Read Hmar THILTHAWHAI 9 Bible Online

THILTHAWHAI 9 - Hmar bible

THILTHAWHAI 9

¹Saula ruok chun, Lalpa inchûktirhai a vau thu le that a tum thu chu a la sâksuok ta rawp a.

²Thiempu Laltak kuomah a fe a, Damaskaa inkhâwmna in po poa mihai kuoma pêk dingin lekha a hni a, chu Lama mi chu tukhawm a hmu chun, nuhmei khawm, pasal khawm, Jerusalema khuop puma hung ṭhuoi theina dingin.

³Chun, a fe laiin, Damaska a tlung tâwmin, kârlovin var vâna inthawkin a vêlah a hung var phut a.

⁴Chun, hnuoiah a tlu a, a kuomah, “Saula, Saula, nangin iengdinga i mi suknawmna am a na?” tiin rawl a hriet a.

⁵Chun, ama chun, “Tû am i na, Lalpa?” a ta.

⁶Lalpa chun, “Isu i suknawmnat hi ka nih; nisienlakhawm, tho la, khuoah lût rawh, chuongchun, i thaw ding lo hril an ti che,” a ta.

⁷Chun, ama le fehai chu hril ding hre lovin an ngir a, rawl chu an hriet a chu tukhawm an hmu si nawh.

⁸Chun, Saula chu hnuoia inthawk chun a tho a; chun, a hang meng a, iengkhawm a hmu thei ta naw a; chuongchun, a kutah an kei a, Damaskaa chun an ṭhuoi lût a.

⁹Ni thum khaw hmu lovin a um a, iengkhawm a fâkin a dâwn naw a.

¹⁰Chun, Damaskaa chun inchûktir pakhat a hming Anania a um a. Lalpa chun a mang angin a kuomah, “Anania,” a ta. Chun, ama chun, “Lalpa, en ta, hitaka hin ka um,” a ta.

¹¹Lalpa chun a kuomah, “Tho la, kawtthlêr, ‘Tlûn’ an tia chun fe la, Juda inah, Tarsa khuoa mi, a hming Saula indawn suok rawh; ngai ta, a ṭawngṭai zing a nih,

¹²a hming Anania mi pakhat lûta, a mit sukvar dingin a chunga kut innghatin a hmu tah,” a ta.

¹³Chun, Anania chun, “Lalpa, chu mipa chu Jerusalema i mi inthienghai chunga a suksuol tamzie thu mi tamtak baua inthawkin ka hriet a nih.

¹⁴Hitaka khawm i hming lam taphawt chu khuop dingin thiempu lalhaia inthawkin thu a hmu zing annâwm,” a ta, a dawn a.

¹⁵Nisienlakhawm, Lalpa chun a kuomah, “Fe el rawh, Jentailhai, lalhai, Israel mipuihai kuoma ka hming put lûtna dinga ka bêl ruot a nih.

¹⁶Ka hming leiin rinum ieng anga nasa am a tuor ding a kuomah lân hriettir ka tih,” a ta.

¹⁷Chun, Anania chu a va fe a, ina chun a lût a; a chungah kut ân nghat a, “Unau Saula, i mit varna ding le Thlarau Inthienga sipa i um theina dingin, Lalpa, i hungna lampuia i kuoma inlâr Isu khan a mi hung tir a nih,” a ta.

¹⁸Chun, kârlovin a mita inthawk chun phuhlip ang ieng amanih a tla nghâl ta a, a mit a var nâwk ta a; chun, a tho a, baptisma a chang ta a.

¹⁹Chun, bu a fâk a, a har nâwk ta a. Chun, Damaskaa inchûktir umhai kuoma chun ni iengzat amanih a um a.

²⁰Inkhâwmna inhaia chun Isu chu Pathien Naupa a nizie thu a khêkpui nghâl ta a.

²¹Chun, a thu hretuhai po po chun mak an ti hle a; “Hi mipa hi Jerusalema hi hming lamtuhai suknawmna hlaktu kha a ni naw am a nih? Chuong mihai chu thiempu lalhai kuoma khuop puma ṭhuoi, a hung san a ni kha,” an ta.

²²Saula ruok chu a hung hrât nâwk zuol a, ama chu Krista a ni takzet ti a hrilfie a, Damaskaa Juda umhai chu a sêldawng rawp hlak a.

