Read Hmar THILTHAWHAI 23 Bible Online

THILTHAWHAI 23 - Hmar bible

THILTHAWHAI 23

¹Chun, Paula chun rorêltuhai chu a en zing a, “Unauhai, vawisûn chen hin Pathien mithmua ṭha tienga ka hriet taphawt chu thawin ka um hlak,” a ta.

²Chun, thiempu Laltak Anania chun, Paula kâwla ngîrhai kuomah, a baua benpêk ding a ta.

³Paula chun a kuomah, “Nang lung bang nâlvârpa, Pathienin ben lem a ti che; nang Dân anga mi ngaituo dingin i ṭhung a, Dân naw anga mi ben ding i ti vei a ni maw?” a ta.

⁴Chun, a kâwla mihaiin, “Pathien thiempu Laltak i hal vei maw?” an ta.

⁵Chun, Paulain, “Unauhai, thiempu Laltak a ni ti ka hriet nawa a nih, ‘I chipuihai hotu chungah thu ṭhanaw hril naw’ ti khawm ziek a ni si a,” a ta.

⁶Chun, Paulain a ṭhen Saddukai, a ṭhen Pharisaihai an nih ti a lo hrietin rorêltuhai lai chun a khêk a, “Unauhai, Pharisai ka nih, Pharisai naupa khawm ka nih; beiseina le mithi thonâwkna thuah suosalin ka um a ni hi,” a ta.

⁷Chun, chu chu a hril phingleh, Pharisaihai le Saddukaihai an lo insêl a, rorêltuhai chu an inkhing ta a.

⁸(Saddukaihaiin, “Mithi thonâwkna hrim a um nawh, vântirkohai, thlarauhai khawm an um bawk nawh,” an ti hlak; Pharisaihai ruok chun chu kawng pahni chu a um an awi si a.)

⁹Chuongchun, nasatakin an buoi ta a; Pharisai tienga mi Dân inchûktirtu ṭhenkhat an ngîr a, an sêl a, “Hi mipa hi a suolna iengkhawm kan hriet nawh ie; thlarau khawmin, vântirko khawmin ama hi be sienla ieng am pawi a ta?” an ta.

¹⁰Chun, an insêl nasa deu deu leiin, sipai hotu laltak chun Paula an kei nâwi a ṭi a, sipaihai kuomah, zu fea anni laia inthawka kulbînga hung ṭhuoi lût el dingin a ta.

¹¹Chun, zâna chun Lalpa chu Paula kâwlah a ngîr a, “Thlamuongtakin um rawh, Jerusalema ka thu în hriettir ang bawkin Roma khawm în hriettir ding a nih,” a ta.

¹²Chun, nisa a suok chun Judahai an ṭhang ruol a, Paula an that hmakhat chu iengkhawm faa dâwn lo dingin an inkhâm a.

¹³Chu thu phierrutuhai chu sâwmli nêka tam lem an nih.

¹⁴Anni chu thiempu lalhai le upahai kuomah an fe a, “Paula kan that hmakhat chu iengkhawm intem lo dingin kan inkhâm tah a nih.

¹⁵Chuleiin, nangnîn, rorêltuhai le a thu fel nâwkzuola ngaituo tum angin, in kuoma ṭhuoi thla dingin sipai hotu laltak kuomah pehêl deuin hang hril ro; in kâwl hnai a tlung hma khawmin keini ama that dingin kan inpei zing a nih,” an ta.

¹⁶Nisienlakhawm, Paula farnu naupa chun an inchân thu chu a lo hriet a, kulbînga chun a va lût a, Paula a va hril a.

¹⁷Chun, Paula chun sipai za hotu pakhat a ko a,“Hi tlangvâl hi hotu laltak kuoma chun ṭhuoi rawh; a kuomah thu ieng amanih hril ding a nei a ni âwm ie,” a ta.

¹⁸Chuongchun, sipai hotu laltak kuoma chun a va ṭhuoi a, “Paula intâng khan a mi ko a, hi tlangvâl hi i kuoma hung ṭhuoi dingin a mi tir a, i kuomah thu ieng amanih hril ding a nei a ni âwm ie,” a ta.

¹⁹Sipai hotu laltak chun, a kutah a chel a, a fe hranpui a, inrûkin, “Ieng am mi hril ding i nei chu?” a ta, ân dawn a.

²⁰Chun, ama chun, “Paula thu fel nâwk zuola i ngaituo ding angin, zîngah rorêltuhai kuoma ṭhuoi thlâk dingin Judahaiin hni che an remti tlâng a.

²¹Nisienlakhawm, an thu lo awi naw rawh; anni laia mi sâwmli nêka tam lemin an inchân zing a, chuonghai chun ama an that hmakhat chu iengkhawm faa dâwn lo dingin an inkhâm a; tuhin i thu nghâkin inpei sa zingin an um a nih,” a ta.

²²Chun, sipai hotu laltak chun tlangvâl chu ân fetir a, “Hieng thu hi i mîn hriettir tah ti tukhawm hril naw rawh,” a ta.

²³Chun, sipai za hotu pahni a ko a, “Zân, zâl hun pha, Kaisari chena fe ding sipai za hni leh, sakawr chung chuong mi sâwmsari leh, fei chawi mi za hni leh siem ro,” a ta.

²⁴Chun, Bawrsâp Felik kuoma chun, himtaka ân tlun theina dingin, Paula an inchuongtirna dingin sahai lo siem ding a ti bawk a.

²⁵Chun, hieng ang hin lekha a ziek a;

²⁶“Klaudi Lusiain Felik Bawrsâp ṭhatak chibai a bûk.

²⁷“Hi mipa hi Judahaiin an man a, an that ding laiin an kuomah sipaihai ṭhuoiin ka fe a, Rom mi a nih ti ka hriet a, ka san suok ta a.

²⁸Chun, an hêkna san hriet ka nuom a, an rorêltuhai kuomah ka ṭhuoi thlâk a.

²⁹Chuongchun, an dân thu ieng ienga manih hêk a nih ti ka hriet a, nisienlakhawm, an hêkna thuah thina le khuopna khawp rau dingin iengkhawm ka hriet si nawh.

³⁰Chun, Judahaiin ama an inchân ti miin an mîn hriettir phingleh, i kuomah ama hi ka hung tir nghâl ta a nih, a hêktuhai khawm, a chunga thupawi an nei taphawt chu i hmaa hril dingin thu ka pêk bawk a,” tiin.

³¹Chuongchun, sipaihai chun a thupêk ang chun, Paula chu a zân a zânin an ṭhuoi a, Antipatri an tlungpui a.

³²A zînga chun sakawr chung chuong mihai chu, ama le fe pei dingin an kîr san a, kulbînga chun an fe nâwk ta a.

³³Chun, anni chu Kaisari khuo chu an tlung a, Bawrsâp kuomah lekha chu an pêk a, Paula khawm a hmaah an inngîrtir a.

³⁴Bawrsâp chun a tiem zoin Paula umna ram ân dawn a. Chun, Kiliki ram mi a nih ti a hriet phingleh,

³⁵“A hêktuhai che an hung tlung phingleh, i thupawi ngaituong ka tih,” a ta. Chun, Herod inah vêng ding thu a pêk a.