Read Hmar THILTHAWHAI 10 Bible Online

THILTHAWHAI 10 - Hmar bible

THILTHAWHAI 10

¹Chun, Kaisari khuoah a hming Korneli mi pakhat a um a; Itali pâwl an ti, chu pâwla sipai za hotu a nih.

²Pathien ngaisak mi a na, a sûnghai po po leh Pathien an ṭi hlak a; mihai kuomah thil tamtak a pêk hlak a, Pathien kuoma khawm an ṭawngṭai rawp a.

³Chawhnung dâr thum vêlah inlârnain chiengtakin a hmu a; Pathien vântirko pakhat a kuomah a hung a, “Korneli” a hung ti a.

⁴Chun, Korneli chun ama chu a lo en zing a, a ṭi a, “Lalpa, ieng am a na?” a ta. Chun, ama chun a kuomah, “I ṭawngṭainahai le i thil pêk thuhai kha hriet zing dingin Pathien hmaah a hang tlung tah.

⁵Tuhin Joppa khuoah mihai tir la, mi pakhat Simon Peter an ti chu, hang inṭhuoitir rawh.

⁶Savun siemtu Simon kuoma tlung a na, a in chu tuipui panga a um a nih,” a ta.

⁷Chun, vântirko a betu chu a fe phingleh, Korneli chun, a siehlawhai laia mi pahni le a rawngbâwl rawphai laia Pathien ngaisak sipai pakhat a ko a;

⁸chun, thu po po chu an kuoma a hril zoin Joppa khuoa chun a tir ta a.

⁹Chun, a zînga an fe laia khaw kâwl an tlung laiin, Peter chu ṭawngṭai dingin, sûnbu fâk hun laiin, in chungah a hang lawn a.

¹⁰Chun a phîng a hung ṭâm a, bu fâk a nuom ta a; nisienlakhawm, fâk ding an siem lai chun zêlin a um ta a.

¹¹Vân inhawngin, iengkhat bâwm puon lientak ang, a ki palia khita, hnuoiah inkhaithlain a hmu a.

¹²Chu sûnga chun sapheimanlihai le, thilhring le chunga vate tinrênghai an um a.

¹³Chun, a kuomah rawlin, “Peter tho rawh; that la fa rawh,” a hung ti a.

¹⁴Nisienlakhawm, Peter chun, “Lalpa, ni lo e; thil pawrche le inthiengnaw iengkhawm ka fâk ngai naw ie,” a ta.

¹⁵Chun, rawl chun vawihninaah, “Pathienin a sukthieng ta chu nangin thiengnaw ti naw rawh,” a ta.

¹⁶Chuong ang ruok chun, vawi thum a hung um a; chun, bâwm chu vâna zuk khaiin a um nâwk nghâl ta a.

¹⁷Chun, Peterin mang anga a hmu chu a ngaina hre lova a lunginzîng laiin, Korneli mi tirhai chun Simon in chu an lo indawn suok ta a, kawtkhâr bulah an lo ngîr a,

¹⁸an khêk a, Simon, Peter an ti chu, chutaka chun a tlung le tlung naw an indawn a.

¹⁹Chun, Peterin a mang thu chu a ngaituo laiin, Thlarauin a kuomah, “Ngai ta, mi pathumin an zawng che.

²⁰Chuongchun, tho la, ṭum la, iengkhawm ringhla lovin anni zui rawh; anni chu ka itir an nih,” a ta.

²¹Chuongchun, Peter chu chuhai kâwla chun a ṭum a, an kuomah, “In izawng hi ka nih; ieng am in hungna san?” a ta.

²²Anni chun, “Vântirko inthieng pakhatin, Korneli, sipai za hotu mi feltak, Pathien ṭi Juda hnam po pohai khawma an ingaisâng kuoma chun, i thu hril a hrietna dingin, a inah nang ko ding chein a hril a nih,” an ta.

²³Chuongchun, mihai chu a ko lût a, ân riek tir ta a. A zînga chun Peter chu a tho a, an kuomah a fe a, Joppa khuoa mi unau tuhai amani khawm anni leh an fe ve a.

²⁴Chun, a zing nâwk chun Kaisari khuoa chun an lût ta a. Chun, Korneli chun a laibunghai le a ruol dittakhai a ko khâwm a, anni chu a lo nghâk zing a.

²⁵Chun, Peter chu a lût ding lai takin Korneli chun a lo tuok a, a ke bulah a bawkkhup a, Pathien chibai bûk angin a bûk a.

