Read Hmar 1 KORINTH 3 Bible Online

1 KORINTH 3 - Hmar bible

1 KORINTH 3

¹Chun, unauhai, Thlarau mi kuoma hril angin in kuomah thu ka hril thei naw a, tisa mihai kuoma hril angin ka hril lem kha; Kristaa nautêhai kuoma hril ang elin.

²Bu ni lovin, nênetuiin ka châwm cheu kha, bu in la fâk thei naw leiin; anih, tu khawm hin in la fâk thei naw rawp a nih, tisa mi in la ni rawp leiin.

³Nangni laia inthîkna le insêlna a um hlak leiin tisa mi la niin mihriem angin in la um zing a ni naw am a nih?

⁴Mi pakhatin,“Paula pâwl ka nih,” mi dangin, “kei chu Appolo pâwl ka nih,” in ti sûng chu mihriem in ni zing a ni naw am a ni ?

⁵Appolo chu ieng am a ni leh? Paula khawm chu ieng am a na? Rawngbâwltu nangni inawitirtu cheu chau an nih in sawnnaw; chu khawm chu Lalpain a ipêk ang ve ve chau a nih.

⁶Keiin ka phun a, Appoloin tuiin a châwm a, nisienlakhawm, Pathienin ân ṭhangtir a nih.

⁷Chuongchun, ân ṭhangtirtu Pathien chau naw chu a phuntu chu iengkhawm a ni naw a, tuia châwmtu khawm chu iengkhawm a ni nawh.

⁸Chun, a phuntu le tuia châwmtu pumkhat an nih, nisienlakhawm, mâni sinthaw ang peiin lâwmman hmu ve vêng an tih.

⁹Keini chu Pathien sinthawpuituhai kan ni si a, nangni Pathien lohma chu in na, Pathien in bâwl chu in ni bawk a nih.

¹⁰Pathien lunginsietna ka kuoma pêka um ang peiin in bâwl hotu tak vartak angin keiin lungphûm ka rem a, mi dangin a chungah in an bâwl a, nisienlakhawm, mi tin a chunga bawl dingziea chun fimkhur seng raw hai se.

¹¹Lungphûm rem tasa naw chu tûkhawma lungphûm dang an rem thei si naw a, chu lungphûm chu Isu Krista chu a nih.

¹²Chun, lungphûm chunga chun tûkhawmin rângkachakin amanih, tangkain amanih, lungmantamin amanih, thingin amanih, sâwlhnain amanih, bupâwlin amanih bâwl sienla, mi tin sinthaw chu inlang a tih;

¹³ni chun a suklang ding a ni si a, meiin ân lâr ding a ni leiin, mei ngei chun mi tin sinthaw chu ieng ang am a ni fie tâng a tih.

¹⁴Tû sinthaw khawm a chunga a bâwl chu a um zing chun, ama chun lâwmman hmûng a tih.

¹⁵Tû sinthaw khawm a kâng chun, ama chun chân a tih, ama tak ruok chu sandamin um a tih, nisienlakhawm, meia fe thleng ang elin.

¹⁶Pathien in in ni le Pathien Thlarau nangniah a um ti in hriet naw am a nih?

¹⁷Tûkhawmin Pathien in chu a sukkhawhlo chun Pathienin ama chu sukkhawhlo vêng a tih, Pathien in chu ân thieng si a, chu in chu nangni in nih.

¹⁸Tûkhawmin ama le ama inhlêm naw raw se. Nangni laia tûkhawm hi khawvêla vara inngai chu a hung var theina dingin mi invêtah hung inchang phawt raw se.

¹⁹Hi khawvêl varna hi Pathien ngaiah invêtna a ni si a. “Ama chun mi varhai chu anni var vervêknaah a âwk hlak,” ti ziek a ni si a.

²⁰“Lalpa chun mi varhai ngaituona chu a thlâwn a nih ti a hriet,” ti ziek a ni nâwk bawk a.

²¹Chuleiin, tûkhawmin mihriemhai suong naw raw se.

²²Iengkim hi in ta vawng a ni si a: Paula amanih, Appolo amanih, Kipha amanih, khawvêl amanih, hringna amanih, thina amanih, thil um tasahai amanih, a hung um dinghai le chun a rêngin in ta vawng a nih.

²³Nangni khawm Krista ta in na, Krista khawm chu Pathien ta a nih.