Read Hmar JOHAN 8 Bible Online

JOHAN 8 - Hmar bible

JOHAN 8

¹Isu ruok chu Oliv tlângah a fe ta lem a.

²Chun, zingkâr inhmatakin Pathien biekinah a lût nâwk a, mi po po a kuomah an hung a; chun, ama chu a ṭhung a, anni ân chûktir a.

³Chun, Dân inchûktirtuhai le Pharisaihaiin nuhmei pakhat a uiret leia an man an hung ṭhuoi a; a laiah an inngîrtir a.

⁴Isu kuomah, “Inchûktirtu, hi nuhmei hi a uiret lai an man a nih, a uiret lai takin.

⁵Dân Lekhabuah Mosiein hieng ang mi hi lunga dêng hlum thu a mi pêk a; nangin iengtin am i ngai a?” an ta.

⁶Chu thu chu ama fiena dingin an thaw a nih, a hêkna ding an hmu theina dingin. Chuongchun, Isu a kûn a, a kutpârin hnuoi a ziek a.

⁷Chun, an indawn sek sek leiin ama chu a tho a, an kuomah, “Nangni laia suol nei naw naw chun ama chu lungin dêng hmasa raw se,” a ta.

⁸Chun, a kûn nâwk a, a kutpârin hnuoi a ziek nâwk a.

⁹Chun, anni chun a thu hril chu an hrietin, a upatakin a phut a, a tâwp chenin, pakhat khatin an inrel hmang ta pei a; chuongchun, Isu chau a um ta a, nuhmei a laia a umna ngaia um le khan.

¹⁰Chun, Isu a tho a, a kuomah, “Nuhmei, khâwlai am an um ta a? Tukhawmin thiemnaw an inchangtir naw che a ni maw?” a ta.

¹¹Ama chun, “Lalpa, tukhawmin an mîn changtir nawh,” a ta. Chun, Isûn, “Kei khawmin thiemnaw kân changtir naw che; fe la, tuta hnung chu suksuol nâwk ta naw,” a ta.][9]

¹²Chun, Isûn an kuomah thu a hril nâwk a, “Kei khawvêl êntu ka nih, tûkhawm a mi zui chu inthimah lêng tawp naw ni; hringna var nei lem a tih,” a ta.

¹³Chuongchun, Pharisaihaiin a kuomah, “Mâni thu inhriettir i nih, i thu inhriettir ân dik nawh,” an ta.

¹⁴Isûn an kuomah, “Mâni thu inhriettir lang khawm ka thu inhriettir ân dik a nih; keiin ka hung suokna le ka fena ding chin khawm ka hriet a; nangni chun chu ka hung suokna le ka fena ding chin khawm in hriet si nawh.

¹⁵Nangnîn tisa dânin in sawisêl hlak; kei ruok chun tukhawm ka sawisêl nawh.

¹⁶Anih, sawisêl lang khawm ka sawisêlna chu indik a tih; keia khât chau ka ni naw a, kei le Pa a mi tirtu leh kan ni lem leiin.

¹⁷Anih, in Dân Lekhabua khawm, ‘Mi pahni thu ân dik,’ ti ziek a ni bawk annâwm.

¹⁸Kei hi mâni thu inhriettirtu ka nih, Pa a mi tirtu chun ka thu ân hriettir bawk,” a ta, a dawn a.

¹⁹Chun, anni chun a kuomah, “I pa khâwlai am?” an ti a. Isûn “Nangnîn kei in mi hriet nawh, ka Pa khawm in hriet nawh; kei mi hrie ni unla chu, ka Pa khawm hrieng in tih,” a ta.

²⁰Chuong thu chu Pathien biekin- ah inchûktir malamin, thawlâwm siena hmunah a hril a; tukhawmin ama an man si nawh, a hun a la tlung naw leiin.

²¹Chun, ama chun an kuomah, “Ka fe hmang ding a ni hi, nangnîn mi zawng in ta, in suol nei zingin thîng in tih; ka fena dingah hung thei naw ti niu,” a ti nâwk a.

²²Chun, Judahaiin, “ ‘Ka fena dingah hung thei naw ti niu,’ a ti hi ân sukhlum ding am a nih?” an ta.

²³Ama chun an kuomah, “Nangni hnuoi tienga inthawka suok in nih, kei chu chung tienga suok ka nih; nangni hi khawvêla suok in nih, kei chu hi khawvêla suok ka ni nawh.

²⁴Chuleiin, in kuomah, ‘In suol nei zingin thîng in tih,’ ka ti kha; ama chu ka nih ti in awi naw chun, in suol nei zingin thi mawl in tih,” a ta.

²⁵Chun, anni chun a kuomah, “Tû am i ni leh?” an ti a. Isûn an kuomah, “A tira inthawkin in kuomah ka hril hlak kha.

²⁶Nangni chungchâng thua hin thil tamtak hril ding le ngaituo ding ka nei; ieng khawm ni raw se, a mi tirtu chu mi indiktak a nih; a kuoma inthawka thu ka hriet taphawt khawvêl kuomah ka hril hi,” a ta.

²⁷Pa thu an kuomah a hril ti an hriet nawh.

²⁸Chuongchun, Isu bawkin, “Nangnîn Mihriem Naupa hi in khai kâng hnungin, ama chu ka ni le, kei mâni thuin thil iengkhawm ka thaw naw a, Pain a mi hril ang peiin hieng thu hi ka hril a nih ti la hung hrieng in tih.

²⁹A mi tirtu chu ka kuomah a um, a mi thlâthlam nawh; a thil lâwm zâwng taphawt ka thaw pei hlak leiin,” a ta.