²⁶Nisienlakhawm, Peterin ama chu a keitho a, “Ngîr rawh, kei khawm mihriem ka ni hi,” a ta.

²⁷Chun, a kâwla thu hril pumin a lût a, mi tamtak umkhâwm chu a va hmu a.

²⁸An kuomah, “Juda mîn hnam dang kuoma fe le pâwl a thieng nawzie nangnîn in hriet a nih; nisienlakhawm, tukhawm inthiengnaw le pawrche ka ti ding an nawh ti Pathienin a mîn hriettir a nih.

²⁹Chuleiin, in mi hung ko phingle khan sêl lovin ka hung a ni hi. Chuongchun, kân dawn cheu, ieng am a na in mi hung ko san?” a ta.

³⁰Chun, Korneli chun, “Ni li a ni tah, tu ang hunah hin, ka inah, chawhnung inher ṭawngṭainaah ka ṭawngṭai a; chun, ngai ta, mi pakhat puon vârtak silin ka hmaah a hung ngîr a,

³¹‘Korneli, i ṭawngṭaina kha hrietin a um tah, mi kuoma i thilpêkhai khawm kha Pathienin a hriet zing ie.

³²Chuleiin, Joppa khuoah mi tir la, Simon Peter an ti chu, i kuomah ko rawh, ama chu tuipui panga savun siemtu Simon ina tlung a nih,’ a ta.

³³Chuleiin, i kuomah mi ka hung tir nghâl tah a nih; i hung hi a ṭha ie. Chuongchun, Lalpain thu a pêk taphawt che hre dingin tuhin Pathien mithmuin kan rêngin hitaka hin kan um a ni hi,” a ta.

³⁴Peter chun a hril a, “Pathienin mi ditsak bîk a nei nawh ti indiktakin ka hriet;

³⁵nisienlakhawm, hnam tin lai tûkhawm ama ṭia, feltaka thaw taphawt chu, a lâwm zâwng mi a ni hlak.

³⁶Ama chun thlamuongna Chanchin Ṭha Isu Krista baua hrilin Israel mipuihai kuomah thu ân phur a, (Isu chu mi po po Lal a nih).

³⁷Johanin a khêkpui hlak baptisma zoa khan, thu, Galili rama inthawkin hung inthang ṭanin, Juda ram po poa inthang suok kha, nangnîn in hriet bawk annâwm.

³⁸Nazareth Isu chungchâng thu kha, khânga ama chu Pathienin Thlarau Inthieng le thilthawtheinaa a vurzie kha; ama chun mi chunga thawṭhain le diebol suknawmnat po po sukdamin a fang vêl hlak, Pathien a kuoma a um leiin.

³⁹Juda ram le Jerusalema a thilthawhai po po hretu kan nih; ama chu thinglêra khaiin an sukhlum tah.

⁴⁰Pathienin ama chu ni thum niin a keitho nâwk a, fietakin ân entir a,

⁴¹amiruokchu, mi po po kuomah ni lovin, a thu hretu ni dinga inhmaa Pathienin a ithlang tah, keini, mithi laia a thonâwk hnunga a kuoma faa dâwntuhai kuoma hin a nih.

⁴²Ama chu mithihai le mi hringhai chunga Rorêltua Pathien iruot chu a nih ti, mi kuoma khêkpui le inhriettir dingin Pathienin thu a mi pêk a nih.

⁴³“Tûkhawm ama ring taphawt chu a hming leiin suolhai ngaidamin um an tih ti hieng a chanchin hi zâwlneihai po poin an inhriettir hlak kha a nih,” a ta.

⁴⁴Chun, Peterin chuong thu chu a hril lai tak chun, thu hretuhai po po chunga chun Thlarau Inthieng a hung tlung ta a.

⁴⁵Chun, Sertanhai laia ringtuhai Peter hung zuituhai chun Thlarau Inthieng pêk chu Jentailhai chunga khawm buok a ni leiin mak an ti hle a;

⁴⁶ṭawng hrietnawhaia thu hrilin, Pathien inpâkin an hriet si a.

⁴⁷Chun, Peterin a biek a, “Hieng mihai, eini anga Thlarau Inthieng hmuhai hi baptisma an chang nawna dingin miin tui hmang an khap thei am a nih?” a ta.

⁴⁸Chuongchun, Isu Krista hminga baptisma chang ding thu a pêk a. Chuong zoa chun ni iengzat amani lai châm dingin an ngên a.