Read Hmar ROM 15 Bible Online

ROM 15 - Hmar bible

ROM 15

¹Chuongchun, eini mi hrâthai hin mâni lâwmna zawng lovin mi hrât nawhai hrât nawna ei tuorpui lem ding a nih.

²Mâni vênghai suksâwtna ding le an ṭhatna dingin suklâwm tum seng ei tiu,

³Krista khawm chun mâni lâwmna a zawng si naw a. “Nangma haltuhai halna che chu keia chungah a tla tah,” ti ziek ang khan a um lem.

⁴Pathien Lekha thua tuorselna le lungmuongna hmua beiseina ei nei theina dingin, inhmaa ziekhai taphawt chu eini inchûktirna dinga ziek an ni si a.

⁵Tuorselna le thlamuongna Pathien chun Isu Krista hril angin lungril hmunkhat put dingin inumtir raw se cheu;

⁶ei Lalpa Isu Krista Pathien le Pa chu, lungril hmunkhat le inthuruola in chawimawi theina dingin.

⁷Chuleiin, Krista chun Pathien sukropuina dinga a lâwm cheu ang bawk khan[1], inlâwm tuo seng ro.

⁸Hi hi ka ihril chu a nih: thlatuhai kuoma thutiemhai chu sukdet ding le Pathien thu ân dik ti inhriettirna dingin Krista chu sertanhai rawngbâwltuin a hung um a;

⁹lunginsietna leia Jentailhaiin Pathien an chawimawi theina dingin; “Chuleiin, Jentailhai lai chun, Inpâk ka ti che a, I hming chawimawina dingin Hla sak ka tih,” tia ziek ang khan,

¹⁰Chun, “Nangni Jentail po pohai, A mihai leh lâwm ro,” a ti nâwk a.

¹¹Chun, “Nangni Jentail po pohai, Lalpa chu inpâk ro; Mi po po khawmin, Ama chu inpâk raw se,” a ti nâwk a.

¹²Chun, Isaiin, “Jessai zung zâm chu um a ta, Jentailhai Lala um dingin, A hung suok ding chu um bawk a ta, Ama chu Jentailhai chun beisei phâng an tih,” a ti nâwk bawk a.

¹³Thlarau Inthieng thilthawtheina zâra beiseina in hau theina dingin Beiseina Pathien chun ring leia lâwmna le inremna tinrêngin suksip raw se cheu.

¹⁴Chun, ka unauhai, nangni chungthu chu, nangni ngei ṭhatnain in sip a, varna tinrêng in haua, in inkâwk tuo thei ti kei ngei khawmin indiktakin ka hriet.

¹⁵Nisienlakhawm, inhriettir nawn ding cheuin khâwlai lai hin amanih huoitakin ka ziek a nih: Pathienin a mi pêk lunginsietna lei hin Jentailhai laia Krista Isu rawngbâwltu ka nih.

¹⁶Jentailhai inhlânna chu, Thlarau Inthieng sukthienga lâwmtlâk an ni theina dingin Pathien Chanchin Ṭha kawngah thiempu sin ka thaw a nih.

¹⁷Chuongchun, Pathien tieng kawnga chu, Krista Isua chun suong ding ka nei a nih.

¹⁸Jentailhai inâwitir dingin Kristain thilthaw le thu hrilin keima mi hmanga a thilthawhai chau naw chu iengkhawm hril ngam si naw ning a;

¹⁹inchiknahai, thilmakhai, thilthawtheinaa le Thlarau Inthieng thilthawtheinaa chun a mi hmang a nih. Chuleiin, Jerusalem le a vêl rama inthawkin Illurikom ram chenin, Krista Chanchin Ṭha chu ram tinah ka hril kim ta a;

²⁰mi dang lungphûm chunga rem ka ni nawna dingin, Chanchin Ṭha chu Krista hming lama a umna ta hmuna chun hril lovin,

²¹“A chanchin la hril ngainawnaa mihai chun Hmûng an ta, A la hre ngainawhai chun, Hrieng an tih,” ti ziek ang khan.

²²Chu lei tak khawm chun a nih, in kuoma hung ka ṭhul rawp hlak chu.

²³Tu ruok hin chu hieng ram vêla hin sinthawna hmun hrim ka nei ta nawh, kum tamtak chu in kuoma hung inhâwkin ka um ta bawk a,

²⁴Spain rama ka fe phaleh ka fe malama hmu cheu ka beisei si a, nangni pâwl khawp deu zet lang cheu, chu tienga ka zu fenaa khawm chun nangni rawiin in mi zûn thla ka beisei bawk a nih.

²⁵Tu ruok hin chu mi inthienghai rawngbâwl dingin Jerusalemah ka fe phawt ding a nih.

²⁶Makedonia le Akaia rama mihai chun lungâwitakin, Jerusalema mi inthienghai laia mi rimsihai ta dingin sum an thawlâwm ta si a.

²⁷Anih, lungnitaka an thaw a nih, an kuomah an bat hrim bawk a; Jentailhaiin an thlarau tieng thilah an in ṭâwmpui si chun, khawvêl tieng thilin anni sawmdâwl ve thung a ṭûl hrim a nih.

²⁸Chuleiin, chu chu thaw zoa, a ra khawm feltaka anni kân hmutir zoin nangni sir malamin Spain ramah fe pei ka tih.

²⁹Chun, in kuoma ka hung pha chun, Krista Chanchin Ṭha malsâwmna famkim phurin hung ka tih ti ka hriet a nih.

³⁰Unauhai, tuhin, in mi ṭawngṭai pêknaa chun ṭhahnemngaitaka mi ṭawngṭai pêk dingin Lalpa Isu Krista le Thlarau Inthieng hmangainain ka ngên cheu a nih:

³¹Judai rama awinawhai laia ka him theina ding le Jerusalem ta dinga sawmdâwlna ka ichawi hi, mi inthienghai lâwm zâwngtak a hung ni theina dingin.

³²Pathien remti anga hlimtaka in kuomah ka hung a, ei hlim tlâng theina dingin.

³³Remna Pathien chu in rênga kuomah um raw se. Amen.