Read Hmar 2 KORINTH 1 Bible Online

2 KORINTH 1 - Hmar bible

2 KORINTH 1

¹Paula, Pathien ditzâwnga Krista Isu tirko le ei unaupa Timothe chun: Korintha Pathien kohran umhai kuomah, Akaia rama mi inthieng um po pohai kuoma leh:

²Pathien ei Pa le Lalpa Isu Krista kuoma inthawka lunginsietna le inremna in kuomah um raw se.

³Ei Lalpa Isu Krista Pathien le Pa, lunginsietnahai Pa le thlamuongna po po Pathien chu inpâkin um raw se.

⁴Pathienin keini a mi thlamuonna ngeiin, rinum ieng anga umhai khawm chu kan thlamuon ve theina dingin, ama chun kan rinumna po poah a mi thlamuon hlak.

⁵Krista tuornahai chu kan chungah a sipliem angtakin kan thlamuongna hi Krista zârah a sipliem a nih.

⁶Nisienlakhawm, rinuma kan um leh nangnirawi thlamuongna ding le sandamna ding a na, thlamuonga kan um leh nangni thlamuong vena ding a nih; chu chun ka rinum tuor bawk hi seltaka in tuornaa chun a thaw hlak a nih.

⁷Chun, rinumna chang vehai in ni angin, thlamuongna chang vehai in ni bawk ti kan hrietin, kan beisei pêkna cheu hi a det a nih.

⁸Unauhai, Asia rama kan chunga rinumna tlung thu kha in hriet naw kan nuom naw a, khânga nasataka tuor zo ruol lova, dam hrim khawm beisei lo khawp hiela deldea kan um kha.

⁹Anih, keinia chun thi chau hmabâk tah angah kan inhriet a, chu chu mâni inring lova Pathien, mithi keithotu chu, kan ring lemna ding a lo nih.

¹⁰Ama chun chuong ang lâwma thina nasaa inthawk chun a mi lo sansuok ta a, mi la sansuok nâwk a ta: mi la sansuok nâwk pei a tih ti kan beisei tlat a nih,

¹¹ṭawngṭaina tamtak dawnnaa malsâwmna kan dawnghai leiin mi tamtakin kan aia lâwmthu hrilna an nei theina dingin nangni khawma ṭawngṭainain mi ṭhangruolpui tlat ro.

¹²Kan isuong chu hi hi a nih: kan sie le ṭha hrietna thu inhriettir chu, inthiengna le Pathien indikna neiin, tisa varnaah ni lovin, Pathien lunginsietna lemin, khawvêla hin kan châng kha, nangni tiengah kan châng ṭha nâwk zuol a.

¹³In tiem hlak a, a awi khawm in iawi bawk hlak naw kha chu, in kuomah thu dang iengkhawm kan ziek naw a, a tâwp chenin kan thu in awi kan beisei bawk a nih.

¹⁴Ei Lalpa Isu nia chun nangni kan isuonghai in ni ding a nih ti nangni mi ṭhenkhatin in mi awipêk ta ang khan.

¹⁵Chun, chu ringna chu neiin, lunginsietna lêt hni in hmu theina dingin in kuomah hung hmasa lang ka ti a,

¹⁶nangni sir malamin Makedonia ramah fe pei lang, Makedonia rama inthawkin nangni kuoma hung lêt nâwk dingin. Chun, Judai rama ka fena dinga chun nangni mîn thlain um lang ka ti bawk a.

¹⁷Chuongchun, chuong ang ka lungril lai khan kan lungril det nawzie inentir am ka nih? Annawleh, ka kuomah, “A nih, a nih,” ti le, “A ni nawh, a ni nawh,” ti chu um ve ve dingin, thil thaw ka tum hlak chu tisa angin am a ni ka tum?

¹⁸Iengkhawm ni raw se, Pathien a ringum angin, nangni tienga ka thu hi “A nih” ti le, “A ni nawh,” ti a ni ve ve si nawh.

¹⁹Pathien Naupa Isu Krista, a thu kei le Silvan le Timothein kan ihril kha, “A nih” le “A ni nawh,” a ni ve ve si naw a; amaa chun, “A nih,” ti a um lem a nih.

²⁰Pathien thutiem chu iengzât khawm ni sien la, amaa chun, “A nih,” ti chu a um si a. Chuongchun, ama lei khawmin, “Amen,” ti chu a um a nih, keinihai leia Pathien ropuina dingin.

²¹Chun, Kristaa nangni le a mi sukdettu le hriek mi nâltu chu Pathien a nih;

²²ama chu a mîn chiktu le ei lungrila zakhamna thlarau mi petu a ni bawk a.

²³Nisienlakhawm, ka thlarau chunga hretu dingin Pathien ka ko a nih, nangni hla ding cheuin a nih Korinth khuoa ka hung ta naw.

²⁴In ringna chungah inlalna ka nei ka ti naw a, in lâwmna ṭhangpuitu ka nih, ka ti lem a nih, ringnaa ngîr in ni si a.