Read Hmar ROM 1 Bible Online

ROM 1 - Hmar bible

ROM 1

¹Paula, Isu Krista suok, tirko ni dinga ko, Pathien Chanchin Ṭha hril dinga ṭhethlâka um lekha-thawn:

²Chu Chanchin Ṭha chu Pathienin inhmata a lekha inthienghaia zâwlneihai baua a ilo tiem tah, a Naupa ei Lalpa Isu Krista thu chu a nih.

³Taksa tienga chun ama chu David suona insieng a na,

⁴inthiengna Thlarau tieng thua ruok chun mithi laia inthawka a thonâwkna chun Pathien Nau a ni zie thilthawtheina nasatakin ân hriettir a;

⁵A hming leia hnam tin laia mi ringna thu chu inzâwmtir dingin; ama zâra chun lunginsietna le tirko nina chu kan chang ta a;

⁶nangni khawm chuonghai lai chun Isu Krista ta ni dinga ko chu in nih.

⁷Rom khuoa Pathien idittakhai, mi inthieng ni dinga kohai po po kuomah; Pathien ei Pa le Lalpa Isu Kristaa inthawka lunginsietna le inremna in kuomah um raw se..

⁸A hmasatakin, khawvêl po poah in ringna thu ân thang leiin in rênga chunga ka lâwm thu, Isu Krista zârah ka Pathien kuomah ka hril a nih.

⁹Ka ṭawngṭainahaia chun malovin ka hrietzing hlak cheu ti chu, A Naupa Chanchin Ṭha puonga ka thlaraua a rawng ka ibâwl Pathien chu a mi hrepuitu a nih.

¹⁰Tu bêk hin in kuoma ka hung theina dingin Pathien remti ang anga, hung inzinna remchâng ka nei tei tei theina dingin ka hni rawp hlak.

¹¹In detna dinga Thlarau tieng thilpêk iengamanih ka pêk theina ding cheuin hmu cheu kân hâwk hle a nih.

¹²Chu chu in ringna le keia ringnain ei inthlamuon tuo theina dingin ka tina a nih.

¹³Unauhai, Jentail danghai laia kân rimna ra ka hmu ta ang bawkin, nangni lai khawm a ra ka hmu theina dingin, in kuoma hung vawi tamtak ka tum tah ti in hriet naw ka nuom nawh; nisienlakhawm, kha hma po khan chu dangin ka um rawp a.

¹⁴Grik mihai le hnamchawmhai kuomah bat ka nei, mi var le mi invêthai kuoma khawm.

¹⁵Chuongchun, nangni Rom khuoa mihai kuoma khawm Chanchin Ṭha ka theitâwpa hril dingin inzosa zinga um ka nih.

¹⁶Chanchin Ṭha chu kân zâpui si naw a, tûkhawm a awihai po ta dinga sandamna dinga Pathien thilthawtheina a ni si a; a phutin Juda mi ta dingin, chun, Grik mihai ta ding khawmin a hung nih.

¹⁷Chutaka chun awi nâwkzuolna dingin, ringnain Pathien felzie chu a hung inlang a, “Ringna leia mifel chu hring a tih” tia ziek ang khan.

¹⁸Thutak fel nawtaka dangtuhai Pathien ngaisak nawna le fel nawna po po chunga chun vâna inthawkin Pathien lungsen a hung inlang a nih.

¹⁹Pathienin ân hriettir ta leiin, Pathien chanchin hriet dinghai chu an lungrilah inhriettirin a um si a.

²⁰Amaa mizie hmu thei lo hai, a chatuon thilthawtheina le a Pathien nizie chu, leihnuoi siem tîra inthawkin chiengtaka hmuin a um a, thilsiema chun ân lang a nih; chuleichun, suonlam ding hrim an nei nawh;

²¹Pathien hre zing siin Pathien angin an chawimawi naw a, lâwmthu khawm an hril bawk si nawh. Teplo mei mei an ngaituo lem ta a, an lungril invêt chu a hung inthim ta a.

²²Vara inngaiin invêt an lo ni ta a,

²³Pathien thi thei lo ropuina chu, mihriem thi thei dâm le vatehai dâm, sapheimanli le thilhringhai lim angah an inchangtir ta a.

²⁴Chuleichun, an taksa inzakumtaka insiem tuo dingin an lungril inhâwk anga pawrchêtaka um phalin Pathienin a nghatsan ta a.

²⁵Pathien thutak chu khêla inchangtirin, a siemtu biek nêkin a isiemhai chu bein an rawng an bâwl ta lem si a. A siemtu chu kumkhuoa inpâk tlâk a nih! Amen.

²⁶Chuleichun, Pathienin inzakumtaka hur phalin a nghatsan a; an nuhmeihai rau khawma an um dân insiengpui chu dân naw anga um dingin an insuk danglam si a;

²⁷pasalhai khawm nuhmei le inhmang dân pângngai chu bânsana hurin, ân hnarin an inhnar tuo a; pasalin an pasal chanpuihai khawm mawilotakin an khawsapui a, an suol man chu anni ngeiah an hmu tah a nih.

²⁸Chun, Pathien hriet an nuom naw leiin, thil mawi naw tak tak thaw dinga a dit naw zâwng lungril nei phalin Pathienin a nghatsan ta a;

²⁹chuongchun, rîtlona tinrêng dâm, suolna tinrêng dâm, inhnarna tinrêng dâm, lungril ṭhat nawna tinrêng dâmin an hung sip ta a; îtsîkna dâm, tuolthatna dâm, inhalna dâm, inhlêmna dâm, lungril setak dâma sip an na; inberu hmanghai,

³⁰mi rêl hmanghai, Pathien theida zâwnghai, intiveihai, chapohai, mi uonghai, thil suol thar suksuoktuhai, nu le pa thu awi lohai,

³¹hrietthiemna bo, thu tiem bawsietuhai, piengpui lunginsietna nei naw mihai, lunginsietna nei naw mihai an lo ni ta a;

³²chuong ang thawtuhai chu thi tlâk an nih, ti Pathien iruot chu hre zing siin, anni chau khawma thaw lovin, mi dang a thawhai chunga khawm chun an lâwm bawk a.