Read Hmar 1 KORINTH 16 Bible Online

1 KORINTH 16 - Hmar bible

1 KORINTH 16

¹Chun, mi inthienghai ta dinga thawlâwm thu kha chu, Galati rama kohran hai kuomah thu ka pêk angin nangni khawmin lo thaw ve ro.

²Ni saria ni hmasatak peia chun mi tinin, malsâwmna in hmu zie ang peiin siekhâwl seng unla, ka hung phaa thawlâwm dâwl hrim a um nawna dingin.

³Chun, in lunginsietna thilpêk chu Jerusalema fepui dingin ka hung tlung phaleh tûkhawm ṭha in ti ti lekhahai chawiin tir ka tih.

⁴Chun, ka fe vena âwm a ni lem chun, kei leh fêng an tih.

⁵Chun, Makedonia ram ka fang suok hnungin in kuomah hung ka tih: Makedonia ram chu ka fang hrim hrim ding a ni si a.

⁶Nangni kuoma ruok chu ka châm zing a ni thei, thlasik sûng po khawm a ni el thei; khâwlai khawm ka fena taphawta nangniin in mîn thla theina dingin.

⁷Tuta fe malam ela hmu cheu ka nuom naw a, Lalpain rem a ti chun in kuoma sâwt deu châm ka beisei si a.

⁸Nisienlakhawm, Pentikost chen Ephesia hin châm zing ka tih,

⁹kawtkhâr lientak le ṭangkai tak chu ka ta dingin ân hawng si a, dotuhai tamtak an um bawk.

¹⁰Chun, Timothe kha a hung tlung chun ṭi lova in kuoma a umna dingin fîmkhur ro; keiin ka thaw ang bawkin Lalpa sin chu a thaw si a.

¹¹Chuleiin, tûkhawmin hmusit naw raw se; ka kuoma a hung theina dingin thlamuongtakin inthla lem ro, unauhai ruolin ama lo hmu ka beisei si a.

¹²Ei unau Appolo thu kha chu, unauhai ruola in kuoma hung dingin ka ngên rak a, anachu, tuta ṭum chu hung a nuom naw tawp el; a remchâng pha ruok chu hung a tih.

¹³Invêng unla, ringnaa chun ngîr det unla, insukhuoi unla, hrâttakin um ro,

¹⁴In thaw taphawt chu hmangainaa thaw ni raw se.

¹⁵Unauhai, ka ngên cheu a nih: Stephan sûnghai chu Akaia rama awihai hmaṭhuoitu an na, mi inthienghai rawng bâwl dingin an inpêk ti in hriet a,

¹⁶chuong ang mihai kuoma le sinthawa ṭhangpui le sin inrim taphawt kuoma chun intuklût dingin.

¹⁷Chun, Stephan hai, Phortunata hai, Akaika hai an hung hi ka lâwm a nih, in um naw khawm inlang lova an mi siem lei hin.

¹⁸Anni hin ka lungril le nangni lungril an mi sukhar si a; chuongchun, hieng ang mi hi lâwm ro.

¹⁹Asia ram kohranhai hin chibai an bûk cheu. Akuila le Priskilla, an ina kohran inkhawmhai le hin Lalpaa chun chibai tamtakin an bûk cheu.

²⁰Unau po po hin chibai an bûk cheu. Infâwp inthiengin chibai inbûk seng ro.

²¹Kei Paulain keima kut ngeia chibai ka bûkna cheu a ni hi.

²²Tûkhawmin Lalpa a hmangai naw chun ṭawngsephurin um raw se.[14] Ei Lalpa chu a hung ie[15] .

²³Lalpa Isu Krista lunginsietna chu in kuomah um raw se.

²⁴Krista Isua ka hmangaina hi in rênga kuomah um raw se. Amen.