Read Hmar ROM 4 Bible Online

ROM 4 - Hmar bible

ROM 4

¹Anleh, Abraham, taksa dâna ei thlatu khan ieng am a hlâwkpui hril ding ei nei a?

²Abrahamin chu a thilthawhai leia thiem inchangtir ni sien chu, suong ding iemani chu nei a tih; Pathien hmaa ruok chun nei naw nih.

³Pathien Lekhain ieng am a hril a? “Abraham chun Pathien a ring a, chu ringna chu a felnaa ruot a nih,” tiin a hril a nih.

⁴Chun, sinthawtu hlaw chu lunginsietnaa ngai a ni naw a, bat anga ngai a ni lem a nih.

⁵Amiruokchu, mi, a thilthawa innghat lova, Pathien hre nawhai thiem inchangtirtu ring lemtu ringna chu, a felnaa ngai a nih.

⁶Mi, a thilthaw ngaituo lova, Pathienin fela a ingaihai hamṭhatzie chu David khawmin:-

⁷“An bawsietnahai ngaidama umhai le, An suolhai inkhuma um chu An hamṭha.

⁸Lalpain suol neia a ingai naw chu an hamṭha,” tia a hril ang khan.

⁹Anleh, chu hamṭhatna chu sertanhai chung chau âm a ni a um, sertan nawhai chunga khawm? “Abraham ringna chu a felnaa ruot a nih” ei ti si a.

¹⁰Chu chu iengti ziea ngai am ni tâng a ta? A sertan hmain am a ni, a sertan hnungin? A sertan hnungin a ni naw a, a sertan hmain a ni lem a nih.

¹¹Chuongchun, sertan lova a um laia, ringnain felna chu a hmu ti inhrietna, sertan inchikna chu a hmu a, chu felna chu an ta dinga ruot a nina dingin sertan lohai laia ringtuhai po po pa a ni theina dingin,

¹²sertanhai pa khawm a ni thei bawkna dingin sertanhai pa chau a ni naw a, ama, ei pa Abraham sertan lova a um laia, ringna a nei anga nei fâwmhai pa a ni lem a nih.

¹³Dân leiin Abraham le a thlahai kuoma chun khawvêl ro hluo ding thu chu tiem a ni naw a, ringnaa felna lei a ni lem.

¹⁴Dâna mihai rohluotuhai an ni si chun, ringna ienga khawm hmang a ni ta naw a, thutiem khawm chu iengkhawm a ni ta nawh;

¹⁵Dân chun lunginsenna a siem hlak si a; Dân um nawnaa chun bawsietna khawm a um bawk nawh.

¹⁶Chuleiin, lunginsietna a ni theina dingin, ringna leiin a nih hi suon po pohai chun thutiem chu matheilova an hmu chu. Dân nei mi chauin an hmu ding a ni naw a, Abraham ringna ang ringna neihai khawmin hmûng an tih. Abraham chu ei rênga pa a nih,

¹⁷mithihai sukhringtu le, thil umnawhai a taka inumtirtu, a iring Pathien mithmua chun; “Chi tamtakhai pain siem ka ti che” tia ziek ang khan.

¹⁸Beiseina âwm a um naw khawmin beiseitakin a ring a, chi tamtakhai pa a hung ni theina dingin, “Khi zât khin i thlahai la um an tih,” tia hril ang khan.

¹⁹Chun, ringna detlo chuong lovin, a taksa thi tah anga um chu a ngaituo a, ama chu kum za lai mi a ni si a, Sara ching khawm a ngaituo bawk a.

²⁰Nisienlakhawm, ringna tlasamin Pathien thutiem chu a ringhla chuong naw a, Pathien a châwimawi a;

²¹a thutiem chu ân hlawtling tir thei ti a ring hle bawk a, a ringna chu a hung det lem ta a.

²²Chuleiin a ringna chu a felnaa ngai a hung ni tah.

²³Chuongchun, a ringna chu a felnaa ngai a ni ti ama ta ding chaua ziek a ni naw a,

²⁴Isu, ei Lalpa mithi laia inthawka keithotu ringtu einihai ta ding khawmin a nih, ei ringna chu felnaa ngai nîng a tih.

²⁵Chu Isu chu ei suolna leiin inmantirin a um a, thiem ei changna dingin keithoin a um bawk a.