Read Hmar 1 KORINTH 10 Bible Online

1 KORINTH 10 - Hmar bible

1 KORINTH 10

¹Unauhai, hieng hi in hriet naw ka nuom naw ie, khânga ei thlatuhai po po sûm hnuoiah an um vawng a, an rêngin tuipuia khawm an kai vawng a;

²sûma le tuipuia khan an rêngin Mosieah baptisin an um vawng a,

³an rêngin thlarau tieng bu hmunkhat an fâk seng a,

⁴an rêngin thlarau tieng dâwn ding hmunkhat khawm an dâwn seng kha; anni zuitu thlarau tieng lungpuia kha an dâwn seng kha; chu lungpui chu Krista a nih.

⁵Nisienlakhawm, anni laia mi tam lem chunga chun Pathien a lungni ta naw a, thlalêra khan tluhlumin an um a.

⁶Chun, chuong chu eini ta dingin inentirna a nih, thil suol an châk ang bawk khan ei châk ve nawna dingin.

⁷Anni laia mi ṭhenkhat milim betu an ni ang khan milim betu ni naw ro, “mipui chu fa le dâwn dingin an ṭhung tâwl a, infiem dingin an tho nâwk a,” ti ziek ang khan.

⁸Anni laia mi ṭhenkhatin nunghâk an dit a, ni khata sîng hni le sâng thumin an tlûkhlum pha ang khan, in dit ve nâwng ei tiu.

⁹Anni laia mi ṭhenkhatin Lalpa[2] an fie a, rûla sukbohmanga an um pha ang khan Lalpa chu fie nâwng ei tiu.

¹⁰Anni laia ṭhenkhat an chier a, sukbohmangtu sukbohmanga an um ang khan chier naw bawk ei tiu.

¹¹Chun, chuong chu inentirna dingin an chungah a hung tlung a ni kha; eini hun tâwp hung tlungnahai hi mi zil dingin an ziek a n i bawk a.

¹²Chuleiin, ngîra inngai in ni chun, in tlûk nawna dingin fimkhur ro.

¹³Mihriem ituor thei ang bâk chu thlêmna hrim hrim in chungah a tlung ngai nawh. Pathien chu a ringum a nih; ama chun in tuor thei bâk chu thlêmna in tuor phal naw ni; in tuor theina dingin thlêmna ruolin tlân suokna lampui siem nghâl lem a tih.

¹⁴Chuleichun, ka idittakhai, milim biek hi tlânsan ro.

¹⁵Mi varhai kuoma hril angin ka hril a nih; ka thu hril hi ngaituo ro.

¹⁶Malsâwmna no mal ei isâwm hlak hi, Krista thisen inṭawmpuina a ni naw am a nih? Bei ei khawi hlak hi Krista taksa inṭawmpuina a ni naw am a nih?

¹⁷Eini mi tamtak hi, bei tlang khat, taksa pumkhat ei ni hi; ei rêngin bei tlang khata inthawkin ei chang seng si a.

¹⁸Taksa tienga Israelhai chu en ta u; inthâwina sa fatuhai chun maichâm chu an inṭawmpui a ni naw am a nih?

¹⁹Ieng am a na ka hril? Milim hmaa thil inhlân chu hlutna nei thil am a nih? Milim khawm chu thil tlâktlai am a ni ?

²⁰Jentailhai inthâwina chu Pathien kuomah ni lovin, khawhrihai kuomah an inthâwi hlak ti ka hril lem a nih; nangnirawi chu khawhrihai in inṭawmpui ka nuompêk naw cheu a ni hi.

²¹Lalpa no le khawhri no dâwn kawp thei naw ti niu, Lalpa dawkâna le khawhri dawkâna chu fa kawp thei naw bawk in tih.

²²Annawleh, Lalpa chu thîk dingin chawk tho ei tum a ni maw? Ama nêkin ei hrât lem am a nih?

²³Thil iengkim thaw a thieng a; nisienlakhawm, thil iengkim thaw a ṭha kher nawh. Thil iengkim thaw a thieng a; nisienlakhawm, thil iengkim thawin a mi siem ṭha kher nawh.

²⁴Tûkhawmin mâni ṭhatna ding zawng lovin mi dang ṭhatna ding zawng lem raw se.

²⁵Sa dâwra an zawr taphawt chu sie le ṭha hrietna leia iengkhawm indawn lovin fa el ro;

²⁶hnuoi le a sûnga um po po hi Lalpa ta a ni si a.

²⁷Awinaw laia mi tuin amanih a fiel cheu a, fe in nuom si chun, sie le ṭha hrietna leiin iengkhawm indawn chuong lovin an pêkhai taphawt cheu chu fa el ro.

²⁸Amiruokchu, tûin amanih, “Hi hi inthâwina a nih,” tiin a hril cheu chun, ân hriettirtu cheu lei le, a sie le ṭha hrietna leiin fa naw ro;

²⁹nang a sie le ṭha hrietna ka ti naw a, mi dang sie le ṭha hrietna chu ka ti lem a nih. Iengdinga mi dang sie le ṭha hrietna chun ka zalênna a sawisêl am a na?

³⁰Lâwmtaka ka chang chun, a chunga lâwmthu ka hrilna chunga hin, iengdinga hrilsieta um am ka na?

³¹Chuongchun, in fâk khawmin, in dâwn khawmin, in thaw taphawta chun Pathien ropuina ding ruokin thaw ro.

³²Judahai ta ding khawmin, Grik mihai ta ding khawmin, Pathien kohranhai ta ding khawmin an tlûk phâna ding hrim hrim iengkhawm thaw naw ro.

³³Keiin mâni ta dinga ṭangkaina zawng lova sandam an ni theina dinga mi tamtak ta dinga ṭangkaina zawng lemin, mi po po iengkimah ka suklâwm ang tak hin.