Read Hmar JOHAN 9 Bible Online

JOHAN 9 - Hmar bible

JOHAN 9

¹Chun, Isûn a fe malamin a pieng tîra inthawka mitdel pakhat a hmu a.

²Chun, a închûktirhaiin a kuomah, “Rabbi, mitdel saa a pieng hi tuin am thil a suksuol, ama hin am, a nu le a pain?” an ta, an indawn a.

³Isûn, “Hi mipa hin a suksuol nawh, a nu le a pain an suksuol bawk nawh, Pathien sinthaw a chunga ân langna dingin a ni lem.

⁴Sûn a ni laiin a mi tirtu sin ei thaw ding a nih, zân a ni ding a ni ta hi, chu pha chun tukhawmin thaw thei naw ni hai.

⁵Khawvêla ka um sûngin khawvêl êntu ka nih,” a ta, a dawn a.

⁶Chuong anga a hril zo chun, hnuoiah chil a sâk a, chil chun pilpawk a siema, pilpawk chu a mitah a nâl a,

⁷chun, a kuomah, “Siloam dîlah va sâwp rawh,” a ta. (Siloam chu, “Tir,” tina a nih.) Chun, a va fe a, a sâwp a, mit varin a hung ta a.

⁸Chuongchun, a vênghai le inhmaa a kutdaw hmu hlakhai chun, “Hi mipa hi ṭhung puma kut daw hlak kha a ni naw am a nih?” an ta.

⁹Ṭhenkhatin, “Ama kha a ni hi,” an ta. Mi dangin, “A ni nawh ie, ân angpui a ni lem hi,” an ta. Ama chun, “Kha kha ka nih,” a ta.

¹⁰Chun, anni chun a kuomah, “I mit iengtin am a hung var leh?” an ta.

¹¹Ama chun, “Isu an ti khan pilpawk a siem a, ka mitah a nâl a, ‘Siloam dîlah va sâwp rawh,’ a mi ti a. Chuongchun, ka va fe a, ka sâwp a, mitvarna ka hmu tah a ni hi,” a ta.

¹²Chun, anni chun a kuomah, “Ama chu khâwlai am a um a?” an ta. Ama chun, “Ka hriet nawh,” a ta.

¹³Chun, chu hmaa mit indel chu Pharisaihai kuomah an ṭhuoi a.

¹⁴Chun, Isûn pilpawk a siem a, a mit a sukvar ni kha châwlni a na.

¹⁵Chuongchun, Pharisaihaiin mitvarna a hmu dân an indawn nâwk a. Ama chun an kuomah, “Ka mitah pilpawk a sie a, ka sâwp a, ka hmu thei el a nih,” a ta.

¹⁶Chun, Pharisai ṭhenkhatin, “Chu mipa chu châwlni a hlutsak naw leiin Pathien kuoma inthawka suok ni naw ni,” an ta. Ṭhenkhat ruok chun, “Mi suolin iengtin am hieng ang thilmak hi thaw thei a ta?” an ta. Anni lai inṭhena a hung um ta a.

¹⁷Chun, mitdel kuoma chun, “I mit a sukvar kha nang ieng angin am i ngai a?” an ti nâwk a. Ama chun, “Zâwlnei a nih,” a ta.

¹⁸Nisienlakhawm, Judahaiin mitvarna hmutu nu le pa chu an ko hmakhat chu mitdel a na, mitvarna a hmu ti, a chungchâng thu chu an awi naw a.

¹⁹Chun, a nu le pa kuoma chun, “Hi mipa hi in naupa, mitdel saa pieng a nih in ti kha a ni am a nih? Iengtin am tuhin a hmu thei ta a?” tiin an indawn a.

