Read Hmar THILTHAWHAI 3 Bible Online

THILTHAWHAI 3 - Hmar bible

THILTHAWHAI 3

¹Chun, Peter le Johan chu chawhnung inher, ṭawngṭai hun lai chun, Pathien biekina lût ding chun an hang fe a.

²Chun, patling tu amanih a pieng tira inthawka ke inbai an hung zâwn a, ama chu biekina lûthai kuoma kut daw dingin, biekin kawtkhâr, “Mawi,” an ti bula chun, ni tin an inzâltir hlak a.

³Ama chun Peter le Johan Pathien biekina lût ding chu a hmu a, kut a daw a.

⁴Chun, Peter le Johanin ama chu an en zing a. Peterin, “Keini mi hang en ta,” a ta.

⁵Ama chun an kuoma inthawka ieng amanih hmu a beisei a, a hang en a.

⁶Nisienlakhawm, Peterin, “Tangka le rângkachak iengkhawm ka nei nawh; nisienlakhawm, ka nei sun pêng ka ti che; Nazareth Isu Krista hmingin kein lâwn ta rawh,” a ta.

⁷A kut changtieng a chel a, a keitho ta a. Chun, kârlovin a kehai le a kemit ruhai chu a hung hrât nghâl ta a.

⁸Chun, ama chu ân châwm tho a, a ngîr a, a kein a lâwn ṭan ta a. Kea lâwn lâwn le, inchâwm le, Pathien inpâk pum peiin biekina chun a lût ve ta a.

⁹Chun, keâ lâwn le Pathien ân pâk chu mi po poin an hmu a;

¹⁰biekin kawtkhâr, Mawi, bula kut dawa ṭhung hlak kha a nih ti an hriet a; a chunga thil tlung chu mak an ti bêk bêk a, an buoi hle el a.

¹¹Chun, ama chun Peter le Johan chu a chel zing laiin, mi po poin mak an ti bêk bêk a, Solomon tuolpûk an tia chun, an kuomah an hung tlân khâwm a.

¹²Peterin chu chu a hmu chun, mihai chu a biek a, “Nangni Israel mihai, hieng hi iengdinga mak in ti am a na? Keini thilthawtheina le Pathien kan ngaisak leia ama hi kan inlâwntir ang el chun iengdinga in mi en zing am?

¹³Abraham hai, Isak hai, Jakob hai Pathien, ei thlatuhai Pathien chun, a siehlaw Isu chu a chawimawi ta a ni hi; ama chu in inmantir a, Pilatin insuo a tum khawmin a hmaah in lo dit naw kha.

¹⁴Mi inthieng le feltak kha in dit naw a, tuolthattu kha in kuoma pêk in ngên ta lem a.

¹⁵Hringna Siemtu chu in that a; nisienlakhawm, Pathienin ama chu mithi laia inthawkin a keitho nâwk tah; chu chu a hretuhai kan nih.

¹⁶Chun, ama hming ring leiin, a hming chun hi mipa in hmu le in hriet hlak hi a sukhrât tah a nih; anih, ama leia ringna hung um hin, in rênga mithmuah a sukdam var tah a ni hi.

¹⁷“Nisienlakhawm, unauhai, in hotuhai khawmin an inmâwl leia an thaw ang khan, in inmâwl leiin hieng hi in thaw a nih ti ka hriet.

¹⁸Nisienlakhawm, Pathienin zâwlnei po po bauah, Krista chun rinum a tuor ding thu ân hriettir lâwk kha; khâng ang khan ân tlungtir ta lem a nih.

¹⁹Chuleiin, in suolhai thâibo a ni theina dingin sim unla, ngha kîr nâwk ro,

²⁰chuongchun, Lalpa kuoma inthawka har hunhai la hung tlung thei a tih, Krista Isu, in ta dinga a iruot khawm kha hung tir thei a tih.

²¹Amiruokchu, iengkim siem ṭhat hun a tlung hmakhat chu vânin ama chu a la kawl hri ding a nih; chu siem ṭhat ding thu chu Pathienin leihnuoi insieng tira inthawk a zâwlnei inthieng umhai bauin a hril ta kha.

²²Mosie ngeiin, Lalpa Pathienin kei a mi siem ang hin in unauhai lai zâwlnei pakhat siempêk a ti cheu. Ama chun, thu po po in kuoma a hril taphawt chu ngaipêk in tih.

²³Chun, mi tûkhawm, chu zâwlnei thu chu ngai naw taphawt chu, mi laia inthawk sukbohmang dai nîng an tih,” a ti kha.

²⁴Anih, Samuel um chena inthawk zâwlnei po po, an hnunga mihai leh, thu hril taphawt hai khan, tulai chanchin hi an hril lâwk bawk hlak.

²⁵Nangni hi zâwlneihai le thuthlung nauhai in nih, Pathienin Abraham kuomah, “ ‘I thlahai leiin khawvêla hnam tin thawveng an tih,’ tiin in thlatuhai kuomah a tiem kha.

²⁶Pathienin a Siehlaw chu a ruot a, in suolhai innghatsantir seng cheua mal sâwmpêk ding cheuin, nangni kuomah a hung tir hmasa tak a ni hi,” a ta.