Read Hmar THILTHAWHAI 5 Bible Online

THILTHAWHAI 5 - Hmar bible

THILTHAWHAI 5

¹Nisienlakhawm, mi pakhat a hming Anania a nuhmei Saphira leh an um a, Anania chun hnuoi a zawr a, a nuhmei hrietin a man a ṭhen a ip ta a.

²Chun, a ṭhen a hung chawi a, tirkohai ke bula chun a sie a.

³Nisienlakhawm, Peterin, “Anania, Thlarau Inthieng hlêm ding le, hnuoi man a ṭhen ip dingin iengdinga Setanin i lungril a suksip am a na?

⁴A um sûng po khan i ta a ni zing a ni naw am a nih? I zawr hnung khawm khan a man chu i thu thua um a ni naw am a nih? Iengdinga hieng thu hi i lungrila i ngaituo am a na? Mihriem hlêm i ni naw a, Pathien kuoma khêl hril i ni lem,” a ta.

⁵Chun, Anania chun chuong thu chu a hriet phingleh a tlu a, a thi ta a; chun, a hre taphawt chun an ṭi ta bêk bêk a.

⁶Chun, tlangvâlhai chu an tho a, an tuom a, an zâwn suok a, an phûm ta a.

⁷Chun, dârkar thum lai hnunga chun, a nuhmei chu thil umzie chu hre lovin a hung lût a.

⁸Chun, Peterin a kuomah, “Mi hril rawh, Hnuoi chu hieng zât char hin maw in zawr?” a ta. Ama chun, “Uou, hieng zât char hin a nih,” a ta.

⁹Chun, Peterin a kuomah, “Iengdinga Lalpa Thlarau infiena dinga in inthuruol am? Ngai ta, i pasal phûmtuhai kepha chu kawtkhâr bulah a hung um tah, nang khawm zâwn dawk an ti che,” a ta.

¹⁰Chun, kârlovin a ke bula chun a tlu nghâl ta a, a thi ve ta a; chun, tlangvâlhai chu an hung lût a, ama chu a thisain an hung hmu a, an zâwn dawk a, a pasal kâwla chun an phûm ta a.

¹¹Chun, kohranhai po po le chuong thu hre taphawt chun an ṭi ta bêk bêk a.

¹²Chun, mi lai Pathienin tirkohai kutin inchikna le thilmak tamtak a thaw hlak a. Annirawi chu an rêngin lungril hmunkhatin Solomon Tuolpûka chun an inkhâwm hlak a.

¹³Mi dang ruok chu tukhawm anni lai an ṭhang ve ngam ta nawh; nisienlakhawm, anni chu miin an inpâk hlak a.

¹⁴Chun, a ring tharhai nuhmei le pasal tamtakin Lalpa kuoma chun an hung belsa nâwk zuol hlak a.

¹⁵Chuongchun, mi damnawhai khawm kawtthlêrhaiah an zâwn dawk a, khumahai, puonphaahai an inzâltir a, “Peter fe malamin a hlimin a ṭhen bêk a hlie theina dingin,” an ta.

¹⁶Chun, Jerusalem kâwl vêl khuoa inthawkin mipuihai khawm chu damnawhai, khawhri inthiengnaw isawisakhai hung ṭhuoiin an hung khâwm a; chuonghai khawm chu an hung dam ta seng a.

¹⁷Chun, thiempu Laltak le a ruolhai po po an hung inthawk a, (chuong a ruolhai chu Saddukai pâwl an nih,) an îtthîk bêk bêk a,

¹⁸tirkohai chu an man a, vântlâng intângna inah an khum ta a.

¹⁹Nisienlakhawm, Lalpa vântirko pakhatin, kawtkhârhai chu a hung hawng a, a ṭhuoi suok ta a,

²⁰“Pathien biekinah va ngîr unla, mi kuomah hieng hringna thu po po hi va hril ro,” a ta.

²¹Chun, chu thu chu an hrietin khawvar hun vêla chun Pathien biekinah an va lût a, an inchûktir a. Nisienlakhawm, Thiempu Laltak le a ruolhai chu an hung a, rorêltuhai le Israel thlahai upahai po po an ko khâwm a, tirkohai chu hung inṭhuoitir dingin intângna ina chun mi an tir a.