³⁰Chun, chuong thu chu a hril laiin mi tamtakin ama chu an ring ta a.

³¹Chuongchun, Isûn a ringtu Judahai kuoma chun, “Ka thua in um zing chun, ka inchûktirhai ni taktak in tih;

³²chun, thutak hrieng in ta, thutak chun suok ni bân a ti cheu,” a ta.

³³Anni chun a kuomah, “Abraham thlahai kan nih ie, tu chen hin tu suoka khawm kan la um ngai nawh, ‘Suok ni bân a ti cheu,’ ieng ti tia i ti am a na?” an ta.

³⁴Isûn an kuomah, “Titakzetin, titakzetin ka hril cheu hi, tûkhawm thil suksuol taphawt chu suol suok a nih.

³⁵Suok chu kumkhuoin inah a um zing nawh; naupa ruok chu kumkhuoin a um zing hlak.

³⁶Chuongchun, Naupa hin ân zalêntir cheu chun, zalên tak tak tâng in tih.

³⁷Abraham thlahai in nih ti ka hriet deh; ni unla khawm mi that in tum si, ka thu hin in lungrilah umna a nei naw leiin.

³⁸Keiin ka Pa kuoma thil ka hmu chu ka hril hlak; nangni khawmin in pa kuoma thil in hriet chu in thaw hlak,” a ta.

³⁹Chun, anni chun a kuomah, “Kan pa Abraham a nih,” an ti a, an dawn a. Isûn an kuomah, “Abraham nauhai in ni chun, Abraham thil thaw naw ti niu am.

⁴⁰Nisienlakhawm, tuhin mi that in tum si. Pathien kuoma inthawka thutak ka ihriet hriltu cheu ka nih in sawnnaw; Abraham chun hieng hin a thaw naw kha.

⁴¹Nangni chun chu in pa thil chu in thaw hlak,” a ta. Anni chun a kuomah, “Uire naua pieng kan ni naw ie, Pa pakhat chau kan nei, Pathien chu,” an ta.

⁴²Isûn an kuomah, “Pathien in Pa a ni chun nangnîn mi hmangai naw ti niu am; Pathien kuoma inthawka suok le a kuoma inthawka hung ka ni si a; keima thua hung ka ni bawk nawh, ama chun a mi tir lem a nih.

⁴³Iengdinga ka ṭawng umzie in hriet naw am a na? Ka thu hril in ngai phâk naw lei a nih.

⁴⁴Nangni chu in pa Diebola inthawka suok in na, in pa dit zâwng thaw in nuom a nih. Ama chu a tîra inthawk tuolthattu a nih, thutakah a ngîr ngai nawh, a sûngah thutak hrim a um naw leiin. Khêl thu a hrilin a mizie dungzuiin a hril hlak, khêlhlip a ni si; thukhêl pa khawm a nih.

⁴⁵Thutak ka hril leiin nangnîn in mi ring naw a nih.

⁴⁶Nangni lai tûin am suol kawngah thiemnaw mîn changtir a ta? Thutak ka hril khawmin nangnîn iengdinga in mi ring naw am a na?

⁴⁷Pathien kuoma inthawka suok chun Pathien thu a pawm hlak; hi lei hin in pawm naw a nih, Pathien kuoma inthawka suok in ni naw leiin,” a ta.

⁴⁸Chun, Judahai chun a kuomah, “Samari mi khawhri zâwl i nih kan ti kha kan ti indik ngawt a ni naw am a nih?” an ta, an dawn a.

⁴⁹Isûn, “Khawhri zâwl ka ni naw ie, ka Pa ka chawimawi a ni lem; nangnîn ka hming in suksiet hi.

⁵⁰Mâni mawina zawng ka ni nawh; a zawngtu le a ngaituotu mi pakhat a um a nih.

⁵¹Titakzetin, titakzetin ka hril cheu hi, miin ka thu a zâwm chun, kumkhuoin thi ni hmêl hmu naw ni,” a ta.

⁵²Judahaiin a kuomah, “Khawhri zâwl i nih ti tuhin kan hriet tah. Abraham a thi tah, zâwlneihai leh, nangin, ‘Miin ka thu a zâwm chun, kumkhuoin thina intem naw nih,’ i ti si a.

⁵³Kan thlatu Abraham nêkin i ropui lem am a nih? Ama khawm a thi tah, zâwlneihai khawm an thi tah; tuin am însiem leh?” an ta.

⁵⁴Chun, Isûn “Mâni inchawimawi lang, ka mawi ienga ding khawm a ni nawh: ‘Kan Pathien,’ in ti, ka Pa chu, a mi chawimawitu a nih;

⁵⁵nangnîn ama in hriet si nawh; kei ruok chun ama ka hriet; ‘Ama ka hriet nawh,’ ti lang nangni anga khêlhlip bawk nîng ka tih; chuongchun, ama ka hriet a, a thu khawm ka zâwm hlak.

⁵⁶In thlatu Abraham kha ka ni hmu ding a ni leiin a hlim bêk bêk hlak; chun, a hmu ngei a, a lâwm hle a,” a ta, a dawn a.

⁵⁷Chun, Judahai chun a kuomah, “Nang kum sâwmnga khawm la tling lo el che a, Abraham i hmu am a nih?” an ta.

⁵⁸Isûn an kuomah, “Titakzetin, titakzetin ka hril cheu hi, Abraham um hma khawmin ka um,” a ta.

⁵⁹Chuongchun, ama dêngna dingin lung an rût a; nisienlakhawm, Isu ân bi hmang a, Pathien biekina inthawk chu a suok ta a.