²³Chun, ni sâwt tak hnunga chun Saula sukhlum dingin Judahai chu an inrawn a;

²⁴nisienlakhawm, ama chun an thurawt chu a lo hriet ta a. Sukhlum dingin kul kawtkhâr tina chun a sûn a zânin an inchân hlak a.

²⁵Nisienlakhawm, a închûktirhaiin ama chu an ṭhuoi a, zânah kul tukverah bâwmin an thlâk thla ta a.

²⁶Chun, Saula chun Jerusalem a tlung phingleh inchûktirhai chu pâwl a tum a; anni ruok chun an rêngin ama chu an ṭi a, inchûktir a ni ve ti an ring naw a.

²⁷Barnaba ruok chun ama chu a ṭhuoi a, tirkohai kuoma chun a hungpui a, lampuia Lalpa a hmua a biekzie dâm, Damaskaa Isu hminga huoitaka a thu a hrilzie dâm khawm chu an kuomah a hril ta a.

²⁸Chuongchun, Saula chu Jerusalema chun an kuoma lûtin a suok hlak a, Lalpa hmingin huoitakin thu a hril hlak a.

²⁹Chun, Grik ṭawng hmang Judahai lai thu a hril a, a sêl a; anni ruok chun ama chu sukhlum an tum a.

³⁰Chun, unauhai chun chu chu an hrietin, Kaisari khuoah an ṭhuoi thlâk a, Tarsa khuoah an tir ta dai a.

³¹Chuongchun, kohranhai chu Judai ram vêla dâm, Galili ram vêla dâm, Samari ram vêla dâm chun an det deu deu a, muongtakin an um ta a; chun, Lalpa ṭi dêkin, Thlarau Inthieng ithlamuongin an um a, an hung pung ta deu deu a.

³²Chun, Peterin khawvêl a fang malamin, Ludda khuoa mi inthieng umhai kuomah a zu fe bawk a.

³³Chutaka chun mi pakhat, a hming Ainia a zeng leia kum riet khuma zâl zing a hmu a.

³⁴Chun, Peter chun a kuomah, “Ainia, Isu Krista chun a sukdam che; tho la i puonpha ziel rawh,” a ta. Chuongchun, a tho nghâl ta a.

³⁵Chun, Ludda khuo le Saron phaia um po pohai chun Ainia chu an hmu a, Lalpa tieng an ngha tâwl ta a.

³⁶Chun, Joppa khuoah a hming Tabitha, inchûktir pakhat a um a, (Tabitha umzie chu Dorka a nih); chu nuhmei chun thil thawṭhat le thilpêk a hau hle a.

³⁷Chun, chuong lai chun a damnaw a, a thi ta a; chun an insil fai a, pindan chunghnungah an inzâl a.

³⁸Chun, Ludda khuo chu Joppa khaw kâwl a ni leiin, inchûktirhai chun Peter chutaka chun a um ti an hriet a, “Sâwt riel lovin kan kuomah hung rawh,” tia ngên dingin a kuomah mi pahni an tir a.

³⁹Chun, Peter chu a tho a, anni ruolin a fe ve ta a. Chun, a tlung phingleh pindan chunghnunga chun an ṭhuoi a; hmeithai po po chu a kâwla ngîrin, Dorka an kuoma a um laia a zakuo siemhai, a puon siemhai inentir pumin an ṭap tâwl a.

⁴⁰Nisienlakhawm, Peter chun an rêngin ân suoktir vawng a, a dingṭhaṭhuon a, a ṭawngṭai ta a; chun, ruong tieng chu a ngha a, “Tabitha, tho rawh,” a ta. Chuongchun, a mit a hung meng a, Peter chu a hmu phingleh a ṭhung ta a.

⁴¹Chun, Peter chun a kut a pêk a, a keitho ta a; chun, mi inthienghai le hmeithaihai chu a ko a, damin an kuomah a ṭhuoi ta a.

⁴²Chun, chu chu Joppa khuo po po chun an hriet ta vawng a; mi tamtakin Lalpa chu an ring ta a.

⁴³Chun, Peter chu ni tamtak Joppa khuoa Simon, savun siemtu inah a châm zing a.