Read Hmar 1 KORINTH 9 Bible Online

1 KORINTH 9 - Hmar bible

1 KORINTH 9

¹Zalên ka ni naw am a nih? Tirko ka ni naw am a nih? Ei Lalpa Isu chu ka hmu ta naw am a nih? nangnirawi chu Lalpaa ka sinthaw in ni naw am a nih?

²Mi danghai ta dingin tirko ni naw lang khawm, nangni ta ding bêk chun ka nih; Lalpaa ka tirko nina inchikna chu nangni hi in nih in sawnnaw.

³A mi suosaltuhai ka idawnna chu hi a nih.

⁴Fa le dâwn dingin thu kan nei naw am a nih?

⁵Tirko danghai le Lalpa unauhai le, Kipha ang khan ringtu nuhmei ṭhuoi vêl dingin

⁶kei le Barnabain thu kan nei naw bîk am a nih?

⁷Sipai tu am mâni inchâwm fâwmin râl kâp hlak an um a? Tuin am a ra fa si lovin Grêp huon a siem hlak leh? Annawleh, tuin am ranruol nênetui dâwn si lovin ranruol a vai hlak a?

⁸Chuong thu chu mihriem ang elin ka hril am a nih? Dân thu khawmin chuong ngei chu a hril tho ni lo am a nih?

⁹Mosie Dân Lekhabua chun, “Sebâwng chalin bu a chîl lai chun a hmûr khit naw rawh,” ti ziek a ni si a. Pathienin sebâwng chal am a ni a ngaituo tak chu?

¹⁰Keini ta ding lieu lieua a hril a ni lem naw am a nih? Ni e a, keini ta dingin a nih an ziek, hnuoi inlettu chun beisei neia inlet ding a nih, bu vawtu khawm chun chan nei ve beiseia vuok ding a ni si a.

¹¹Keinin thlarau tieng thilhai chu in kuomah kan tu ta chun, in tisa tieng thilhai chu sîk inlang khawm thil hlâwktak am nîng a ti?

¹²Mi dang hmanin in chunga thuneina chu an chang chun, keini hi chang ding kan ni zuol a ni naw am nih? Nisienlakhawm, chu thuneina chu kan hmang nawh. Krista Chanchin Ṭha kan hluo nawna dingin iengkim kan tuor hrâm hrâm hlak a nih.

¹³Thil ser buotsai vêltuhai chun Pathien biekina thil an fâk le maichâm rawngbâwltuhai chun, maichâm leh chanvo an nei ti in hriet naw am a nih?

¹⁴Chuong ang tak chun Lalpa chun Chanchin Ṭha hriltuhai chu Chanchin Ṭha chu an fâk hmuna dinga a ruot a nih.

¹⁵Nisienlakhawm, kei chun chuong chu pakhat khawm ka hmang naw a nih; ka chungah chuong anga in thawna dinga ka ziek a ni bawk nawh; tûkhawmin ka isuong hi iengkhawm ni lova an siem nêk chun thi el lang ka ta dingin a ṭha lem si a.

¹⁶Chanchin Ṭha hril lang khawm suong ding hrim hrim ka nei si naw a; thaw mâkmaw ka chungah ân nghat a ni si a; Chanchin Ṭha hril naw lang ka chung a rik ding a ni si a.

¹⁷Chu chu mâni ditthlangnaa ka thaw chun lâwmman ka nei a nih; nisienlakhawm, mâni ditthlangna lei a ni si naw chun Chanchin Ṭha enkawlna sin hi inkawltir el nîng ka tih.

¹⁸Ka lâwmman chu ieng am ni tâng a ta? Chanchin Ṭhaa ka thuneina chu ka hmang zo nawna dingin Chanchin Ṭha ka hril hin, hlaw boa Chanchin Ṭha rawng ka bâwl thei hi a nih.

¹⁹Tû suok khawm ni naw lang khawm mi tam lem ka lâk lût theina dingin, mi po po suokah kân siem tah.

²⁰Chuongchun, Judahai ka lâk lût theina dingin Judahai kuomah Juda mi angin ka um hlak; Dân hnuoia umhai ka lâk lût theina dingin, Dân hnuoia umhai kuomah Dân hnuoia um angin ka um hlak, Dân hnuoia um si lovin.

²¹Dân neinawhai ka lâk lût theina dingin dân neinawhai kuomah dân neinaw angin ka um hlak, Pathien dân awilo si lovin, Krista dân zâwm siin.

²²Hrâtnawhai ka lâk lût theina dingin hrâtnawhai kuoma chun hrâtnaw angin ka um hlak; iengti kawng zâwngin amanih bêka ṭhenkhathai bêk ka sandam theina dingin mi po po kuomah iengkim ka ni tah.

²³Chanchin Ṭha leiin iengkim ka thaw hlak, chan ka nei ve theina dingin.

²⁴Intlânsiekhai chu an rêngin an tlân a; nisienlakhawm, pakhat chauin lâwmman a hmu hlak ti in hriet naw am a nih? In hmu theina dingin chuong ang tak chun tlân ro.

²⁵Chun, inruolsieknahai dâma chun a thaw ṭâl ṭâl taphawt chu iengkimah an insûm hlak a nih. Anni chun lallukhum sethei hmu dingin an thaw a,

²⁶eini ruok chu lallukhum setheilo hmu dingin. Chuong angtak chun a san mumal hre lo lovin ka tlân hlak.

²⁷Boruok chau hnek lovin kei le kei kân hnek a, ka taksa ka hnek rak rak a, suokah ka siem hlak; chuong naw chun, mi danghai kuoma tlâng ka însampui hnung khawmin ieng amanih tiin kei ngei khawm hi peithlâkin um rawi ka tih.