Read Hmar THILTHAWHAI 2 Bible Online

THILTHAWHAI 2 - Hmar bible

THILTHAWHAI 2

¹Chun, Pentikost ni a hung tlungin, an rêngin hmun khatah an um khâwm vawng a.

²Chun, kârlovin vâna inthawkin ri thlipui hrâng angin a hung tlung ta phut a. Chu chun an ṭhungna in chu a suksip ta vawng a.

³Chun, leihai ama le ama insemin, mei angin an kuomah a hung inlâr ta a.

⁴Chun, an chungah a chuong seng a, an rêngin Thlarau Inthiengin an sip ta vawng a, Thlarauin ân ṭawngtir ang peiin ṭawng danghaiin an hung ṭawng ta a.

⁵Chun, vânkhuphnuoia hnam tin laia mi Pathien ngaisak Judahai Jerusalemah an châm a.

⁶Chun, chu ri chu an hriet phingleh mipui an hung inkhâwm a, mi tinin an ṭawng chu mâni ṭawng sengin an lo hriet leiin an lungrilin an lo buoi a.

⁷Chun, an rêng chun an lunginzîng a, mak an ti hle a; “En ta u, hieng a ṭawnghai po po hi Galili rama mi an ni naw am a nih?

⁸Iengtiziea ei rênga ei piengpui ṭawng anga ei hriet seng am a na?

⁹Ṭhenkhat Parthai hnam dâm, Medai hnam dâm, Elamatai hnam dâm, ei ni si a; Mesopotamia rama um dâm, Judai rama um dâm, Kappadoki rama um dâm, Ponto rama um dâm, Asia rama um dâm,

¹⁰Phrugia rama um dâm, Pamphulia rama um dâm, Aigupta rama um dâm, Kurini kâwl vêla Libu rama um ei na,

¹¹ṭhenkhat Rom khaw mikhuol Judahai le an saphunhai leh ei na, ṭhenkhat Kret thlierkâra mi le Arab rama mi ei ni si a; nisienlakhawm, Pathien thilthaw ropuihai an hril mâni ṭawng sengin ei hriet si hi!” an ta.

¹²Chun, an rêng chun mak an ti hle a, a ngaina an hriet naw a, “Hieng hi a umzie iem a na?” tiin an indawntuo a.

¹³Ṭhenkhatin an nuisan a, “Uoin thar an inrui a ni hi,” an ta.

¹⁴Nisienlakhawm, Peter chu sâwm le pakhathai leh an ngîr a, ama chun râwl inringtakin, an kuomah a hril a, “Nangni Judai rama mihai, nangni Jerusalema um po pohai, hieng hi hre unla, ka thu khawm lo ngai ro.

¹⁵Hienghai hi in ring angin an inrui nawh, vairik chau a la ni hi.

¹⁶Hieng hi zâwlnei Joelin a hril kha a ni lem:

¹⁷Pathienin, ‘Ni nuhnungahai chun hieng hi nîng a ta, Mi po po chungah ka Thlarau buok ka ta; Chuongchun, in naupahai, in naunuhaiin ka thu hril an tih; In tlangvâlhaiin inlârnahai hmûng an ta, In tarhaiin mangah mang an ta;

¹⁸Anih, chuong nia chun ka suokpahai, ka suoknuhai chunga khawm, Ka Thlarau buok ka ta, ka thu hril an tih,

¹⁹Chun, chungtieng vânah thilmakhai, Hnuoi tieng leihnuoiah inchiknahai inhmutir ka tih: Thisen dâm, mei dâm, meikhu hu dâm,

²⁰Nisa inthimin inchang a ta, Thla thisenin inchang a ta, Lalpa ni ropuitak le hming inthangtak chu A hung tlung hma chun;

²¹Chun, hieng hi nîng a ta, Tûkhawm Lalpa hming lam taphawt chu sandamin um an tih,’ a tih, a ti kha.

²²“Nangni Israel mihai hieng thu hi lo ngai ro; Nazareth Isu chu, Pathienin nangni lai thilthaw mak dâm, thilmak dâm, inchikna dâm inthawtirin ân hriet chiengtir cheu kha,

²³Nangni ngeiin in hriet ang khan; kha mipa kha Pathien rêl tlat le hriet lâwk angin an inmantir a, nangnîn mi suolhai kutin krawsah in hemde a, in sukhlum ta a.

