Read Hmar THILTHAWHAI 27 Bible Online

THILTHAWHAI 27 - Hmar bible

THILTHAWHAI 27

¹Chun, Itali rama lawnga kan fe ding an sukthlûk phingleh, Paula le mi intâng dang tuhai amanih,

²Augusta pâwla mi sipai za hotu Julia an inkawltir a. Adramuttium khaw lawngi Asia ram tuipui panga khaw umhai sir dingin kan chuong a, tuipuiah kan fe ta a; Makedonia rama mi Aristarka, Thessalonikaa mi kan kuomah a um a.

³A zîngah Sidon khuo kan sîr a, chun, Julia chun Paula a sukṭha hle a, insukhar dingin a ruolhai kuomah ân lêng tir a.

⁴Chun, chutaka inthawkin, tuipuiah kan fe nâwk a, thliin a ni naw tieng a mi nam leiin Kupra thlierkâr phên thli inupna tieng kan zâm a.

⁵Chun, Kilikia ram le Pamphulia ram dep tuipui kan khêl hnungin, Lukia rama Mura khuo kan tlung a.

⁶Chutaka chun sipai za hotu chun, Alexandria khaw lawng, Itali ram sir ding chu a hmu a: chutaka chun a mîn chuongtir a.

⁷Ni sâwt tak damtê têin kan fe a, Knidos khaw zâwn intak takin kan tlung hrâm a, thliin a mi dangkîr leiin Salmoni hrûlah Kret thlierkâr phên thli inupna tieng kan zâm a;

⁸chun intak takin vapang kan hrût kan hrût a, likilkawi, Mawi an ti chu kan tlung ta a; chu kâwla chun Lasai khuo a um.

⁹Chun, ni tamtak ân hmang ta lei le, lawnga fe ṭi a um ta leiin, (Bu nghei ni chu a lo khêl ta si a), Paula chun anni chu ân fui a,

¹⁰an kuomah, “Puhai, tuta lawnga fe hi sietna le bohmangna nasatak a tlung ding a nih ti ka hriet, thuomhnaw le lawng chunga chau ka ti naw a; eini chunga khawm ka ti a nih,” a ta.

¹¹Nisienlakhawm, sipai za hotu chun, Paula thu hril nêk chun lawngpu le lawng neitu thu hril a awi lem a.

¹²Chun, thlasik tuorna dingin likilkawi chu a rem naw leiin, a tam lemin chutaka inthawka tuipuia fe suoka, Phoiniki tlung hrâma, chutaka thlasik tuor an rawtpui a; Phoiniki chu Kret thlierkâra likilkawi pakhat a nih, hmâr sak le sim sak sawng a nih.

¹³Chun, sim thli chu damtê tea a hung hrâng phingle chun, an ditzâwng an hmu amanih an sâwn a, thîrchakai chu an khaisuok a, Kret thlierkâr pang chu an hrût an hrût a.

¹⁴Nisienlakhawm, sâwt nawtê hnunga chun khawmuol tienga chun thli natak a hung hrâng thla ta a, chu thli chu Eurokuilo[9] an ti hlak.

¹⁵Chun, lawng chu a hung nam fûk a, thli tieng ân nghat thei naw phingleh kan inthla ta a, a mi lên a mi lên el ta a.

¹⁶A hming Klauda thlierkâr chîtê phên thli inupna tieng chun kan zâm a, intak takin lawnglêng kan hum thei hrâm a.

¹⁷Chun, an keisuok hnungin ṭhangpuina hrui dâm an hmang a, lawng hnuoitieng an lâk vêt a, an khuop a. Puon zarna iengkim an sukthlûk a, chuong naw chun Surtia inlên lût an ṭi a, chuongchun, a mi lên a mi lên ta a.

¹⁸Chun, a zîngah tuifâwnin a mi vawr hrep lei chun, lawng thuomhnaw phurhai chu tuiah an pei ṭan ta a.

¹⁹A zîng nâwk chun anni kut ngeiin lawng hmangruohai an pei suok nâwk ta a.

²⁰Chun, ni sâwttak nisa khawm, arasi khawm ân lang naw a, thlipui nastakin a mi nuoi a, dam hrim kan inbeisei ta naw a.

²¹Chun, bu fa lova sâwttak an um hnungin, Paula anni laiah a ngîr a; “Puhai, Kret thlierkâra khan sût lovin, ka thu kha awi unla, hieng sietna le bohmangna hi in tlung naw ding bah.

