Read Hmar 2 KORINTH 11 Bible Online

2 KORINTH 11 - Hmar bible

2 KORINTH 11

¹Kân vêt deunaa hin nangnîn in mi daw thei ka va nuom de! Anih, daw khawm in mi daw thei ngei a.

²Pathien thîknain a nih in sawnnaw ka thîk cheu chu; Krista kuoma chun nunghâk inthieng anga ka pêk theina ding cheuin, pasal pakhat ka huol pêk si cheu a.

³Nisienlakhawm, rûl chun a zâwrnain Evi a hlêm ang khan Krista tienga takna le inthiengnaa inthawk chu ieng amanih tiin in lungril chu sukkhawhlo rawi an tih ti kân lau a nih.

⁴Mi dang hungin Isu dang, a thu kan ihril ngai naw a hril a, thlarau danglam in la dawng ngai naw in dawngin, chanchin ṭha dang in ilâwm ngai naw chu in lâwmin in ngaithei pei el a ni maw?

⁵Chu tirko lien takhai chu ieng kawnga khawm ka tluk naw ka ring naw a nih.

⁶Thu hrila chu ṭawng hmang thiem naw lang khawm hrietnaa chun chuong chu ka ni naw a; chu chu iengkima fietakin nangni tieng kan inlangtir kha.

⁷Annawleh, Pathien Chanchin Ṭha nangni sêngna um hlek lova ka hril cheu a, dawmsânga in um theina dinga kân sukhnuoi khan ka lo suksuol a ni maw?

⁸Nangni rawng ka bâwl theina dingin an kuoma inthawka hlaw lain, kohran danghai sum ka sukhekpêk a.

⁹Chun, in kuoma ka um a, ka tlâksam lai khan tûkhawmin an mîn khâwkpui naw a; unauhai chu Makedonia rama inthawka an hungin ka tlâksamna chu an mi hung phuhrûkpêk a ni si a; iengkimah nangni inkhâwkpui lo dingin kân siem kha, khâng ang khan insiem zing ka tih.

¹⁰Krista thutak keimaa a um ang hin Akaia ram tienga hi ka suongna hi tûkhawma mi sukbo pêk naw ni hai.

¹¹Ieng leiin am? Ka lunginsiet naw lei cheu am a nih? Ka lunginsiet zie cheu chu Pathienin a hriet.

¹²Nisienlakhawm, remchângna hmu nuomtuhaia inthawka remchângna chu ka sâttan theina dingin, ka thaw hlak hi thaw pei ka tih, an suongnaa chun keini um ang hin an hung um theina dingin.

¹³Mi chuong ang mi chu, Krista tirkoa insiem fâwm, tirko tehlêmhai, sinthawtu mi hlêm hmanghai an ni si a.

¹⁴Chu chu a mak nawh, Setan meu khawm var tirkoah ân siem fâwm hlak si a.

¹⁵Chuleiin, a rawngbâwltuhai khawm chu felna tirkoah insiem fâwm hai sien khawm a mak a ni nawh, chuonghai tâwpna chu an thil thaw ang pei nîng a tih.

¹⁶Hril nâwk hlak ka tih, tûkhawmin invêtah mi ngai naw raw hai se; nisienlakhawm, chuonga in mi ngai si chun, kei khawmin tlâwmtê bêka ka suong ve theina dingin, invêt angin mi daw bawk ro.

¹⁷Ka hril hi Lalpa thu angin ka hril naw a, ka insuongna ringzona leiin invêt ang takin hril ka ni lem a nih.

¹⁸Mi tamtakin tisa anga an suong leiin kei khawmin hang suong vêng ka tih;

¹⁹nangni chu le, mi var in ni leiin invêthai chu lungawitakin indaw hlak si a.

²⁰Miin suokah siem sienla cheu, fa zo duok sienla cheu, salah man sienla cheu, ama le ama inchawimawi sienla, in hmaiah ben sienla cheu khawm in daw hlak si a.

²¹Kan lo hrât ta naw angin, insitin ka hril a nih; nisienlakhawm, tûkhawmin ieng kawnga khawm an ngam taphawt (invêttakin hang hril ta inla) kei khawmin ka ngam.

²²Hebrai mi an ni maw? Kei khawm ka nih. Israel mihai an ni maw? Kei khawm ka nih. Abraham suonhai an ni maw? Kei khawm ka nih.

²³Krista rawngbâwltuhai an ni maw? (invêt angin hang hril ka tih) ka ni lem hman hman a nih: sin thaw inrimnaahai nasa nâwk zuolin, intângna ina intângnaahai nasa nâwk zuolin, tiem sênglo vuoknahai, thi el theina vawi tamtak ka tuok a nih.

²⁴Judahai lai vuokna vawi khata vawi sâwmli tlingnaw ṭum nga ka tuok a;

²⁵vawi thum hmawla vuokin ka um a, vawi khat lunga dêngin ka um a, vawi thum lawng sietna ka tuok a, zân khat le ni khat tuisuorietah ka um a;

²⁶Inzinna ṭum tamtakhaiah, vadunga ṭiumnaahai, suomhmanghai laia ṭiumnaahai, ka chipuihai laia ṭiumnaahai, Jentailhai laia ṭiumnaahai, khawpuia ṭiumnaahai, thlalêra ṭiumnaahai, tuisuorieta ṭiumnaahai, unau tehlêmhai laia ṭiumnaahai,

²⁷sâwlnaa le sininrimnaahai, intheinawnaahai vawi tamtak, phîngṭâm le dangchârnaahai, bungheinaahai vawi tamtak, khawsik le saruoka umnaahai dâm ka um hlak.

²⁸Chun, ka ihril tahai ti tâk lovah, kohran po po ka ngaituona, ni tina a mi del zing hi a um bawk a.

²⁹Ka hrâtnawpui lova hrâtnaw tu am a um a? ka lungril sukna lova sukthlûk tu am a um hlak a?

³⁰Suong ding ka ni rau rau chun ka hrât nawna tieng thilhai a nih ka suong lem ding.

³¹Lalpa Isu Pathien le Pa, kumkhuoa inpâk tlâka um chun khêl ka hril nawzie chu a hriet.

³²Damaskaa khan, lal Areta hnuoia rorêltu chun a mi man dingin Damaskaa mihai khawpuia chun ân vêngtir a;

³³chun, tukvera, kul hrûla chun bâwma thlâkin ka um a, chuongchun, a kuta inthawkin kân relhmang sawng ta a.