Read Hmar ROM 12 Bible Online

ROM 12 - Hmar bible

ROM 12

¹Chuongchun, unauhai, Pathien lunginsietna lei hin inthâwina hring le inthieng le Pathien ilâwmtlâk ni dingin, in taksa chu inhlân dingin ka ngên cheu a nih; chu chu in rawngbâwlna âwm hrim a nih.

²Hi khawvêl dân ang hin um naw unla, Pathien dit zâwng a ṭha le lâwmtlâk le ṭha famkim chu in hriet chieng theina dingin, in lungril a thara umin, hung danglam lem ta ro khai.

³Pathienin a mi pêk lunginsietna lei hin in laia tukhawmin in ingaihlu tâwk bâka inngaihlu lovin, Pathienin mi tin kuoma ringna huntâwk a pêk ang peiin, feltaka ngaituo lem dingin ka ti seng cheu a nih.

⁴Taksa pumkhatah pêng tamtak ei nei a, a pêng po po sinthaw chu an âng vawng naw a;

⁵chuong ang bawkin, eini tamtak ni inla khawm Kristaa chun taksa pumkhat ei na, amal malin inpêng tuo seng ei nih.

⁶Lunginsietna ei kuoma pêk ang sengin thilthlâwnpêk hi a tum tum ei nei seng a, thu hril ding a ni chun, ei ringna phutâwk peiin hril ei tiu;

⁷rawngbâwl ding a ni chun ei rawngbâwlnaa chun inpe tlat ei tiu, inchûktirtu khawmin inchûktir tlat raw se;

⁸mi infuitu khawma infui raw se; thil petu khawmin inro lovin pe raw se, rorêltu chun taimatakin ro rêl raw se; mi lunginsiettu khawmin lâwmtakin lunginsiet raw se.

⁹Hmangaina chu vervêkna ṭhang lovin ni raw se. Suol tieng chu theida unla, ṭha tieng chu pawm tlat ro.

¹⁰Unauhai hmangai kawnga chun inhmangai takin inlainat tuo seng ro; chawimawi kawnga chun inditsak tuo seng ro;

¹¹taimâk kawnga chun thaboin um naw ro; thlarau kawnga chun ṭhahnem ngai unla, Lalpa rawng bâwl unla,

¹²beiseina kawnga chun, lâwm unla; rinum tuor kawnga chun tuorsel unla, ṭawngṭaina kawnga chun ṭawngṭai fan fan ro.

¹³Mi inthienghai tlâksamnaa chun sawmdâwl unla, mikhuolhai lâwm hlak mi ni ro.

¹⁴A suknawmnatuhai cheu chu malsâwmpêk unla, ṭawngsie chu in phur naw ro.

¹⁵Lâwmhai chu lâwmpui unla, ṭaphai chu ṭappui ro.

¹⁶Ngaituo hmunkhatin um tuo seng unla, inngaituo sâng taluo naw unla, mi chînhai inruolpui lem ro. Intivar naw ro.

¹⁷Tu suol khawm suolin thung naw ro, mi po po ngaia thil mawi chu ngaituo lâwk ro.

¹⁸A thei phawt chun nangni tieng bêk mi po po le inremin um ro.

¹⁹Dittakhai, in phuba la naw unla, Pathien lunginsenna inkien lem ro,“phuba hrim hrim keia lâk ding a nih, keiin thung ka tih, Lalpain a tih,” ti ziek a ni si a.

²⁰Chuleiin, i hmêlma a phîng a ṭâm chun fâk ding pe la, a dang a châr chun dâwn ding pe rawh; chuong anga i thaw chun a lu chunga meiling i sie khâwl nîng a tih.

²¹Suol ihnein um naw la, ṭhatnain suol chu hne lem rawh.