Read Hmar THILTHAWHAI 26 Bible Online

THILTHAWHAI 26 - Hmar bible

THILTHAWHAI 26

¹Chun, Agrippa chun Paula kuoma chun, “I thiemna thu hril thei i tih,” a ta. Chun, Paula chun a kut a phar a, a thiemna thu a hril a,

²“Lal Agrippa, Judahaiin an mi hêkna po poa ka thiemna thu vawisûn hin i hmaa ka hril ding lei hin lâwmin kân hriet;

³hi hi ka lâwmna tak chu a nih; a bîkin Judahai hnam dân po po le thubuoihai i hriet hne êm leiin, chu chu ka vângnei kan tina a nih; chuleiin, muongtaka mi ngai pêk dingin ka ngên che.

⁴A tîra, ka naupang laia inthawk ka chihai lai le Jerusalema ka um dân kha Judahai po poin an hriet a.

⁵A tîra inthawka ka chanchin an hriet a, khânga ei sakhuo pâwl khermei tak dân pângngaia Pharisaia ka um kha; an nuom phawt chun an mi hrilpui thei a nih.

⁶Chun, Pathienin ei thlatuhai kuoma thu a tiem kha beisei kawng thuah tuhin hitaka hin rorêlpêk dingin ka ngîr hi;

⁷chu thutiem chu, ei hnam sâwm le pahniin, a sûn a zâna Pathien rawng ṭhahnemngaitaka bâwlin hmu an beisei hlak. Aw, lalpa, chu beiseina lei chun Judahaiin an mi hêk a ni hi.

⁸“Pathienin mithihai a keitho ti hi iengdinga awium nawa in ruot am a na?

⁹Kei khawmin Nazareth Isu hming kal zâwngin thil tamtak thaw lang ṭhain ka ring hlak a.

¹⁰Chuongang chu Jerusalemah ka thaw bawk hlak; chun, thiempu lalhai kuomah thu ka hmu a, mi inthienghai laia mi tamtak intângna inah ka khum bawk hlak a; chun, an sukhlum laiin sukhlum remti tieng ka ṭhang bawk hlak a.

¹¹Chun, inkhâwmna in tinah ka hrem rawp hlak a, Pathien inhrilsiettir ka tum hrâm hlak a; an chungah ka rilo bêk bêk a, ram dang khuo chena khawm ka suknawmna hlak a.

¹²“Chuong ang thaw dingin, thiempu lalhai thu hmuin le, an tirna lekha chawiin, Damaskaah ka fe a;

¹³chun, i aw, lalpa, lampuia ka fe laiin, sûnchang lai takin, vâna inthawkin var, nisa nêka var lem, kei le ka fepuihai vêl chu a hung khaw var a.

¹⁴Chun, kan rêngin hnuoiah kan tlu a, Hebrai ṭawngin, ‘Saula, Saula, iengdinga nangin i mi suknawmna am a na? Sunna hmawl khêng chu i ta dingin a na ie,’ tiin râwl ka hriet a.

¹⁵Chun, keiin, ‘Tu am i na Lalpa?’ ka ta. Lalpa chun, ‘Isu i suknawmnat hi ka nih.

¹⁶Nisienlakhawm, tho la, ngir rawh; hieng i thil hmuhai le, i kuoma ka inlarna ding thilhai leh chu rawngbâwla le hretua siem ding chein, i kuomah ka hung inlâr a ni hi.

¹⁷Mi po po le Jentailhai kuta inthawkin sanhim ka ti che.

¹⁸An mit sukvar dingin an kuomah ka tir che hi, chuongchun, inthim chu var tieng nghatsan an ta, Setan thuneina chu Pathien tieng nghatsan an tih, suol ngaidamna an hmuna dingin le an mi ringna leia inthieng tahai kuomah ro chan an nei ve theina dingin,’ a ta.

¹⁹“Chuleiin, lal Agrippa, vâna mi inlâr chu ka sêl naw a,

²⁰a tîrin Damaskaa mihai kuomah, chu hnunga chun Jerusalema mihai kuoma dâm, Juda ram tina mihai kuoma dâm, Jentailhai kuoma dâm khawm sim hming inbûk tlâka thil thawa, sima, Pathien tieng an nghatna dingin ka hril lem hlak a nih.

²¹Chuong lei chun, Judahaiin Pathien biekinah an mi man a, mi sukhlum an tum a.

²²Nisienlakhawm, Pathiena inthawka ṭhangpuina ka hmu leiin vawisûn chenin mi chînhai le mi lienhai kuomah thu inhriettirin ka la um zing a, zâwlneihai le Mosiein hung tlung ding an ti thu chau naw chu thu dang hril lovin;

²³khânga Krista chun rinum tuor a ta; chun, mithi laia inthawka a thonâwk leiin mi po po kuoma le Jentailhai kuoma khawm var inhmutirtu hmasatak nîng a tih, an ti thu kha,” a ta.

²⁴Chun, chuong anga a thiemna thu a hril laiin, Festa chun rawl inringtakin, “Paula, în vêt a nih, în chûk tamin a sukvêt che a nih,” a ta.

²⁵Nisienlakhawm, Paula chun, “Festa ṭhatak, kân vêt naw ie; thu indiktak le thu vartak ka hril lem a ni hi.

²⁶Hieng thu hi lal hin a hriet annâwm, a kuoma khawm ṭi lovin ka hril hi; hieng thil hi a kuomah iengkhawm ip a ni nawh ti indiktakin ka hriet deh, hieng hi in kila thaw a ni si naw a.

²⁷Lal Agrippa, zâwlneihai thu i awi am? I awi ti ka hriet,” a ta.

²⁸Chun, Agrippa chun Paula kuomah, “Sâwtnawtê chau mi thlêm a, Kristiena mi siem i tum a ni hi,” a ta.

²⁹Paula chun, “Sâwt sienla, sâwt naw sienla, nang chau ka ti naw a, vawisûna ka thu hretuhai po po khawm hi, keia ang bawka um dingin Pathien kuomah ka hni a nih, kawlhai ruok hi chu bun ve lovin,” a ta.

³⁰Chun, lal leh, Bawrsâp leh, Berniki le an kâwla ṭhunghai le chun an tho tâwl a;

³¹chun, a tumin an fe a, an inbiek a, “Hi mipa hin thina le kawl bunna khawp rau iengkhawm thil a lo thaw luo naw hi,” an ta.

³²Chun, Agrippain Festa kuomah, “Hi mipa hin Kaisar kuoma intlun lo tiem ta naw chu ni sienla, a suok el ding bah,” a ta.