²²Nisienlakhawm, tukhawm hin lungmuongtaka um dingin kân fui cheu, nangni lai tukhawmin in hringna inhmang naw ti niu, lawng ruok hi chu ân hmang ding a ni hi.

²³A ta ka na, a rawng ka bâwl hlak Pathien kha, ama vântirko pakhat vawizân hin ka kâwlah a hung ngîr a, ka kuomah,

²⁴‘Paula, ṭi naw, Kaisar hmaah i ngîr ding a nih; chun, ngai rawh, lawnga i kuoma fehai po po khawm hi Pathienin a pêk che a nih,’ a mi ti a nih.

²⁵Chuleiin, Puhai, lungmuongtakin um ro; Pathien ka ring a, a mi hril ang peiin a um ding a nih.

²⁶Chuleiin, thlierkâr ienga manih a mi lên suok ding a nih,” a ta.

²⁷Chun, Adria tuipuiah thliin khing tieng khing tieng a mi lên a mi lên a, zân sâwm le pali a tling zân chun, zân ril vêlah lawng mihai chun khâwlai khawmuol amanih tlung dingin an inhriet a.

²⁸Chuongchun, tui inthûkzie an inkhi a, hlam sâwmhni niin an hriet a; chun, sâwt nawtêah an inkhi nâwk a, hlam sâwm le panga niin an hriet a.

²⁹Chun, lawng mei tieng thîrchakai pali an thlâk a, chuong naw chun lungkho lai mi lên suok hlau rawi a tih, an tih a; chun, khuo var kâr an nghâkhla hle a.

³⁰Chun, lawng mihai chun lawng lu tieng chun thîrchakaihai thlâk ding anga thaw tehlêmin, lawnglêng chu tuipuiah an thlâk a, lawng chu tlân san an tum a.

³¹Chu lai chun Paulain sipai za hotu le sipaihai kuoma chun, “Hienghai hi lawngah an um zing naw chun him thei naw ti niu,” a ta.

³²Chuongchun, sipaihai chun lawnglêng hruihai chu an ât tan a, an inthla ta a.

³³Chun, khawvar tâwm chun Paulain mi po po chu bu fa dingin a tir a, “Vawisûn hi ni sâwmpali a ni tah, iengkhawm fa lovin in nghâk a, in nghei zing a nih.

³⁴Chuleiin, bu fa dingin ka tir cheu hi; in damna ding a ni hi; nangni laia tukhawm a samzai pakhat khawm bohmang naw ni,” a ta.

³⁵Chun, chu thu chu a hril zoin bei a lâk a, mi po po hmaa chun Pathien kuomah lâwmthu a hril ta a; chun, a khawi a, a fâk ṭan ta a.

³⁶Anni khawm thlamuongtakin an um a, bu an fâk ve ta a.

³⁷Lawnga mi chu kan rêngin za hni sâwmsari paruk kan nih.

³⁸Chun, an fâk khawp chun bu chu tuipuiah an pei a, lawng an sukzâng deu a.

³⁹Chun, nisa a suok chun, khawmuol chu khâwlai am a ni an hriet naw a; nisienlakhawm, khâwlai likilkawi amanih ṭieupho an hmu a, chu chunga chun a thei chun lawng chu intlan suoktir an tum a.

⁴⁰Thîrchakai thlungnahai chu an ât tan a, tuipuiah an mâksan a; chu ruol chun a karherna khuopnahai chu an sût a, hma tieng puon zar chu thli imût ding zawngin an khai sâng a; ṭieupho chu an pan ta a.

⁴¹Nisienlakhawm, tuihrât pahni intuokna hmunah kan lût hlau a, lawng chu hnuoi an insuktir ta a. Chuongchun, lawng lu tieng chu ân tâng tlat a, sukchâng ruol lovin a um zing a, a mawngtieng ruok chu tuifâwn a nasat leiin a kawi ṭan ta a.

⁴²Chun, sipaihaiin intânghai chu sukhlum an rawt a, chuong naw chun, tui inhlieu kai dâm um an ta, tlân hmang an tih ti an ṭi a.

⁴³Nisienlakhawm, sipai za hotu chun Paula sanhim a nuom a, an thil tum chu a khap a. Tui inhlieu thei po tuipuia chun inchâwm thlâk a, khawmuol lo kai hmasa ding le,

⁴⁴mi danghai chu, a ṭhen thingphêk chunghaiah, a ṭhen lawng kawi hâr chunghaiah kai dingin thu a pêk a. Chuong ang chun an rêngin khawmuolah himtakin an kai seng ta a.