²⁰A nu le pa chun, “Hi mipa hi kan naupa a nih ti kan hriet, mitdel sain a pieng ti khawm kan hriet,

²¹nisienlakhawm, iengtin am tuhin a hung hmu thei tah a na kan hriet nawh, a mit sukvartu khawm kan hriet bawk nawh; ama indawn ro; patling a nih annâwm, ama thu chu ama bawkin hril raw se,” an ta, an dawn a.

²²Judahai an ṭi leiin a nu le pa chun chuong thu chu an hril a nih; Judahaiin, chu hma khawm chun tûkhawmin “Ama chu Krista a nih,” tia an ṭan chun, inkhâwmna inah hnawng an tih ti hi an remti sa a na.

²³Chuleichun a nih, a nu le pa chun, “Patling a nih annâwm, ama indawn ro,” an ti chu.

²⁴Chuongchun, mitdel chu an ko nâwk a, a kuomah, “Pathien inpâk rawh, ama kha chu mi suol a nih ti kan hriet,” an ta.

²⁵Ama chun, “Mi suol a ni le ni naw ka hriet nawh, kawng khat ka hriet, kha hma khan ka mit ân del a, tuhin ka hmu thei ta hi,” a ta, a dawn a.

²⁶Chun, anni chun a kuomah, “I chungah iengtin am a thaw a? I mit iengtin am a sukvar a?” an ta.

²⁷Ama chun an kuomah, “Nakie khan ka hril ta cheu kha, in hriet nuom si nawh; iengdinga in hriet nuom nâwk ta am a ni leh? Nangni khawm ama inchûktirhai ni in nuom ve am a nih?” tiin a dawn a.

²⁸Chun, anni chun an hal a, “Nang hi ama inchûktir i na, keini chu Mosie inchûktirhai kan ni hi teh.

²⁹Pathienin Mosie a biek ti kan hriet, hi mipa hrep hi khâwlaia inthawka hung suok am a na, kan hriet hrep nawh,” an ta.

³⁰Chun, ama chun an kuomah, “Chu chu a nih a makna chu, khâwlaia inthawka hung suok am a ni in hriet naw a, ka mit a sukvar tlat si hi.

³¹Pathienin mi suol thu a ngai ngai nawh ti ei hriet; nisienlakhawm, tukhawmin Pathien a ngaisak a, a dit zâwng a thaw chun, Pathienin ama chu a thu a ngai hlak.

³²Khawvêl insieng tira inthawk tukhawmin mitdel saa pieng mit an sukvar nâwk ti an hriet ngai nawh.

³³Hi mipa hi Pathien kuoma inthawka suok a ni naw chun, iengkhawm thaw thei naw ni,” a ta, a dawn a.

³⁴Chun, anni chun a kuomah, “Nang suol letdêra pieng i nih annâwm, nangin i mi hril vei maw?” an ta, an dawn a. Chuongchun, ama chu an hnawt dawk ta a.

³⁵Chun, an hnawt dawk ti Isûn a lo hriet a; chun, a zawng dawk a, “Pathien Naupa i ring am?” a ta.

³⁶Ama chun, “Pu, ama chu tu am a na, mi hril rawh, ka ring theina dingin?” a ta, a dawn a.

³⁷Isûn a kuomah, “Ama chu i hmu zing tah, a be zingtu che hi a nih,” a ta.

³⁸Ama chun, “Lalpa, ka ring ie,” a ta, chibai a bûk a.

³⁹Chun, Isûn, “Rorêl dinga hi khawvêla hin hung ka nih, mitdelhai chu an mit a hung varna ding le, mitvarhai chu an mit a hung indelna dingin,” a ta.

⁴⁰Chun, a kâwla Pharisai umhai chun chuong thu chu an hriet a, a kuomah, “Keini khawm hi mitdel kan ni ve am a nih?” an ta.

⁴¹Isûn an kuomah, “Mitdel in ni chun suol nei naw ti niu a, nisienlakhawm, ‘Kan hmu thei ie,’ tuhin in ti si a, chuleiin, in suol a um zing a nih.