Read Hmar 1 KORINTH 5 Bible Online

1 KORINTH 5 - Hmar bible

1 KORINTH 5

¹Nangni lai inditna pawrche a um ti ân thang veng vung a nih, chuong ang inditna chu Jentailhai lai hmana um ngai lo, nangni laia mi pakhatin mâni pa nuhmei a nei kha.

²Chun, chuong thil thawtu chu nangni laia inthawka hnawtdawk dinga lungngai nêk hmanin in uong lem si a.

³Keima ngei hi taksain ka ṭhang naw nâk a, thlaraua ruok chu ka ṭhang a, chuong ang thil chuong ang lâwm lâwm thawtu chu tu khawm hin Lalpa Isu Krista hmingin nangni laia ṭhang zing angin ka lo ngaituo zo tah:

⁴nangni le ka thlarau chu ei Lalpa Isu thilthawtheinaa inkhâwmin;

⁵mi chuong ang chu a thlarau Lalpa nia chun sandamin a um theina dingin a taksa chu sukbohmang dingin Setan pe inla ka ti a nih.

⁶In uong san hi a ṭha naw ie, chawl tlâwmtêin bei tlang chu a zawpsuo vawng hlak ti in hriet naw am a nih?

⁷Chawlṭhanglo in ni ang bawkin bei tlang thar in ni theina dingin chawl hlui chu zenfai ro. Ei Fekân Ruoiṭhena ding khawm an that ta si a, Krista ngei chu;

⁸chuleiin, ruoi ṭhêng ei tiu, chawl hluia ṭhe lovin, nunsiet le suolna chawla ṭhe bawk lovin, takna le indikna chawlṭhanglo beiin ruoi ṭhe lem ei tiu.

⁹Ka lekhathawna khan indit hmanghai pâwl lo dingin in kuomah ka ziek kha;

¹⁰hi khawvêla indit hmanghai amanih, duâm le hlêpruhai amanih, milim betuhai amani chu pâwl dêr lo ding ti ka ni naw a, chuongchu ni sien la khawvêla inthawka fe suok ngei ding in ni ding a ni si a.

¹¹Tu ruok hin chu tûkhawm unau hming input siin indit hmang mi amanih, mi duâm amanih, milim betu amanih, inhalhmang amanih, zu inruihmang mi amanih, hlêpru mi amani ni sienla, pâwl lo dingin in kuomah ka ziek a nih; chuong ang mi kuoma chun a fâk khawm fa lo dingin.

¹²Puotienga mi chu keiin ka ngaituona ding iengam a um a?

¹³Nangniin sûngtienga mi in ngaituoin puotienga mihai ruok chu Pathienin a ngaituo hlak a ni naw am a nih? chu mi suol chu nangni laia inthawkin hnawt dawk ro.