Read Hmar 2 KORINTH 12 Bible Online

2 KORINTH 12 - Hmar bible

2 KORINTH 12

¹Ka suong hrim hrim ding a nih, ṭhat chu a ṭha naw a, nisienlakhawm, Lalpa kuoma inthawka inlârna le inhriettirna thu hril kai pei el ka tih.

²Kristaa mi pakhat ka hriet, ama chu kum sâwm le pali a ni ta a, (taksain amanih a um ka hriet nawh, taksa lovin amanih a um ka hriet bawk naw a, Pathienin a hriet) vân thumna meua khin zuk lâkin a um a.

³Chun, chu ama ngei chu (taksain amanih a um, taksa lovin amanih a um ka hriet nawh, Pathienin a hriet).

⁴Paradisa lâka a um le, thu hril thei ruol lo mihriem hril thiengnawhai dâm chu a hriet ti ka hriet.

⁵Mi chuong ang chu suong ka tih; nisienlakhawm, ka hrâtnawna ti lo chu mâni chu insuong naw ning ah.

⁶Suong nuom lang khawm invêt ni naw ning a, thu taktak ka hril ding a ni si a; nisienlakhawm, insûm ka tih; chuong naw chun, tûkhawmin an mi hmu ang le, keia inthawka thu an hriet ang nêkin mi ngai ropui lem rawi an tih.

⁷Chun, inhriettirnahai chu a nasa bêk bêk leia kân ngaihlu taluo nawna dingin tisaah hling a mi pêk a nih. Setan tirko, kut inthak nûlnaa mi hmangtu ding chu; chuong naw chun, inngaihlu taluo rawi ka tih.

⁸Chu chungchâng thua chun, a mîn kiengsan theina dingin Lalpa chu vawi thum ka hni a.

⁹Chun, ama chun ka kuomah, “Ka lunginsietna i ta dingin a hun deh, ka thilthawtheina hi hrâtnawnaah i sawnnaw sukfamkima a um,” a ti ta a. Chuongchun, Krista thilthawtheina chu ka chunga a um theina dingin, lâwmtakin ka hrâtnawnahai hi suong lem tâng ka tih.

¹⁰Chuleiin, Krista leiin hrâtnawnaahai, sietnaahai, hnengdenaahai, suknawmnatnaahai, hnawchêpnaahai, ka lâwm hlak a nih; ka hrât naw po leh ka hrât hlak a nih.

¹¹Ka lo invêt a ni ta tie: nangniin invêt lo thei lovin in mi siem a nih; kei chu nangni mi chawimawi ding ka nih in sawnnaw, iengkhawm ni naw lang khawm ieng kawnga khawm tirko lientakhai chu ka tluk naw si naw a.

¹²Tirko ni inchikna chu selna tinrêng neiin, inchiknahai, thilmakhai, thilthawtheinahaiin in kuoma thaw a ni tak tak kha.

¹³Ieng kawng am a na, kohran danghai nêka inhnuoi lema siema in umna chu? Keima ngeiin ka sukkhâwk nawna cheu kawnga khan a ni nghâl naw chun. Chu indik nawnaa chun mi ngaidam ro.

¹⁴Ngai ta u, hi hi in kuoma hung dinga kân zo a vawi thumna ding a nih; chun, mîn khâwkpui naw ti niua, in ta chu zawng ka ni si naw a, nangni a nih ka zawng lem cheu chu; nauhaiin nu le pa ta dingin an inkhâwl pêk ding a ni naw a, nu le pahaiin nauhai ta dingin an inkhâwl pêk lem ding a ni si a.

¹⁵Kei chu ka nei po po in thlarau ta dingin lâwm takin hmang zo ka ta, kei ngei khawm inhmang zo vawng bawk ka tih. Chuong lâwma ka hmangai si cheu chun in mi hmangai tlâwm lem bîk el ding maw?

¹⁶Amiruokchu, kei chu in mîn khâwkpui naw ni ta phawt sienla; nisienlakhawm, mi vervêk hrim hrim lo niin, zâwrin ka man cheu a lo ni hi!

¹⁷In kuoma ka itirhai lai khan tû amani bêk hmangin ka hlâwk pha cheu am a nih?

¹⁸Tita chu kân fui a, unaupa chu ama ruolin ka tir a nih. Tita chun hlâwk phâna hrim hrim a nei cheu am a nih? Lungril hmunkhat puta lêng kan ni naw am a nih? Hnung thuhmun chara lêng kan ni naw am a nih?

¹⁹Tuta sûng po hin nangni kuomah kan thiemna thu hrilah in mi ring zing a ni âwm a. Kristaa chun Pathien mithmuah a nih thu kan hril chu. Nisienlakhawm, dittakhai, iengkim hi nangni siem ṭhatna ding a nih.

²⁰Ka hung phaa ieng amani tiin ka dit angin hung hmu naw rawi ka ti cheu a, kei khawm in dit angin mi hmu naw rawi in tih, ti le, ieng amani tiin, inhalnahai, inthîknahai, lungsennahai, inkhingnahai, inrêlnahai, inberua thu lâknahai, inngaihlut taluotnahai, buoinahai hung um rawi a tih ti le;

²¹ka hung nâwk pha ka Pathienin nangni lai mi sukmuolpho nâwkin, kha hmaa thil suksuoltuhai lai thil inthiengnaw thaw dâm, indit dâm, hur dâm, chînga sim si lo mi tamtakhai chu ṭa rawi ka tih, ti kân lau in sawnnaw.