa thaw nêka tam thilmak a hung thaw ding am a nih?” an ta.

³²Chun, Pharisaihaiin a chunga mipui chier rûknahai chu an hriet a, chuongchun, thiempu lalhai le Pharisaihai chun ama man dingin manmihai an tir ta a.

³³Chun, Isûn “Sâwt nawtê in kuomah la um hri phawt ka ta, chun a mi tirtu kuomah fêng ka tih.

³⁴Nangnîn mi zawng in ta, mi hmu si naw ti niu; ka umnaa khawm hung thei naw ti niu,” a ta.

³⁵Chun, Judahai an inbiek a, “Ei hmu naw dingin hi mipa hi khâwlai am a fe ding a ni leh? Grikhai laia Inpêmdarhai laia fein Grikhai chu ân chûktir ding am nîng a ti?

³⁶‘Nangnîn mi zawng in ta, mi hmu si naw ti niu a; ka umnaa khawm hung thei naw ti niu,’ a ti hi, ieng a tina am a na?” an ta.

³⁷Chun, ruoiṭhe ṭumṭiek ding ni, ni ropuitaka chun Isu a ngîr a, a khêk a, “Tûkhawm a dangchâr chun ka kuomah hung sienla, dâwn raw se.

³⁸Tûkhawm a mi ring chu Pathien Lekha hril angin, tui hring vadunghai a phînga inthawkin hung luong suok a tih,” a ta.

³⁹(Chuong thu chu ama ringtuhaiin Thlarau an nei dingzie thu a hrilna a nih; Thlarau chu pêk a la ni hri nawh, Isu chu chawimawia a la um hri naw leiin.)

⁴⁰Chuongchun, mipui laia ṭhenkhatin chuong thu chu an hrietin, “Hi mipa hi zâwlnei chu a ni ngei hi,” an ta.

⁴¹Ṭhenkhatin, “Hi hi Krista chu a nih,” an ta. Ṭhenkhatin, “Khâwlai am Krista chu Galili ramah hung suok hlak a ta?

⁴²Krista chu David thlahai laiah, David umna khuo Bethlehemah a suok ding a nih ti Pathien Lekhain a hril naw am a nih?” an ta.

⁴³Chuongchun, ama leiin mipui chu an inṭhe a, an inkhing ta a.

⁴⁴Ṭhenkhat chun man an nuom a, nisienlakhawm, tukhawmin a chungah kut an thlâk si nawh.

⁴⁵Chun, manmihai chu thiempu lalhai le Pharisaihai kuomah an hung nâwk a, chun, anni chun an kuomah, “Iengdinga in hung ṭhuoi naw?” an lo ti a.

⁴⁶Manmihai chun, “Hi mipa thuhril ang hrim hin tukhawmin thu an hril ngai nawh,” an ta, an dawn a.

⁴⁷Chun, Pharisaihai chun an kuomah, “Nangni khawm hlêmin in um ve tah a ni maw chu?

⁴⁸Hotuhai le Pharisaihai laia mi hrim hrim ama ring an um ta am a nih?

⁴⁹Hieng dân hre naw mipuihai hrep hi ṭawngsephur an nih in sawnnaw,” an ta, an dawn a.

⁵⁰Nikodem, inhmaa Isu kuoma hung kha, anni laia ṭhang ve a na, an kuomah,

⁵¹“Ama bau ngeia a thu hriet le a thilthaw hriet hmain ei dânin mi thiemnaw ân changtir hlak am a nih?” a ta.

⁵²Anni chun a kuomah, “Nang khawm chu Galili mi i ni ve am a nih? Zawng la, Galili rama chun zâwlnei tukhawm an suok ngai nawh ti hrieng i tih,” an ta, an dawn a.

⁵³[Chun, mi tin mâni in sengah an fe ta a.