Read Hmar ROM 9 Bible Online

ROM 9 - Hmar bible

ROM 9

¹Kristaa chun thu taktak ka hril a nih, khêl ka hril nawh, Thlarau Inthieng zâra chun,a ka sie le ṭha hrietna khawmin a mi hrietpui a,

²ka lungrila hin rinumna nasatak le lungngaina bo thei naw ka nei in sawnnaw.

³Ka unauhai, taksa tienga ka chipuihai aiin, kei hi Krista kuoma inthawka ṭhe thlâk khawp hiela thusie phurin um lang ka ti lem a nih,

⁴Israel mi an ni si a; nau nina dâm, ropuina dâm, thuthlung po po dâm, Dân pêkna dâm, Pathien rawngbâwlna dâm, thutiemhai po po an ta a nih;

⁵thlatu bulhai chu an ta a ni bawk a, taksa tienga sui chun Krista chu anni laia inthawka hung suok a ni si a; ama chu thil tinrêng chunga um a na, chatuona inpâk tlâk Pathien a nih. Amen.

⁶Nisienlakhawm, Pathien thu chu iengkhawm ni lo anga um ta a ni naw a. Israelhai chu Israel mi an ni vawng chuong nawh.

⁷Abraham thlahai an ni leiin an rêngin a nauhai an ni chuong bawk nawh; “Isaka hin i thlahai tîng an tih,” ti a ni lem.

⁸Chu chu, taksa nauhai chu Pathien nauhai an ni naw a, thutiem nauhai chu Abraham thlaa ngai an nih tina a nih:

⁹Thutiem chu hi hi a nih: “Tuta hun ang hin hung ka ta, Sara chun naupasal nei a tih,” ti hi.

¹⁰Chu chau khawm chu a ni nawh, pasal pakhat, ei thlatu Isaka inthawka Rebekain nau inphîr a vawn lai khan,

¹¹naute chu an la suok hmaa, a sie le aṭha an la hriet hmain thil thaw lei ni lovin,

¹²a kotu dit lei ni lemin, thlang tieng thua Pathien thu ruot chu a det theina dingin, a kuoma chun, “A upa lemin a naupang lem rawng bâwl a tih,” Pathienin a ti kha.

¹³“Jakob chu ka hmangai a, Esau chu ka theida,” tia ziek ang khan.

¹⁴Ieng am hril tâng ei ta? Pathiena chun fel nawna a um am a nih? Teu lo e a!

¹⁵Ama chun, “Ka lunginsiethai po chu lunginsiet ka ta, zâ ka ngainahai po chunga chun za ngai ka tih,” tiin Mosie kuomah a hril si kha.

¹⁶Chuleiin, a dittu lei a ni naw a, a hnawttu lei a ni bawk nawh, a lunginsiettu Pathien lei a ni lem a nih.

¹⁷Pathien Lekha Thuin Pharao kuomah, “Ahi lei ngawt hin ka tungding che a nih, nangmaa chun, ka thilthawtheina kân entir theina ding le khawvêl po poa ka hming ân thang theina dingin,” a ti si a.

¹⁸Chuongchun, Pathienin a nuom po a lunginsiet a, a nuom po a suklulul hlak a nih.

¹⁹Nang chun ka kuomah “Ieng dinga a la dem rawp am a na? A dit zâwng tûin am a kal a?” i ti ding a ni âwm a.

²⁰Nisienlakhawm, aw mihriem, Pathien sêl veitu chu tû am i ni lie? Thilsiem chun a siemtu kuomah, “Ieng dinga hieng anga i mi siem am a na?” a ti ding am a nih?

²¹Bepil tlang khata bêl pakhat hlutak, bêl pakhat hlu nawtaka siem dingin bêl hemtu chun bêl chungah thu a nei naw am a nih?

²²Lunginsenna bêl bohmang tlâkhai chunga chun, Pathienin a lunginsenna le a thilthawtheina inlangtir nuom sien khawm, a daw hrâm hrâm chun ieng am pawi a ta?

²³Lunginsietna bêl, ropui dinga a lo buotsai lâwkhai chunga chun a lunginsietna hau zie ân entir theina ding a ni phawt chun.

²⁴Chu lunginsietna bêlhai chu Judahai lai chau ni lovin, Jentailhai laia inthawka kohai khawm ei nih.

²⁵Hosea lekhabua, “Ka mihai ni ngai lo chu, ‘Ka mihai’ tîng ka ta, Chun, ka ihmangai ngainawnu chu, ‘Hmangainu’ tîng ka tih.

²⁶Chun, hieng hi hung nîng a ta, an kuoma, ‘Ka mihai in ni nawh,’ tia an umna hmun ngeia chun, Pathien hring nauhai inbûkin um an tih,” tia a hril ang ngei khan.

²⁷Isai khawma Israelhai thu khêkpuiin, “Israel mihai chu tuisuorieta phaiphin zâtin tam hai sien khawm, a ihrem bâk chau chu sandamin um an tih.

²⁸Lalpa chun inrangtakin hnuoi chunga a rorêlna chu a hlen ding a ni si a,” a ti kha.

²⁹Isai bawkin, “Mipuihai Lalpa chun chithlâtu mi lo hlapêk naw sien chu, Sodom angin lo um tâng ei ta, Gomorra anga siemin lo um tâng ei tih,” tia a lo hrillâwk ta ang khan.

³⁰Ieng am hril tâng ei ta? Jentail, felna hnawt nawhai chun felna an lo phâk tah a nih ringna leia felna chu.

³¹Israel, felna dân hnawttuhai ruok chun felna dân chu an phâk zo ta nawh.

³²Ieng lei am a na? Ringna leh an hnawt naw a, thilthawa an hnawt lei a nih. Tlûkna lunga chun an tlu ta si a;

³³“Ngai ta, Ziona chun Tlûkna lung le, Dangna lungpui ka sie a; Tûkhawm ama ring taphawt chu Muolpho naw ni,” tia ziek ang khan.