Read Hmar 2 KORINTH 7 Bible Online

2 KORINTH 7 - Hmar bible

2 KORINTH 7

¹Chuongchun, dittakhai, chuong thutiem chu ei nei leiin, tisa le thlarau inthiengnaw po poah insukfai ei tiu, Pathien ṭi puma inthiengna sukfamkimin.

²In lungrilah hmun mîn kien ro; tu chunga khawm kan suksuol ngai naw a, tûkhawm kan sukkhawhlo naw a, tûkhawm kan tlâkkhal nawh.

³Chu chu thiemnaw inchangtir ding cheuin ka ti a ni naw a, thi leh thi tlânga, dam leh dam tlâng dingin kan lungrila hin kan invawi cheu ti inhma el khan ka hril cheu kha.

⁴Nangni tienga chu ka ṭawng ngamzie hi a nasa a, ka suongzie cheu hi a nasa a nih; thlamuongnain ka sip a, kan rinumna po poa chun hlimin ka sip liem a nih.

⁵Makedonia ram kan tlung khawm khan kan taksa chun muongna hrim a nei chuong naw a; khing tieng khing tienga sukrinumin kan um ta lem a, puotiengah insuolnahai a um a, sûngtiengah ṭitnahai a um a.

⁶Nisienlakhawm, inngaitlâwmhai thlamuongtu Pathien chun, Tita hungna chun a mi thlamuong ta a;

⁷a hungna chau chun a ni naw a, in lunginlêngzie dâm, in ṭapzie dâm, ka chunga in ṭhahnemngaizie dâm a mi hrilin, nangnia a thlamuongna khawm chun a mi thlamuong ta a nih; chuongchun, ka lâwm nâwk zuol ta a.

⁸Ka lekhathawn khan suklungngai lang cheu khawm, kân sîr nawh; a phut khan chu kân sîr a nih, kha lekhathawn khan a suklungngai cheu ti ka hriet leiin; nisienlakhawm, sâwtnawtê chau a ni kha.

⁹Tuhin chu ka lâwm a nih, suklungngaia in um lei a ni naw a, simna dinga in lungngai leiin a ni lem a nih, keia leia iengkhawm in chân nawna dingin, Pathien dit zâwnga suklungngaiin in um si a.

¹⁰Pathien dit zâwng anga lungngaina chun, sandamna dingin, insîrna um ta lo simna chu a siem si hlak a; khawvêl lungngaina ruok chun thina a siem lem hlak.

¹¹Chuongchun, hi thil hi inchik ro: Pathien dit zâwnga suklungngaina chun, thil lâk ursûnna dâm, pawi tâwk ve naw in nih ti inlangtir nuomna dâm, suol theidâna le suol ṭina dâm, chuong ang ngaituona hrât tak le ṭhahnemngaina tak dam, suol thawtu chu thunun dinga inpei zingna dâm, ân neitir cheu a ni hi. Iengkimah chuong thua chun in inthieng tah ti in suklang ta a.

¹²Chuongchun, in kuomah ziek lang khawm a suol thawtu lei khan ka ziek naw a, a suol tuortu lei khan ka ziek bawk naw a, kan chunga in ṭhahnemngaizie Pathien mithmua in kuoma inhriettira a um theina dingin ka ziek lem a nih.

¹³Chuleiin, thlamuongin kan um ta hrim a; keini thlamuongna chau naw khawm, Tita lâwmna leiin kan lâwm nasa nâwk zuol a; nangni po poin a lungril in sukhar pêk ta leiin.

¹⁴A kuomah ieng kawnga khawm nangni suong lang cheu khawm, ka muolpho si naw a; muolpho nêk hmanin iengkim in kuoma thu taktaka kan hril hlak ang kha, Tita hmaa kan suong chu thu taktak a hung ni ta ngei a.

¹⁵Chun, in rênga thu in awizie dâm, ṭi le inthin puma ama in lo lâwmzie dâm chu hre zingin a lungril chu nangni tieng nasatakin ân lâwm nâwk zuol a nih.

¹⁶Kawng tinrêngah in chunga ka muong leiin ka lâwm a nih.