Read Hmar ROM 13 Bible Online

ROM 13 - Hmar bible

ROM 13

¹Mi tin an chunga rorêltuhai thu thuin um raw se. Pathien thu lovin tukhawm rorêltu an um ngai si naw a; rorêltua umhai hi Pathien iruot an nih.

²Chuleiin, tûkhawm rorêltu kal chu Pathien iruot kal a nih; a kaltuhai chun anni chungah rorêlna hmûng an tih.

³Rorêltuhai chu thil ṭha thawtuhai ta ding chun ṭium an ni naw a, thil ṭha naw thawtuhai ta ding ruok chun ṭium an nih. Anleh, rorêltu ṭi lova um i nuom am? Thil ṭha thâw la, a înpâk hlâwng i tih;

⁴ama chu i ṭhatna dinga Pathien rawngbâwltu a ni si a. Nisienlakhawm, thil suol i thaw chun ṭi rawh, kâwlhnâm chu a chawi mei mei si naw a; ama chu Pathien rawngbâwltu, thil suksuoltuhai chunga lunginsenna phuba latu a ni si a.

⁵Chuleiin, lunginsenna ṭi lei chau ni lovin, i sie le ṭha hrietna lei khawmin rorêltu thu thuin i um ding a ni hrim a nih.

⁶Hi lei hin annâwm sie khawm in chawi hlak; chuong ang thil ngei thaw fan fan dinga Pathien rawngbâwltuhai an ni si a.

⁷Mi po po kuomah pêk ding taphawt chu pe ro; leiman pêkna ding kuoma chun leiman pe unla, sie chawina ding kuoma chun sie chawi unla, ṭi ding chu ṭi unla, inza ding chu inza ro.

⁸Inhmangai tuona ngawt naw chu tû iengkhawm bat naw ro; mâni mihriempui hmangaitu chun dân chu a zâwm famkim ta si a.

⁹Hieng, “Uire naw, tuol that naw, inru naw, inhnar naw,” ti le thupêk danghai hrim hrim hi, “Nangma în hmangai angin i vênghai i hmangai ding a nih,” ti hin a khai khâwm vawng a nih.

¹⁰Hmangainain vênghai a sukkhawhlo ngai naw a, chuleiin hmangaina hi dân hraw famkimna a nih.

¹¹Tulai thil umzie in hriet lei le, inhai ta dingin innaa inthawkin ṭhanghar a hun ta takzet ti in hriet leiin chu chu ka hril a nih; tuhin chu ei awi tîr lai nêk khan chu ei sandamna chu a hnai lem ta si a.

¹²Zân hi a bo vâng vâng ta a, khuo a var ding a ni tah, chuleiin inthimna thilthawhai chu pei inla, var thuomin inthuom ei tiu khai.

¹³Sûna um angin mawitakin um ei tiu, zu dâwn buoi le zu inruia um lovin, hur le indit hmanga um lovin, insuol le inîtthîka um lovin,

¹⁴Lalpa Isu Krista chun inthuom lem unla, in tisa inhâwkna puitlin dingin iengkhawm insiem naw ro.