Read Hmar 1 KORINTH 6 Bible Online

1 KORINTH 6 - Hmar bible

1 KORINTH 6

¹Nangni laia tûkhawmin mi dang chungah thubuoi nei unla mi inthienghai hmaa intlun lovin mi felnawhai hmaah intlun ngam ding am a nih?

²Anleh, mi inthienghai chun khawvêl hi an ngaituo ding a nih ti in hriet naw am a nih? Chun, khawvêl hman hi in ngaituoa um ding a ni chun, thil chîntakhai khawm chu ngaituo tlâklo in ni ding am a nih?

³Tulai dam sûng khawsak thu chu hrillo, vântirkohai chen khawm ei ngaituo ding a nih ti in hriet naw am a nih?

⁴Chuongchun, tulai dam sûng khawsak thuhai ngaituo ding in neiin kohran laia mi hmusitumhai chu in inngaituotir hlak am a nih?

⁵In inzakna dingin ka hril a nih. A unau kâra thu sukthlu thei, mi var pakhat khawm nangni lai in hmu thei naw nîng a ti maw!

⁶Unauin a unau rorêlnaa ân tlun hlak hi? Awilohai hmaah a ni nâwk nghâl si a.

⁷Indiktak chun, nangni kâra thubuoi in nei hin, in tlâwm dêr tah tina a nih. Iengleia ân diknaw lem in ni el naw am a na? Iengleia a dâwng lem in ni el naw am a na?

⁸Anih, nangni ngei khawmin in unauhai chungah in sukdik naw a, in sukdâwng hlak.

⁹Anleh, mi felnawhai chun Pathien ram hluo naw ni hai ti in hriet naw am a nih? Hlêmin um naw ro; indithmanghai amanih, milim betuhai amanih, uirehai amanih, mihurhai amanih, mawngkawhurhai amanih,

¹⁰inruhmanghai amanih, mi duâmhai amanih, zu inruihmanghai amanih, inhalhmanghai amanih, hlêpruhaiin amanih Pathien ram hluo naw ni hai.

¹¹Chun, nangni ṭhenkhat chuong ang mi in ni hlak kha; nisienlakhawm, Lalpa Isu Krista hminga le ei Pathien Thlaraua sâwpfai in ni ta a, sukthieng in ni ta a, thiemchang in ni tah.

¹²Thil iengkim thaw ka ta dingin a thieng a; nisienlakhawm, thil iengkim thaw a ṭha kher nawh; thil iengkim thaw ka ta dingin a thieng a; nisienlakhawm, ieng thu hnuoia um khawm kân phal nawh.

¹³Fâk dinghai chu phîng ta ding a na, phîng chu fâk dinghai ta ding a nih; nisienlakhawm, Pathienin sukbo ve vêng a tih. Chun, taksa hi inditna ding a ni naw a, Lalpa ta ding a ni lem: Lalpa khawm chu taksa ta ding a nih.

¹⁴Pathienin Lalpa chu a keitho a, eini khawm a thilthawtheinain mi keitho vêng a tih.

¹⁵In taksahai chu Krista pênghai a nih ti in hriet naw am a nih? Krista pênghai chu lâkpêkin nawchizawr pênghaiah ka siem ding am a nih? Teu lo e!

¹⁶Anleh, nawchizawr zawmpui chu ama leh pumkhat an nih ti in hriet naw am a nih? “An pahni chun tisa pumkhat hung ni tâng an tih” ti ziek a ni si a.

¹⁷Lalpa inzawmpui ruok chu ama leh Thlarau pumkhat an nih.

¹⁸Indit hi tlânsan ro. Mihriem isuksuol tinrêng hi taksa puotiengah a nih; mi dit hmang ruok chun ama taksa chungah a suksuol a nih.

¹⁹Anleh, in taksa chu in sûnga um Pathien kuoma inthawka in hmu Thlarau Inthieng in a ni ti in hriet naw am a nih? Mâni ta khawm in ni naw a,

²⁰mana inchâwk in ni tah in sawnnaw; chuleiin, in taksaa chun Pathien chawimawi ro.