Read Hmar 1 KORINTH 4 Bible Online

1 KORINTH 4 - Hmar bible

1 KORINTH 4

¹Keinirawi hi Krista rawngbâwltu le Pathien thurûk enkawltuah miin mi ngai raw hai se.

²Hitaka hin enkawltu chu mi ringum ni a ngai bawk a nih.

³Nisienlakhawm, nangniin in mi fiena le, mihriem ngaituonain in mi fiena chu ka ta dingin thil chîterek ang a nih, kei le kei khawm kân fie ngai bawk nawh.

⁴Iengkhawm indemna ding kân hriet si naw a, nisienlakhawm, chu chun thiem a mîn changtir chuong nawh, a mi fietu chu Lalpa a ni lem.

⁵Chuongchun, a hun hma hin iengkhawm fie naw ro, Lalpa hung hmakhat chu, ama chun inthima thil thuphmanghai chu varah hung la suok a tih, lungrila tumhai khawm chu suklang bawk a tih; chu pha chun mi tinin Pathien kuoma chun an chantâwka inpâkna hlaw seng tâng an tih.

⁶Chun, unauhai, thu ziekhai chu in hmu khûm nawna dingin, keinia hin in inchûk theina dingin, chuong thuhai chu in ṭhatna dingin kei le Appolo kân bel a nih, nangni laia tûkhawmin pakhat suonga pakhat in uongkhum nawna dingin.

⁷Nang tûin am a sukdanglam chuong che a? Dawng naw chu ieng am i nei leh? I dawng a ni si chun iengdinga i dawng ni lo anga i uongpui am a na?

⁸Tuta inthawkin in tlai ta a, tuta inthawkin in hausa ta a, kan ṭhang lovin ro in rêl a ni ta hi! Anih, ro rêl tak tak unla kan nuom a nih, keini khawma nangni le ro kan rêl theina dingin.

⁹Pathienin keini tirkohai hi thi dinga ruot tasa angin a nuhnungtakah a mi târsuok angah ka ngai a nih; khawvêl le vântirkohai le mihriemhai mithmuah ennuoma siemin kan um hi.

¹⁰Keini chu Krista leiin mi invêt kan nih, nangni ruok chu Kristaa chun mi var in ni lem a nih! Keini chu kan hrât naw a, nangni ruok chu in hrât a nih! Nangni chu mi inpâkin in um a, keini ruok chu mi hmusitin kan um a nih.

¹¹Tu chen khawm hin, kan phîng a ṭâmin kan dang a châr a, silfên kan khawp naw a, mi kut inthak nûlna kan na, umna bulbâl kan nei naw a,

¹²mâni kuta sin thawin kan inrim hle hlak a, miin an mi halin mal kan sâwmpêk a, miin an mi suknawmna leh kan tuor fan fan a;

¹³miin an mi hrilsiet leh zaidamtakin kan hril hlak, tu chen khawm hin khawvêl hnâwlhnawk, thil po po hmunhnawk angin an mi siem a nih.

¹⁴Sukzak ding cheuin hieng thu hi ka ziek naw a, ka nau dittakhai anga infuina ding cheuin ka ziek lem a nih.

¹⁵Kristaa chun inchûktirtu sîng khat nei unla khawm pa chu tamtak in nei si naw a nih; keiin Krista Isua chun Chanchin Ṭhain ka nei cheu a ni kha.

¹⁶Chuongchun, mîn chûk dingin ka ngên cheu a nih.

¹⁷Chuleichun, Timothe, Lalpaa ka nau dittak le ringum chu in kuomah ka hung tir a nih, ama chun Kristaa ka umdân ram tina kohran tina ka închûktir hlak ang hi inhriettir nâwk a ti cheu.

¹⁸Chun, kei in kuoma hung nâwk ta naw ding ang elin ṭhenkhat in uong a nih.

¹⁹Nisienlakhawm, Lalpain rem a ti chun, sâwtnawtê hnungah in kuomah hung ka tih; chuongchun, mi uonghai thu chu ni lovin, an thilthawtheina chu hre lem tâng ka tih.

²⁰Pathien ram chu thuah a um a, thilthawtheinaah a um lem a nih.

²¹A ieng am in nuom lem? Hmawl chawiin am in kuomah ka hung ding, annawleh hmangaina le thuhnuoirawl lungril putin?