Read Hmar THILTHAWHAI 16 Bible Online

THILTHAWHAI 16 - Hmar bible

THILTHAWHAI 16

¹Chun, Derbe le Lustraa chun a fe bawk a; chun, chutaka chun, a hming Timothe inchûktir pakhat a um; ama chu ringtu Juda nuhmei naupa a na, a pa ruok chu Grik a nih;

²Lustra le Ikonioma unau umhai chun, ama chu an inpâk hlak a.

³Paulain ama chu a kuoma fe ve dingin a dit a; chuongchun, chu tienga Juda umhai lei chun, a ser a tanpêk a, a pa chu Grik a nih ti an hriet vawng si a.

⁴Chun, khaw tinah an fe malamin Jerusalema tirko le upa umhai thurêl kha zâwm dingin unauhai kuomah an pêk pei a.

⁵Chuongchun, kohranhai chu ringnaa chun an det ta a, ni tin an pung ta deu deu a.

⁶Chun, Thlarau Inthiengin Asia rama thu hril a khap leiin Phrugia le Galati ram chu an fang suok a;

⁷chun, Musia ram kâwl an tlungin Bethunia ramah lût an tum a, nisienlakhawm, Isu Thlarauin a phal si nawh.

⁸Chuongchun, Musia ram chu an khêl a, Troasah an fe thla ta a.

⁹Chun, zânah Paulain a mang angin Makedonia rama mi mi pakhat ngîrin, “Makedonia ramah hung kai la, mi ṭhangpui rawh,” tia ngên ngênin a hmu a.

¹⁰Chun, chu mang chu a mang zo phingleh, Makedonia rama chun fe kan tum ta a, an kuoma Chanchin Ṭha hril dingin Pathienin a mi ko ti kan hriet a.

¹¹Chun, Troasa inthawk chun lawngin kan suok a, tluongtakin Samotrakiah kan riek a, a zînga chun Neapoliah kan fe nâwk a;

¹²chun, chutaka inthawk chun Philippiah kan fe a, chu khuo chu Makedonia rama khaw pakhat a nih, chu biela chun khaw pawimaw tak a na, Roma inthawka mi inpêmhai khuo a nih. Chu khuoa chun ni tam rei kan châm a.

¹³Chun, Châwlniin kul kawtkhâr puo tienga vadung panga, ṭawngṭaina hmun ni dinga kan ringa chun kan fe a; chun, kan ṭhunga nuhmei hung khâwmhai kuoma chun thu kan hril a.

¹⁴Chun, a hming Luda, puon senduk zawrtu, Thuotira khuoa mi, Pathien betu nuhmei pakhatin kan thu a hriet a; chun Paula thu hril zâwm dingin Lalpa chun a lungril a sukvar ta a.

¹⁵Chun, ama le a sûnghaiin baptisma an chang zo chun, “Lalpa ring tak zeta in mi ruot chun, ka inah hung tlung ro,” tiin a mi ngên a mi ngên a, a mi chel ta a.

¹⁶Chun, ṭawngṭaina hmuna kan fe lai chun suok nunghâk tû amanih, khawhrizâwl aisânthiemin a mîn tuokpui a, ama chun a aisân lei chun a puhai chu sum tamtak ân hmutir hlak a.

¹⁷Ama chun Paula le keini a mi zui a, “Hienghai, sandamna lampui hriltu cheu hi, Achunghnungtak Pathien suokhai an ni hi,” tiin a khêk a.

¹⁸Chuong ang chun, ni sâwt rei a thaw hlak a. Chuongchun, Paula chu a lungni ta naw a, a ngha a, khawhri kuoma chun, “Isu Krista hmingin a sûnga inthawkin suok thu ka pêk che,” a ta. Chun, chu lai tak chun a suok nghâl ta a.

¹⁹Chun, a puhai chun an sum hmuna ân hmang ti an hriet a, Paula le Sila chu an man a, hotuhai hmaah dâwr hmunah an kei lût a.

