Read Hmar ROM 2 Bible Online

ROM 2 - Hmar bible

ROM 2

¹Chuleiin, aw mihriem, mi sawisêltu tûkhawm ni la, suonlam hrim i nei nawh, mi dang i sâwisêlna ngeia chun nang le nang thiemnaw inchangtir i nih i sawnnaw! nang a sawisêltu ngei khawma, chuong ang thil chu i thaw ve hlak si a.

²Chuong thil thaw hlaktuhai chunga Pathienin a sawisêlna chu thu indiktak a nih ti ei hriet si a.

³Aw mihriem, chuong ang thil thaw hlaktuhai sawisêltu, nangin chuong ang chu i thaw ve bawk si a, Pathienin a sawisêlna chu pumpel în ring am a ni?

⁴Annawleh, Pathien ṭhatnain simna dingin a ṭhuoi hlak che ti hre lovin, a ṭhatna hauzie le, a en theizie le, a zaidaw theizie dâm chu i ngainêp am a nih?

⁵I lulul le i lungril ngar leiin, lungsenna le Pathien rorêlna feltak hung inlang ding nia ding chun i chungah lungsenna în khâwlkhâwm a ni lem a nih.

⁶Pathien chun mi tin an sinthaw ang peiin rêlpêk a tih,

⁷thil ṭha thaw fan fana, ropuina le chawimawina le bohmang thei nawna zawngtuhai kuoma chun kumkhuoa hringna pêng a tih.

⁸Amiruokchu, kâwmaw suo a, thutak zâwm lova fel nawna zâwm lemtuhai chunga chun Pathien lungsenna le lungawinawna um a tih.

⁹Rinumna le lungngaina nasatak, mihriem thil suksuol pohai thlarau chungah um a ta, Juda mi thlarau chungah um hmasâng a ta, chun, Grik mi thlarau chungah um nâwk a tih.

¹⁰Amiruokchu, thil ṭhataka thawtuhai po po kuoma chun ropuina dâm, chawimawina dâm, lungmuongna dâm pêk nîng a tih; Juda mihai kuomah pêk hmasak nîng a ta, chun, Grik mihai kuomah ni nâwk a tih.

¹¹Pathienin mi ditsak bîk a nei si naw a.

¹²Tûkhawm Dân nei lova thil suksuol chu Dân boin bohmang a ta; chun, tûkhawm Dân nei zinga suksuol chu, Dâna rêlpêkin um a tih.

¹³Dân hretu ringawthai chu Pathien mithmuin mi fel an ni naw a, Dân anga thawtuhai chu mi fela tiemin um lem an tih.

¹⁴Dân nei naw Jentailhai hmanin an lungril insiengpuia dân thilhai kha an thawin, Dân nei naw hai sien khawm anni le anni chu dânah an insiem fâwm a,

¹⁵an lungrilah dân sinthaw chu ziek a nih ti an inentir a; chu chu an sie le ṭha hrietnain an hrietpui a, an lungrilhai chu ân sêl a, akâr leh thiem ân changtir vak a, akâr leh thiemnaw ân changtir vak a.

¹⁶Pathienin ka Chanchin Ṭha hril anga mihriemhai thurûk Isu Krista hmanga a ngaituo ni chun chuong ang chu nîng a tih.

¹⁷Nisienlakhawm, nang Juda hming put i ni si a, Dân chu i ringsan a, Pathien i suong a,

¹⁸a dit zâwng i hriet a, Dân thu inchûktirin i um leiin thil ṭhatak chu ṭha i ti a,

¹⁹nang ngei chu mitdelhai ṭhuoitu, inthima umhai êntu;

²⁰invêthai sukvartu le nautêhai inchûktirtu niin în ring a, Dâna chun varna le thutak um dân i nei leiin.

²¹Chuong ang i ni si chun, nang mi danghai inchûktirtu, nang le nang în chûktir naw am a nih?

²²Nang inru lo dinga mi dang hriltu, nangin în rûk hlak maw? Nang uire lo dinga mi dang hriltu, nang i uire maw? Nang milim theidatu, nangin milim biekna ina thilhai chu în rûk hlak maw?

²³Nang Dân suongtu, nangin Dân i bawsiet leiin Pathien chu i sukhmingse hlak a ni maw?

²⁴An ziek ang ngei khan, Pathien hming chu nangni leiin Jentailhai laiah sukpâwiin a um ta a ni hi.

²⁵Dân zâwmtu i ni chun sertan chu a sâwt tak zet a nih; Dân bawsetu i ni ruok chun i sertan chu tan naw ang el a lo ni tah.

²⁶Chuleiin, sertan naw mîn Dân thu ruothai chu a vawng chun, a sertan naw chu tan anga ngai a ni naw ding am a nih?

²⁷Chun, mani insieng ziea sertan lovin Dân chu a zâwm kim chun, nang, lekha thu le sertan dân nei sia Dân bawsetu chu a sawisêl naw ding che maw?

²⁸Ân lang ela Juda mi ni chu Juda mi tak a ni naw a; ân langa taksa mei meia sertan chu sertan tak tak a ni chuong naw bawk.

²⁹Amiruokchu, ân lang el ni lova Juda mi ni chu Juda tak a nih; chun, sertan tak chu lungril tienga tan a nih, Lekha thu ela ni lovin, Thlarauah a nih; ama chun mihriem inpâk a hlaw naw a, Pathien inpâk a hlaw lem hlak.