Read Hmar THILTHAWHAI 11 Bible Online

THILTHAWHAI 11 - Hmar bible

THILTHAWHAI 11

¹Chun, Juda rama tirko le unau umhai chun Jentailhai khawmin Pathien thu an zâwm ti an hriet ta a.

²Chuongchun, Peter chu Jerusalem a hang tlung phingleh, Sertanhaiin an kal a,

³a kuomah, “Sertan nawhai inah i lût a, an kuomah i fâk vei a,” an ta.

⁴Nisienlakhawm, Peterin a bula inthawkin indawt zatin an kuomah a hrilfie a;

⁵“Joppa khuoah ṭawngṭaia ka um laiin zêlin ka um a. Mang angin iengkhat bâwm, puon lientak ang, a ki palia khita, vâna inthawka inkhaithla ka hmu a; ka kâwla ngei a mi hung hnai a.

⁶Chu chu ka en zing a, ka ngaituo a, hnuoia mi sapheimanlihai, ramsahai, thilhringhai le chunga vatehai ka hmu a.

⁷Chun, rawlin, ‘Peter, tho rawh, that la fa rawh,’ mi tiin ka hriet bawk a.

⁸Nisienlakhawm, keiin, ‘Lalpa, ni lo e, thiengnaw le inthiengnaw iengkhawm ka bauah a lût ngai nawh,’ ka ta.

⁹Nisienlakhawm, vâna inthawka rawl chun a vawi hninaah, ‘Pathienin a sukthieng ta chu nangin inthiengnaw ti naw,’ tiin a mi dawn a.

¹⁰Chuong ang ruok chun vawi thum a hung um a; chun, iengkim chu vâna zuk khaiin a um nâwk ta a.

¹¹Chun, ngai ta u, mi pathum, Kaisari khuoa inthawkin ka kuomah an hung tir a, ka umna tuola chun an lo um zing ta a.

¹²“Chun, Thlarauin lunghimawna nei lova anni zui dingin a mi tir a. Hieng unau parukhai khawm hin an mi zui ve a, mi ina chun kan lût a.

¹³Chun, ama chun kan kuomah, a ina vântirko ngîr a hmuzie le, vântirko chun a kuomah, ‘Joppa khuoah mi tir la, Simon, Peter an ti chu, hung inṭhuoitir rawh;

¹⁴ama chun thu hril a ti che a, ama thu lei chun nang le i sûnghai sandamin um in tih,’ a tizie khawm a mi hril a.

¹⁵Chun, thu ka hang hril hlimin Thlarau Inthieng ei chunga a hung tlung tir lai ang khan an chungah a hung tlung ta a.

¹⁶Chun, Lalpa thu, ‘Johanin tuiin mi a baptis hlak kha, nangni ruok chu Thlarau Inthiengin baptisma la chang in tih,’ a tizie kha ka hung hriet suok nâwk ta a.

¹⁷Chuongchun, Lalpa Isu Krista an ring phingleh, Pathienin thil thlâwnpêk a mi pêk ang kha an kuoma a pêk tahnung chu, kei tê hi Pathien sêl ruol am ka nih?” a ta.

¹⁸Chuong thu chu an hrietin an to ta a, “Chuong a ni chun, Pathienin Jentailhai khawm hring dingin sim a phal tah a ni chu,” tiin Pathien an inpâk ta a.

¹⁹Chun, Stephan leia an suknawmnata indarhai kha, Phoiniki ram dâm, Kupra thlierkâr dâm, Antiokei dâm chenin an fe a, Judahai kuoma chau naw chu tu kuoma khawm thu an hril naw a.

²⁰Nisienlakhawm, anni laia a ṭhen chu Kupra thlierkâr le Kurinia mihai an na, chuonghai chu Antiokei an tlung chun Grikhai kuoma khawm, Lalpa Isu Chanchin Ṭha an hril ve ta a.

²¹Chun, Lalpa kutin anni a ṭhangpui a; mi tamtakin an ring a, Lalpa tieng chu an ngha tâwl ta a.

²²chun, an chanchin chu Jerusalema kohran umhai naa chun a hung lût ta a; chuongchun, Antiokei chen chun Barnaba chu an tir suok ta a.

²³Chun, ama chu a va tlung a, Pathien lunginsietzie chu a hmu chun a lâwm hle a; ṭhahnemngaitaka Lalpa chel zing dingin an rêngin ân fui ta a.

²⁴Barnaba chu mi ṭhatak, Thlarau Inthieng le ringnaa sip a nih. Chun, mi tamtakin Lalpa kuomah an belsa ta a.

²⁵Chun, Barnaba chu Saula zawng dingin Tarsa khuoah a fe a; chun a hmu chun Antiokeia chun a hung ṭhuoi a.

²⁶Chun, kum khat zet kohranhai inkhâwmnaa chun an ṭhang ve hlak a, mi tamtak an inchûktir hlak a. Antiokeia chun a nih inchûktirhai chu “Kristien” an ti hmasa tak chu.

²⁷Chun, chuong lai chun zâwlnei tuhai amanih Jerusalema inthawkin Antiokeia chun an zu fe a.

²⁸Chun, anni laia mi pakhat, a hming Agaba, a ngîr a, khawvêl po poah ṭâm nasatak a tlung ding a ni ti Thlalrau hrilin ân hriettir a; chu ṭâm chu Klaudi inlal laiin a hung tlung ta a.

²⁹Chuongchun, inchûktirhai chun, an thei tâwk sengin, Judai rama unau umhai kuoma chun sawmdâwlna ding thawn an tum a.

³⁰Chu chu an thaw ta ngei a, Barnaba le Saula kuta chun upahai kuomah an inphur ta a.