²⁰Chuongchun, thu rêltuhai kuomah an ṭhuoi a, “Hienghai hi Judahai an na, kan khuo an sukbuoi bêk bêk a,

²¹dân kan pawm thiengnaw le kan zâwm thiengnaw dâm an hril a, Rom mi kan ni si a,” an ta.

²²Chuongchun, mipuihai khawm chu tirkohai thaw ding chun an hung inthawk ve a, thu rêltuhai chun an puonhai an the thlâkpêk a, hmawla vuok thu an pêk a.

²³Chun, vawi tamtak an vuok zoin intângna inah an khum a, a vêngtu kuomah himtaka vêng ding an ti tlat a.

²⁴Chuong ang lâwma thu an pêk leiin rip sûngrilah a khum a, an kehaia chun thing kawl ân buntir a.

²⁵Nisienlakhawm, zân rila chun, Paula le Sila chu Pathien kuomah an ṭawngṭai a, hla an sak a, intânghai chun an ngai a;

²⁶chun, kârlovin simkhawleihnuoi nasatakin a hung inhnîng a; chun, kawtkhâr po po chu ân hawng nghâl a, mi tin kawl bunhai chu a hung insût vawng ta a.

²⁷Chun, a vêngtu a ininnghil chu a hung har a, intângna in kawtkhârhai chu inhawngin a hmu a, intânghai chu an tlân hmang amanih a ta, kâwlhnâm a phawi a, insukhlum a tum a.

²⁸Nisienlakhawm, Paula chu rawl inringtakin a khêk a, “Iengkhawm inlaw naw, kan rêngin hitaka hin kan la um vawng annâwm,” a ta.

²⁹Chun, a vêngtu chun khâwnvarhai a lam a, ân châwm lût a, ṭia inthin pumin Paula le Sila hmaah a bawkkhup a.

³⁰Anni chu a ṭhuoi suok a, “Puhai, sandama um dingin ieng am ka thaw ding?” a ta.

³¹Chun, anni chun, “Lalpa Isu ring la, chuongchun, sandamin um i tih, nang le i sûnghai leh,” an ta.

³²Chun, a kuoma le a ina um po pohai kuoma chun Pathien thu an hril a.

³³Chu zân chun, chu lai la la chun, a ṭhuoi a, an vuokna invuolhai chu a sâwpfai a; chun, ama le a sûnghai po po chun baptisma an chang nghâl ta a.

³⁴Chun, a inah a hang ṭhuoi a, fâk ding a pêk a, chun, Pathien an ring leiin, ama chu, a sûnghai po po le chun an hlim ta bêk bêk a.

³⁵Chun, nisa a suok chun rorêltuhai chun, “Kha hai kha insuo rawh,” ti dingin manmihai an tir a.

³⁶Chun, intângna in vêngtu chun, Paula kuomah an thu a hril a, “Rorêltuhai chun insuo ding cheuin mi an hung tir a; chuleiin, tuhin hung suok unla, thlamuongtakin fe ro,” a ta.

³⁷Nisienlakhawm, Paula chun an kuomah, “Rom mi kan ni si a, kan thiem le kan thiem naw hre lovin vântlâng mithmuin an mi vuok a, intângna inah an mi khum a; tuhin arûkin an mi hnawt suok vei ding a ni maw? Ni thei naw ni; anni ngei hung hai sienla mi hung ṭhuoi suok raw hai se,” a ta.

³⁸Chuongchun, manmihai chun, chuong thu chu rorêltuhai kuoma chun an hril a. Chun, Rom mi an nih ti an hriet chun an ṭi ta a.

³⁹An va fe a, an thlêm a, an ṭhuoi suok a, khuoa inthawk chun fe hmang dingin an ngên a.

⁴⁰Chun, intângna ina inthawk chun an suok a, Luda ina chun an lût a; chun, unauhai chu an hmu a, an thlamuon a, an suok ta a.