Read Hmar 2 KORINTH 4 Bible Online

2 KORINTH 4 - Hmar bible

2 KORINTH 4

¹Chuleichun, lunginsietna kan hmu ang peia hi rawngbâwlna hi kan nei leiin kan dawl naw a;

²thil inzâpuium inthuphai chu kan mâk ta lem a; zâwrna thu kan hmang naw a, Pathien thu mi hlêmnain kan hmang bawk naw a; thutak inhriettirin Pathien mithmuin mi tin sie le ṭha hrietna mit kan intlungtir lem hlak a nih.

³Nisienlakhawm, kan Chanchin Ṭha hi inkhuma a um chun bohmang mêkhaia hin a nih inkhuma a um chu.

⁴Krista Pathien angpui, a ropuizie Chanchin Ṭha var chun anni a sunvar thei nawna dingin chuongahai chun khawvêl pathienin awinawhai mit a sukdel ta a.

⁵Mâni thu kan hril si naw a, Krista Isu chu Lalpa a ni kan hril lem hlak, keini khawm Isu leiin suok kan ni kan hril bawk hlak.

⁶Isu Krista hmêla chun, Pathien ropuizie hrietna var chu mi pe dingin, “Inthima inthawkin var varsuok a tih,” titu Pathien chun kan lungrilhai hi a sunvar ta si a.

⁷Nisienlakhawm, thilthawtheina nasatzie chu keini kuoma inthawk ni lovin, Pathien ta a ni thei lemna dingin, chu ro chu pil bêlahai kan kawl a nih.

⁸Khing tieng khing tienga hnengdein kan um a, nisienlakhawm, kan thuok a dawng si nawh; lunginzîngin kan um a, nisienlakhawm, kan bei a dawng si nawh.

⁹Suknawmnatin kan um a, nisienlakhawm, mâksanin kan um si nawh; vuok thlûkin kan um a; nisienlakhawm, sukbohmangin kan um si nawh.

¹⁰Kan taksaa hin kumkhuoin Isu thina chu kan put pei hlak a, Isu hringna khawm kan taksaa hin ân lang theina dingin.

¹¹Keini hringa la umhai hi, Isu leia thi dingin inmantirin kan um rawp a, Isu hringna khawm kan taksa thi theia hin ân lang theina dingin.

¹²Chuongchun, keinia hin thinain sin a thaw hlak a, nangnia ruok chu hringnain sin a thaw hlak a nih.

¹³Amiruokchu, “Ka awia, chuleiin thu ka hril a nih,” ti ziek ang khan, chu ringna lungril ngai chu putin, keini khawmin kan awi ve a, chuleiin thu kan hril bawk a;

¹⁴Lalpa Isu keithotu chun keini khawm Isu kuomah a mi keitho ve ding a na; nangni leh a mîn ngîrtir ding a nih ti kan hriet si a.

¹⁵Iengkim nangni ṭhatna ding a ni si a, lunginsietna chu mi tam lem zâra sukpunga umin, Pathien ropuina dinga lâwmthu nasatak ân hriltir theina dingin.

¹⁶Chuleichun, kan dawl naw a, kan puotieng mihriem hi hung awngrawp tieu tieu sien khawm kan sûng tieng mihriem chu ni tin siem thar peiin a um lem a nih.

¹⁷Kan rinum nêptak, hi mit inkhap kâr chaua um ding hin ropuina nasatak, kumkhuoa dingin a mi siem pêk nasa deu deu a nih;

¹⁸thil hmuthei hi en lovin, thil hmutheinawhai chu kan en lem si a; thil hmutheihai hi sâwtnawtêa ding a na, thil hmutheinawhai ruok chu kumkhuoa ding a ni si a.