Read Hmar THILTHAWHAI 4 Bible Online

THILTHAWHAI 4 - Hmar bible

THILTHAWHAI 4

¹Chun, Peter le Johanin mihai kuomah thu an hril leiin, thiempuhai, biekin hotuhai, Saddukaihai chu an kuom an hung tlung thut a.

²Mi an inchûktir le Isu leiin mithi laia inthawka thonâwk thu an hril leiin an lungninaw bêk bêk a.

³Chun, an man a, zântieng a ni leiin a zîng chena dingin intângna inah an khum ta a.

⁴Nisienlakhawm, thu ngaihai laia tamtakin an awi a; an tam tieng chu patling ruok khawm sâng nga lai an tling a.

⁵Chun, a zînga chun an hotuhai, upahai, Dân inchûktirtuhai, Jerusalemah an um khâwm a,

⁶Thiempu Laltak Anna hai, Kaiapha hai, Johan hai, Alexandra hai, Thiempu Laltak chihai po po le chun.

⁷Chun, Peter le Johan chu a laiah an inngîrtir a, “Ieng thuneinain am, tu hmingin am hieng hi in thaw a?” an ta, an indawn a.

⁸Chuongchun, Peter chu Thlarau Inthiengin a sip a, an kuomah, “Mi po po hotuhai, upahai,

⁹mi hrâtnaw sukṭhat thuah, ‘Hi mipa hi ieng leiin am a hung dam ta a?’ tiin vawisûn hin in mi fie a ni chun,

¹⁰nangni po poin hre ro, Israel mi po khawmin hre raw hai se, Nazareth Isu Krista krawsa in hemde Pathienin mithi laia inthawka a ikeitho nâwk kha, ama hming ngeiin hi mipa hi hitaka hin in hmaah damin a ngîr tah a ni hi.

¹¹Nangni in bâwltuhai, in lung dehâwn, a kia lung ṭhangkaitak lo ni ta kha ama hi a nih.

¹²Mi dang tu kuoma khawm sandamna a um nawh; vânkhuphnuoia mihriem isak lai, a mi sandam ding hming dang hrim a um nawh,” a ta.

¹³Chun, Peter le Johan huoizie chu an hmu chun lekha thiemnaw le mi narân el an nih ti an hrietin, mak an ti hle a; Isu kuomah an um tah ti an hriet ta a.

¹⁴Chun, mi an sukdam chu an kâwla ngîr an hmu a, iengkhawm an sawisêl thei si nawh.

¹⁵Chuongchun, an rorêlnaa inthawka an infetir hnungin an inrawn a,

¹⁶“Hieng mihai hi iengtin am thâwng ei ta? Thilmak inthangtak an thaw ti Jerusalema um po poin an hriet ta hi; eini khawmin ei sêl thei si naw a.

¹⁷Nisienlakhawm, mi kuoma ân dar nâwk zuol nawna dingin, tuta inthawk tû kuoma khawm hi hminga thu an hril nawna dingin vau ei tiu,” an ta.

¹⁸Chuongchun, anni chu an ko a, Isu hminga thu hril dêr lo ding an ti tlat a.

¹⁹Nisienlakhawm, Peter le Johanin an kuomah, “Pathien mithmuin, Pathien thu zâwm nêkin nangni thu zâwm ân dik lem am chu, ngaituo ro.

²⁰Keini chu thil kan hmu le kan hriethai kha hril lovin kan um thei nawh,” an ta.

²¹Chun, anni chun an vau nâwk zuol a, an insuo ta a. Mipui leiin hremna remchâng an hmu nawh; an thilthaw lei khan mi po poin Pathien an chawimawi si a.

²²Thilmaka an isukdam chu kum sâwmli nêk hmana tam lem a ni si a.

²³Chun, Peter le Johan chu an suok chun anni pâwlhai lai an va fe a; thiempu lalhai le upahaiin an kuoma an hril po chu an hril vawng a.

²⁴Chuongchun, a ngaihai chun a ruolin rawl inringtakin Pathien kuomah, “Lalpa, nang hnuoi hai, vân hai, tuisuoriet hai, a sûnga um po pohai siemtu i nih;

²⁵nangin Thlarau Inthiengin, kan thlatu i siehlaw David bauin, hieng thu hi i hril a nih:- ‘Jentailhai iengdinga an lunginsen am? Hnam tinin iengdinga thil teplo an ngaituo am a na?

²⁶Khawvêl lalhaiin an ep huoi huoi a, Hotuhai khawm an pung khâwm a, Lalpa le a Krista chunga chun,’ tiin.

²⁷“Hi khuoa hin i siehlaw inthieng, i hriek nâl, Isu chunga khan Herod le Pontia Pilat le, Jentailhai le Israel mihai an pungkhâwm tak zet a nih;

²⁸i kut le i lungrilin tlung dinga i ruot lâwk taphawthai kha thaw dingin.

²⁹Chuongchun, tuhin Lalpa, an mi vauzie hi ngai ta; i suokhai hi huoitakin i thu inhriltir la,

³⁰mihai sukdam dingin i kut phar bawk rawh; i siehlaw inthieng Isu hmingin inchikna le thilmakhai inthawtir bawk rawh,” an ta.

³¹Chun, an ṭawngṭai zo chun an umna in chu a hung inhnîng a, an rêngin Thlarau Inthiengin an hung sip a, huoitakin Pathien thu an hril ta a.

³²Chun, a ringtu mipuihai chu lungril hmunkhat le ngaituo hmunkhatin an um a; anni laia pakhat khawmin an sum nei, “Ka ta bîk a nih,” an ti nawh; thil po po an inṭâwm lem hlak a.

³³Chun, tirkohai chun awiumtakin Lal Isu thonâwk thu an inhriettir hlak a, an rênga chungah lunginsietna nasatak a um a.

³⁴Chun, anni lai khawm tlasam tukhawm an um nawh, hnuoihai, inhai nei taphawtin an zawr a, an thil zawrhai chu a man an hung chawi a,

³⁵tirkohai ke bulah an sie hlak a; an mamaw dai tâwk sengin an sem seng hlak a.

³⁶Chun, Josef, tirkohaiin Barnaba an ti chu, (chu hming umzie chu “Thlamuongna nau,” tina a nih), Levi chi, Kupra thlierkâra mi a na,

³⁷a lo nei chu zawrin a man a hung chawi a, tirkohai ke bulah a sie ta a.