Read Hmar THILTHAWHAI 20 Bible Online

THILTHAWHAI 20 - Hmar bible

THILTHAWHAI 20

¹Chun, buoina chu a re zo chun, Paulain inchûktirhai ân kotir a, ân fui a, ṭawng bauṭhain a ṭhe a, Makedonia rama fe dingin a suok ta a.

²Chun, thu tamtaka inchûktirhai infui peiin chu ram chu a fang suok a, Grik ram a tlung ta a.

³Chun, chutaka chun thla thum a thang hnungin Suria ram tieng lawngin a fe ding a na, Judahaiin ama an phierrûk leiin Makedonia rama fe nghâl a tum nâwk lem ta a.

⁴Chun, Purrha naupa Sopater Beroia khuoa mi hai, Thessalonikaa mi Aristarka le Sekunda hai, Derbea mi Gaia hai, Timothe hai, Asia ram mi Tukik le Trophim hai, ama leh Asia rama chun an va fe ve a.

⁵Chuonghai chun kan hma an ṭhuoi a, Troasa chun an mi lo nghâk zing a.

⁶Keini ruok chu Chawlṭhanglo Bei ruoiṭhe ni po po hnunga chun Philippia inthawk chu lawngin kan suok a, ni nga chenah Troasah an kuom kan tlung a; chutaka chun ni sari kan châm a.

⁷Chun, ni saria ni hmasataka chun, bei khawi dinga kan um khâwm laiin, Paula chu a zînga fe el ding ani leiin ṭhahnemngaitakin thu a hril a; zân ril chenin thu a hril pei a.

⁸Chun, pindan chunghnung kan um khâwmnaa chun khâwnvar tamtak a um a.

⁹Chun, tlangvâl pakhat, Eutuk an ti chu tukvera chun a ṭhung a, Paula thuhril chu a sâwt ta êm leiin inhnik takin a lo inlusu a. A îmu chun a hne ta êm leiin in sâwng thumnaa inthawk chun a tla a, a thi sain an zu lâk a.

¹⁰Nisienlakhawm, Paula a ṭum a, a zu baw a, a zu pawm a, “Thlaphâng naw ro, a hnuk a la chat nawh,” a ta.

¹¹Chun, Paula a hang lâwn nâwk a, bei chu a khawi a, bu a fâk a, sâwttak, khawvar rakin an kuomah thukhawchâng a hril a, chu hnunga chun a fe ta a.

¹²Chun, tleirawl chu damin an ṭhuoi a, an thlamuong zie chu namên ân nawh.

¹³Chun, keini ruok chu lawngah kan lo fe ta a, Asso pan dingin lawng chun kan suok hmasa a, chutaka chun Paula chu inchuongtir kan tum a; ama chun kea hung a tum leiin chuong ang chun amain a ruot hrim a nih.

¹⁴Chun, Assoah a mi hung fin nâwk chun kan inchuongtir ta a, Mitulin kan tlung a.

¹⁵Chutaka inthawk chun lawngin kan fe nâwk a, a zînga chun Kia thlierkâr zâwn kan tlung a; a zing nâwk Sami thlierkâr kan sir a; chu zîng nâwk chun Mileti kan tlung nâwk a.

¹⁶Chun, Paulain Asia rama um sâwt a nuom naw leiin, Ephesi chu lawnga khêl a tum sa hrim a na, a thei chun Jerusalemah Pentikost ni nang a tum a, a fe inhmaw a nih,

¹⁷Chun, Miletia inthawkin Ephesiah mi a tir a, kohrana upahai a kuomah ân kotir a.

¹⁸Chun, a kuoma an hung tlung chun, ama chun an kuomah, “Asia ram ka sir hlima inthawk tah, in kuoma ka um sûng po khan ka um dân kha in hriet a.

¹⁹Judahaiin an mi phierrûk leia mitthli tla le, thil rinum ka chunga tlahai tuor pumin thuhnuoirawltakin Lalpa rawng ka bâwl hlak kha.

²⁰Khâng khan a sâwt ding thil chu in kuomah iengkhawm hril intîm ka nei naw a, vantlâng lai dâm inchûktir ka ma naw kha.

²¹Judahai le Grikhai kuoma khawm Pathien tienga lungril inlet thu le, ei Lalpa Isu Krista tieng ringna ding thu kân hriettir hlak kha.

²²Chun, hre ro, tuhin lungrila fe lo thei lova kân hriet leiin, Jerusalemah ka fe ding a ni hi, chutaka chun ka chunga thil hung tlung ding chin ka hriet nawh.

²³Thlarau Inthiengin ‘Khuopna le rinumnain a tuok che’, tiin khaw tinah a mîn hriettir hlak, chu chau chu ka hriet a nih.

²⁴Nisienlakhawm, kân tlânsiekna lam ka hmabâk suo ding le, Pathien lunginsietzie Chanchin Ṭha inhriettir ding, Lalpa Isua inthawka kha rawngbâwl sin ka hmu kha, thaw zo phawt lang chu, ka hringna khawm thlâkhlâ tlâkah ka ruot nawh.

²⁵“Chun, hre ro, nangni po po, Pathien ram thu khêkpuia kân vâk kân vâkna hlakhai hin ka hmêl hmu nâwk ta naw ti niu ti ka hriet a.

²⁶Chuleiin, mi po po thisenah ka hul a nih ti vawisûn hin kân hriettir cheu.

²⁷Pathien thiltum po po arêngin in kuoma hril kân tîm naw a.

²⁸Pathien kohran ama thisena a inchâwk chu, châwm dingin, nangni le inrawihai po po chunga chun fimkhur ro, Thlarau Inthiengin an chunga hotuin a siem cheu hi.

²⁹Ka fe hnungin satene hrânghai nangni lai hung lût an ta, pâwlruol chu hla naw ni hai ti ka hriet.

³⁰Nangni laia mi khawm, inchûktirhai an kuoma inkawptir dingin thu hran hril la hung um an tih.

³¹Chuleiin, ngaiven ro; kum thum rau, mitthli tla pumin asûn azâna, mi tin hal ka ma naw kha hre zing ro.

³²“Tuhin Pathien kuomah le a lunginsietna thuah kân kawltir cheu, chu chun a siem lien thei cheu a, mi inthienghai lai ro chan ân neitir thei bawk cheu a.

³³Tu tangkahai, rângkachakhai, silfênhai khawm kân hnar ngai naw kha.

³⁴Hi kuthai hin kei le ka ruolhai pawimaw chu a them suok hlak kha nangni ngeiin in hriet a.

³⁵Iengkim ka thaw taphawt ka thawhmu hlak cheu kha, chuonga sininrim pum le, Lalpa Isu thu hre zing pumin mi hrâtnawhai in ṭhangpui ding a nih; ama ngeiin, ‘Iengkhat lâk nêkin pêkin lukhâwng a nei lem’, a ti kha,” a ta.

³⁶Chun, chuong ang thu chu a hril zo chun, a dingṭhaṭhuon a, an rêngin a ṭawngṭaipui a.

³⁷Chun, an rêng chun an ṭap a, Paula chu an kuo a, an fâwp an fâwp a.

³⁸A hmêl an hmu nâwk naw ding thu a hril chu an lungngaina tak a nih. Chun, lawng chen chun ama an inthla ta a.