²²Nisienlakhawm, manmihai chu an va tlung chun intângna ina chun anni chu an hmu si nawh; chuongchun, an kîr nâwk a,

²³“Intângna in chu himtaka inkhârin, a vêngtuhai khawm kawtkhâr bula ngîrin kan hmu si a; nisienlakhawm, kan hei hawng a, a sûngah tukhawm kan hmu si nawh,” tiin an hril a.

²⁴Chun, Pathien biekin hotu le thiempu lalhaiin chuong thu chu an hrietin, “Hi thil hi iengtin takin am fe pei a ti aw?” tiin an thua chun an lunginzîng ta bêk bêk a.

²⁵Chun, mi pakhat a hung a, an kuomah, “Ngai ta u, intângna ina mi inkhumhai khan Pathien biekinah ngîrin mi an inchûktir kha ti!” tiin an hung hril a.

²⁶Chuongchun, hotu chu manmihai le chun an va fe a, vântlâng an ṭi leiin tlangtakin an hung ṭhuoi a, chuong naw chun lunga dêng an ṭi a.

²⁷Chun, an hung ṭhuoi tlung chun rorêltuhai hmaa chun an inngîrtir a. Chun, Thiempu Laltak chun an kuomah,

²⁸“Hi hming hin inchûktir lo ding kan ti tlat ta cheu kha; hre ro, in thu inchûktirin Jerusalem in suksip vawng ta hi; hi mipa thisen maw hi mîn phurtir ṭâl in tum a ni hi,” tiin a suosal a.

²⁹Nisienlakhawm, Peter le tirkohai chun, “Mihriem thu nêkin Pathien thu kan zâwm lem ding a nih.

³⁰Nangnîn Isu thinga khaikângin in sukhlum kha, ei thlatuhai Pathienin a keitho nâwk tah a nih.

³¹Ama ngei kha Pathienin Lal le Sandamtua um dingin a changtieng a chawimawi tah, Israelhai suol insimtir ding le ngaidam dingin.

³²Chuong thu chu, a hretuhai kan ni hi, Thlarau Inthieng, Pathienin a thu zâwm taphawthai kuoma a pêk kha, a hretu a ni ve bawk a,” an ta, an dawn a.

³³Chun, anni chun chuong thu chu an hrietin an lungril a khei ta a, sukhlum an tum ta a.

³⁴Nisienlakhawm, rorêltuhai lai chun, a hming Gamaliel, Pharisai, Dân hretu, mi po po laia hminginthangtak, mi pakhat chu a ngîr a, chuhai chu insuoktir phawt dingin thu a pêk a.

³⁵Chun, rorêltuhai kuoma chun, “Nangni Israel mihai, hihai chunga in thil thaw tum hi fîmkhur ro.

³⁶Tuta hma khawm khan, Theoda, ‘Mi lien ka nih,’ tiin a hung um a, chu mipa kuoma chun mi tamtak, za li lai an lo kawp a. Ama chu sukhlumin a um ta a; a thu zâwm taphawt chu an rêngin an indar ta vawng a, iengkhawm an ni ta nawh.

³⁷Chu mipa um hnung chun, hming ziek lai khan Galili rama mi Juda kha a hung um nâwk a, a kuomah mi ṭhenkhat a hîp nâwk a, nisienlakhawm, ama chu a thi ta a, a thu zâwm taphawt chu an rêngin an indar ta vawng a.

³⁸Chuleiin, tuhin ka ti cheu hi, hieng mihai hi tâwk naw unla, um el raw hai se; hieng an thil thaw tum le an thilthaw hi mihriem ithaw suok el a ni chun bohmang a tih;

³⁹amiruokchu, Pathien ithaw suok a ni chun anni sukbohmang thei naw ti niu; chuong naw chun, Pathien do ni hlau rawi in tih,” a ta. Chun, a hril chu rem an ti ta a.

⁴⁰Chuongchun, tirkohai chu an ko a, an vuok a, chu zo chun Isu hminga thu hril lo ding ti tlatin an insuo ta a.

⁴¹Chuongchun, rorêltuhai laia inthawk chun an suok a, chu hming leia muolphona tuor tlâka ruot an ni leiin an lâwm hle a.

⁴²Chun, ni tin Pathien biekina le anni inahai, “Isu chu Krista a nih,” tiin inchûktir le hril an ma nawh.