²⁴Kha mipa kha Pathienin thina khuopnahai chu a sûtpêk a, a keitho ta a; ama chu thina chel sawng ruol a ni naw leiin.

²⁵Chun, David chun ama thu chu a hril a, ‘Ka hmaah kumkhuoin Lalpa chu ka hmu hlak, Kân hnîng nawna dingin ka changtieng a um a nih;

²⁶Chuleiin, ka lungril a hlim a, Ka lei khawm a lâwm a; Chuleiin, ka taksa khawm beiseitakin um bawk a tih;

²⁷Ka thlarau mithi khuoah mâksan naw ti ni a, I mi inthieng hmawnhmangna hmu khawm phal naw ti ni a;

²⁸Nangin hringna lampuihai i mîn hriettir a, Nangin i hmêlin lâwmin mi suksip i tih,’ tiin.

²⁹“Unauhai, chi thlatu David chanchin hi ṭi lovin in kuomah ka hril cheu a; ama chu a thi a; phûm khawm an phûm tah annâwm, a thlân khawm tu chen hin ei kuomah a la um zing a.

³⁰Ama chu zâwlnei a na, Pathienin a ṭhalbea mi tû amanih a ṭhungpha chungah ân ṭhungtir ding a nih ti inkhâmin a hril ti a hriet a.

³¹Chuongchun, chuong chu a lo hriet lâwk zing leiin, Krista thonâwkna ding thu a hril a nih, ‘Mithi khuoah mâksanin a um naw a, a ruong khawmin hmawnna a hmu bawk nawh,’ tiin.

³²Chu Isu chu Pathienin a keitho nâwk ta hrim a, chu chu kan rêng hin a hretu kan nih.

³³Pathien kut changtienga chawimawiin a um a, Thlarau Inthieng tiem chu Pa kuoma inthawkin a hmu a, tuta in hmu le in hriet hi a hung buok tah a ni hi.

³⁴David chu vânah a hang lâwn naw a nih, ama ngeiin, ‘Lalpa chun ka Lalpa kuomah, Ka changtieng ṭhung zing rawh,

³⁵I hmêlmahai i kepha innghatnaa Ka siem hmakhat chu,’ a ti a, a ti lem a ni kha.

³⁶“Chuongchun, Isu in hemde ngei kha, Pathienin Lal le Krista ni fâwmin a siem tah ti, Israel hnam tinin hre mawl raw hai se,” a ta.

³⁷Chun, chuong thu chu an hrietin an lungrilah sun ang an lo ni ta a, Peter le tirko danghai kuoma chun, “Unauhai, iengtin am thaw tâng kan ta?” an ti a.

³⁸Peter chun an kuomah, “In suolhai ngaidamna dingin, sim unla, Isu Krista hmingin baptisma chang seng ro; chuongchun, Thlarau Inthieng pêk hi hmûng in tih.

³⁹A tiem kha, nangni ta ding khawmin, in nauhai ta ding khawmin, hlataka mi po po ta ding khawmin, Lalpa ei Pathienin a kuoma a kohai taphawt ta dingin a ni ie,” a ta.

⁴⁰Chun, thu dang tamtakin a hrilfie a, “Tulai ruolthar rilohaia inthawk hin insukhim ro,” tiin ân fui a.

⁴¹Chun, a thu zâwm taphawt chun baptisma an chang ta a; chu nia chun mi sâng thum lai belsain an um a.

⁴²Chun, tirkohai inchûktirin, inpâwlin, bei khawiin, ṭawngṭaiin ṭhahnemngaitakin an um zing a.

⁴³Chun, mi tinin an ṭi ta a; tirkohai chun thilmak le inchikna tamtak an thaw a.

⁴⁴Chun, a ring taphawt chun iengkim an inṭâwm a,

⁴⁵an thil neihai, an thuomhnawhai an zawr a, an mamaw dai tâwk seng chauin an rênga kuoma chun an sem hlak a.

⁴⁶Ni tin lungril hmunkhatin Pathien biekina chun ṭhahnemngaitakin an um hlak a, an in tieng khawm bei an khawi a, hlimtak le lungawitakin bu an fâk hlak a.

⁴⁷Pathien an inpâk a, mi po po lâwmzâwngin an um hlak a. Chun, sandama hung um pei taphawthai chu, Lalpain ni tin an kuomah ân ṭhangsatir pei hlak a.