Read Hmar ROM 7 Bible Online

ROM 7 - Hmar bible

ROM 7

¹Anleh, unauhai, dân chun mi a dam sûng po a chungah ro a rêl hlak ti in hriet naw am a nih? (Dân hre mihai kuomah ka hril a ni hi).

²Nuhmei pasal nei chu a pasal dam sûng po dânin a pasala khuopdein a um hlak; nisienlakhawm, a pasal a thi chun, pasal kawngah dâna inthawka insuoin a um hlak.

³Chuongchun, a pasal dam sûnga mi dang a nei chun “uirenu” tîng an tih; a pasal a thi ruok chun, chu dâna inthawk chun inthlain a um a; chuongchun, mi dang nei sien khawm uire a ni ta nawh.

⁴Chuongchun, unauhai, Krista taksa pêng in ni leiin dân kawnga sukhlumin in lo um ta a, mi dang, mithi laia inthawka a keitho kha, in nei thei tah, Pathien tienga kan ra theina dingin.

⁵Tisaa ei um lai khan Dân leia nuom zâwng suol hung suokhai chun ei taksa pêngahai thina khawpa ra dingin sin a hung thaw hlak.

⁶Tu ruok hin chu a mi cheltu chu thisanin, Dâna inthawkin inthlain ei um tah; chuleichun lekha ziek hlui ang ni lovin, Thlarau tharin rawng ei bâwl theina dingin.

⁷Ieng am hril tâng ei ta? Dân chu suol am a nih? Teu lo e a; Nisienlakhawm, Dân leia hriet ni naw sien chu suol ka hriet naw ding bah; Dân chun, “Inhnar naw,” ti naw sien chu inhnar hi ka hriet naw ding bah.

⁸Nisienlakhawm, suolin thupêk lei chun remchâng lai hmuin, inhnarna tinrêng ka sûngah ân umtir a. Dân naw chun suolna chu a thi a nih.

⁹Chun, kha hma khan kei dân nei lovin ka hring a; nisienlakhawm, thupêk chu a hung um phingleh suolna chu a hung har a, kei chu ka thi ta a.

¹⁰Chun, hringna dinga thupêk chu thina ding lem a nih ti ka hung hriet ta a;

¹¹suolna chun thupêk lei chun, remchângna hmuin a mi lo hlêm a, thupêk chu hmangin a mi sukhlum tah a nih.

¹²Chuongchun, Dân chu ân thieng a, thupêk khawm chu ân thieng a, a fel a, a ṭha a nih.

¹³Anleh, thil ṭha chu keia ta dingin thina a lo ni am a nih? Teu lo e a! Suolna chu keia ta dingin thina a hung ni ta lem a nih; chuongchun, suolna chu suolna a nih ti ân lang theina dingin, thil ṭha chu hmangin a mi sukhlum a nih. Suolna chu thupêk lei khan suol nasatak a ni theina dingin.

¹⁴Dân chu Thlarau tieng thil a nih ti ei hriet si a; kei ruok chu tisa tienga mi, suol suoka zawr ta hnung ka nih.

¹⁵Sin ka thawhai hi a ngaina ka hriet si naw a, ka thaw hlakhai hi ka thaw nuom zâwng khawm a ni si naw a; ka itheida zâwngtak chu ka thaw lem hlak a nih.

¹⁶Ka thaw nuom naw zâwng chu ka thaw si chun, Dân chu a ṭha tia awi nîng ka tih.

¹⁷Chuongchun, thil ka thawhai hi keiin ka thaw a ni ta naw a, suolna keimaa um chun a thaw a ni lem a nih.

¹⁸Keimaa hin, chu chu ka tisaa hin tina a nih, thil ṭha hrim a um nawh ti ka hriet, thil ṭha thaw nuomna chu keimaah a umdea chu, thil ṭha thawna chu a um si naw a.

¹⁹Ṭhatna thaw ka nuoma chu ka thaw naw a, suolna ka thaw nuom naw chu ka thaw si a.

²⁰Ka nuom naw zâwng ka thaw si chun, a thawtu chu kei ka ni ta naw a, suol keimaa um chu a ni lem a nih.

²¹Chuongchun, hi dân hi ka hung hriet suok tah; thil ṭha thaw ka nuom laiin suolna ka kuomah a hung um hlak a nih.

²²Ka lungril takin Pathien dân chungah ka lâwm si hlak a;

²³nisienlakhawm, ka taksa pênghaia hin dân danglam a um ti ka hriet, chu chun ka lungrila dân chu a do a, ka taksa pênghaia suolna dân umhai chun salah a mi ṭhuoi a nih.

²⁴Mi rimsi ka va ni ngei de aw! Hi thina taksaa inthawk hin tuin am mi sansuok a ta?

²⁵Isu Krista ei Lalpa lei chun Pathien kuomah lâwmthu ka hril a nih. Chuongchun, keima tak chun, ka lungril chun, Pathien dân rawng ka bâwl hlak, ka tisa ruok chun suolna dân rawng ka bâwl hlak.